جاننىڭ جاسى قازىر 14-كە تولدى. سپورتقا جانى قۇمار ءجاسوسپىرىم №21 ورتا مەكتەپتە ءبىلىم الادى. اجەسى باقتىلى التىباساروۆانىڭ ايتۋىنشا, نەمەرەسىنىڭ سپورتقا قىزىعۋشىلىعىن قازىرگى قازاقستان تاەكۆوندو GTF فەدەراتسياسىنىڭ پرەزيدەنتى قالەن سۇلتانعازين وياتىپتى. ول پاۆلوداردا ءبىراز جىلدار تاەكۆوندو باپكەرى بولعانى ءمالىم. جاننىڭ بويىنداعى وتتى بايقاعان شەبەر ونى باۋلىپ, جارىستارعا اپارا باستاعان.
– جان – جالعىز ۇلىمنان تۋعان بەس نەمەرەمنىڭ ۇلكەنى. كىشكەنتايىنان مەنىڭ جانىمدا ءوستى. ەركەلەۋ ەدى, سپورتقا بارىپ ءتارتىپتى, جيناقى بولا تۇسكەنىن كورىپ ءماز بولدىق. قازىر قالاداعى «پرايد» كلۋبىندا جاتتىعىپ ءجۇر. الدا تەمىرتاۋدا وتەتىن قازاقستان چەمپيوناتى, ودان سوڭ شوتلانديادا بولاتىن الەم بىرىنشىلىگى تۇر. وسى جارىستارعا قاتىسىپ, باعىن سىنايتىن ويى بار. نەمەرەم وسى ۋاقىتقا دەيىن بىرنەشە الەم كۋبوگىنە, چەمپيوناتتارىنا قاتىسىپ, جۇلدەمەن ورالدى. بارلىق باسەكەلەردەن جيىنى 60-تان استام مەدال اكەلدى, –دەيدى اجەسى.
بۇگىنگە دەيىن جەتكەن جەتىستىكتەرى بارشىلىق. ماسەلەن, 2018 جىلى ارمەنيا ەلىندە وتكەن جارىستا ەۋروپا كۋبوگىنىڭ كۇمىس جۇلدەگەرى, 2022 جىلى كيپر رەسپۋبليكاسىنداعى بىرىنشىلىكتە ەۋرازيا كۋبوگىن يەلەنسە, سول جىلى قازاقستان چەمپيوناتىنىڭ جەڭىمپازى اتاندى. رەسەي ەلدەرىندە وتكەن اشىق چەمپيوناتتاردا قارسىلاس شاق كەلتىرمەدى. بۇگىندە بۇل سپورت تۇرىنەن قارا بەلبەۋدىڭ يەسى جانە سپورت شەبەرلىگىنە كانديدات.
«تۇڭعىشىمىز – وتباسىمىزدىڭ ماقتانىشى! ال سپورت كەز كەلگەن ادامنىڭ دەنىنىڭ ساۋلىعى ءۇشىن قاجەت. نەمەرەمنىڭ سپورتقا قىزىعۋشىلىعى جوعارى بولعانىنا قۋانامىن. قازىرگى تاڭدا تاەكۆوندوعا ۇزبەي بارىپ ءجۇر. جارىستاردا جەتىستىككە جەتىپ, ابىرويى اسقاقتاپ جاتسا, وندا ءبىزدىڭ مەرەيىمىزدىڭ تاسىعانى», دەپ قوستى باقتىلى التىباساروۆا.
جان شىنعوجا سپورتپەن قوسا وقۋدى دا قاتار الىپ ءجۇر. ۇستازدارى وقۋ ۇلگەرىمى جاقسى ەكەنىن جەتكىزدى.
پاۆلودار
