ەلىمىزدە وتاۋ قۇرعان ءاربىر بەسىنشى وتباسى بەدەۋلىكپەن بەتپە بەت كەلىپ وتىرعاندا, تۋرا تاپسىرىس بەرىپ قويعانداي, حالىقارالىق بالالاردى قورعاۋ كۇنى قارساڭىندا تۋعان بالالالاردىڭ كىندىگى الماتى قالالىق پەريناتالدىق ورتالىعىندا كەسىلدى.
ءۇش بىردەي قىز بالانىڭ اكە-شەشەسى نۇرماحان الىباەۆ پەن ەلميرا رىسمانوۆا سابيلەردىڭ ەشقانداي رەپرودۋكتيۆتى تەحنولوگيالاردىڭ كومەگىنسىز ومىرگە كەلگەنىن ايتادى.
اياعى اۋىر كەلىنشەك جۇكتىلىگىنە 31 اپتا تولعاندا قالالىق پەريناتالدىق ورتالىققا تۇسكەن. ورتالىقتىڭ دارىگەرلەرى ايەلدىڭ دەنساۋلىعى مەن جۇكتىلىكتىڭ ەرەكشەلىگى بايلانىستى شۇعىل كەسار تىلىگىن جاساپ, بوساندىرىپ الدى.
قولى ەپتى, تاجىريبەلى ماماندار وپەراتسيانىڭ كۇردەلى بولعانىنا قاراماستان, ساعات 14:07-دە – سالماعى 1711 گرامم, بويى – 43 سم بولىپ تۋعان فاتيمانى, ساعات 14:08-دە – سالماعى 1748 گرامم, بويى – 40 سم زۋحرانى, ساعات 14:09-دا – سالماعى 1493 گرامم, بويى – 40 سم ايشا ەسىمدى نارەستەلەردى بوساندىرىپ الدى.
سابيلەر بىردەن جاڭا تۋعان نارەستەلەردىڭ جانساقتاۋ بولىمىنە ورنالاستىرىلىپ, بارلىق قاجەتتى كومەك كورسەتىلىپ جاتىر. ومىرلەرىنىڭ العاشقى ساتىنەن باستاپ كىشكەنە شاقالاقتار دارىگەرلەردىڭ قامقورلىعى مەن ءجىتى باقىلاۋىنا بەرىلدى. پەريناتالدى ورتالىقتىڭ ماماندارىنىڭ كاسىبيلىگىنىڭ ارقاسىندا نارەستەلەر ءسات سايىن ءال جيناپ, شيرىعىپ كەلەدى.
ەرەكشە جۇكتىلىكتىڭ ءوز قيىندىقتارىنا قاراماستان, 36 جاستاعى انا دا قازىر ءوزىن جاقسى سەزىنەدى جانە دارىگەرلەرگە دەگەن العىسى دا شەكسىز.
«بۇل مەنىڭ ءۇشىنشى ەگىزدەرىم. ءبىزدىڭ وتباسىمىزدا 2019 جانە 2022 جىلدارى دۇنيەگە كەلگەن 2 جۇپ ەگىزدەرىمىز ءوسىپ جاتىر. ال ەندى, 2025 جىلى, دۇنيەگە ۇشەم اكەلدىم! اللاعا شۇكىر, ەندى بىزدە 10 بالا بار.قالالىق پەريناتالدىق ورتالىقتىڭ اكۋشەر-گينەكولوگتارىنا, دارىگەرلەرىنە جانە بارلىق ماماندارىنا شىن جۇرەكتەن العىس ايتامىن. دارىگەرلەردىڭ كاسىبيلىگىنىڭ جانە قامقورلىعىنىڭ ارقاسىندا ءبارى ءساتتى ءوتتى», دەيدى اياق-قولىن باۋىرىنا العان ەلميرا رىسمانوۆا.
وسىناۋ ايتۋلى وقيعاعا ورتاقتاسىپ وتىرعان الماتى قالالىق پەريناتالدىق ورتالىقتىڭ باسشىلىعى مەديتسينالىق ۇجىمنىڭ جوعارى كاسىبيلىگىن ماقتان تۇتادى.
بۇل سابيلەر – بيىل مەگاپوليستەگى پەريناتالدىق ورتالىقتا دۇنيە ەسىگىن اشقان العاشقى ۇشەم. وتكەن جىلى الماتى قالالىق پەريناتالدىق ورتالىعى 16 700-دەن استام انا مەن ولاردىڭ جاڭا تۋعان نارەستەلەرىنە مەديتسينالىق كومەك كورسەتتى, 9014 بالانىڭ دۇنيەگە كەلۋىنە جاردەمدەستى. ورتالىق قالاداعى بارلىق مەرزىمىنەن بۇرىن بوسانعان ايەلدەردىڭ 62% قابىلداعان.
