فوتو: وكق
سپيكەر اسقار ءابىلدا ۇلىنىڭ ايتۋىنشا, رەسپۋبليكالىق بيۋدجەتتەن تولەنەتىن جاردەماقىلاردىڭ بەس ءتۇرى جانە مەملەكەتتىك الەۋمەتتىك ساقتاندىرۋ قورىنان تولەنەتىن ەكى الەۋمەتتىك تولەم تۇرلەرى بار, اتالعان تولەمدەردىڭ بارلىعى وتباسىنىڭ تابىسىنا قاراماستان بەرىلەدى. ەلىمىزدە 2,1 ملن وتباسىعا تولەمدەر بەرىلەدى. بيىل بۇل تولەمدەرگە 1,7 ترلن تەڭگە قارجى قاراستىرىلعان. بىلتىرعى جىلمەن سالىستىرعاندا 210 ملرد تەڭگەگە ارتىق. 2025 جىلدىڭ 1 قاڭتارىنان باستاپ مەملەكەتتىك جاردەماقىلار مەن تولەمدەردىڭ بارلىعى 6,5%-عا وسكەن.
وكق ءباسپاسوز قىزمەتىنىڭ مالىمدەۋىنشە بازالىق دەڭگەيدە مەملەكەت رەسپۋبليكالىق بيۋدجەتتەن 149 مىڭ تەڭگەدەن 247 مىڭ تەڭگەگە دەيىنگى بىرجولعى بالا تۋىلۋىنا بايلانىستى مەملەكەتتىك جاردەماقىعا كەپىلدىك بەرەدى. 2025 جىلدىڭ 4 ايىندا 137 مىڭ وتباسىعا 21 ملرد تەڭگەدەن استام قاراجات تولەندى. وسى جىلعا قاراستىرىلعان قاراجات كولەمى – 75 ملرد تەڭگە.
جۇمىس ىستەمەيتىن ايەلدەر ءۇشىن 1,5 جاسقا دەيىنگى بالا كۇتىمىنە بايلانىستى جاردەماقىلار بار. ولار 22 مىڭ تەڭگەدەن باستاپ 34 995 تەڭگەگە دەيىنگى مولشەردە بەرىلەدى. ماسەلەن, ءبىرىنشى بالاعا – 22 649 تەڭگە, ەكىنشى بالاعا – 26 777 تەڭگە, ءۇشىنشى بالاعا – 30 866 تەڭگە, ءتورتىنشى جانە ودان كەيىنگى بالالارعا – 34 995 تەڭگەدەن تولەنەدى. 1 مامىرداعى جاعداي بويىنشا 123 مىڭ وتباسىعا 14,5 ملرد تەڭگە سوماسىندا جاردەماقى بەرىلگەن.
