فوتو: ۇكىمەتتىڭ ءباسپاسوز قىزمەتى
كەزدەسۋ بارىسىندا جوعارى دەڭگەيدە قول جەتكىزىلگەن ۋاعدالاستىقتاردى ىسكە اسىرۋ تەتىكتەرى, سونداي-اق تمۇ اياسىندا مۇشە مەملەكەتتەر اراسىنداعى ىنتىماقتاستىقتى كەڭەيتۋ جولدارى قاراستىرىلعان. الەۋمەتتىك ساياسات, ەكولوگيا, ونەركاسىپ, عىلىم مەن يننوۆاتسيالار سالالارىندا ءوزارا ءىس-قيمىلدىڭ جاڭا فورماتتارى قۇرىلىپ جاتقانى اتاپ ءوتىلدى.
پرەمەر-مينيستر ساۋدا-ەكونوميكالىق بايلانىستاردى جانداندىرۋدىڭ ماڭىزدىلىعىنا نازار اۋداردى. 2024 جىلى قازاقستان مەن تمۇ ەلدەرى اراسىنداعى تاۋار اينالىمى $11,4 ملرد-قا جەتكەنىمەن, بۇل كورسەتكىشتىڭ ارتىندا ءالى دە ۇلكەن الەۋەت بار ەكەنىن اتاپ ءوتتى. وسىعان بايلانىستى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ ساۋدا قاتىناستارىن ودان ءارى دامىتۋعا باعىتتالعان جەكە قۇجات ازىرلەۋگە باستاماشى بولدى.
كەزدەسۋدە گۋمانيتارلىق سالالارداعى باستامالار دا نازاردان تىس قالمادى. اقتاۋ قالاسى تۇركى الەمىنىڭ مادەني استاناسى رەتىندە جاريالانسا, ماۋسىم ايىنان باستاپ الماتى تمۇ-نىڭ جاستار استاناسى بولماق. تۇركى مادەنيەتى مەن تاريحي مۇراسىن دارىپتەۋگە باعىتتالعان ءتۇرلى ءىس-شارالار ۇيىمداستىرىلادى.
كەزدەسۋ سوڭىندا تاراپتار ءوزارا ءتيىمدى ىنتىماقتاستىقتى ودان ءارى نىعايتۋعا نيەتتى ەكەندەرىن راستادى.
