سۋرەت: kaz.zakon.kz
ءبىرىنشى اپتانىڭ قورىتىندىسى بويىنشا تالاپكەرلەردىڭ 62%-ى شەكتى بالل جينادى. بەس ءپان بويىنشا ورتاشا بالل 61-ءدى قۇرادى. ەڭ جوعارى 140 بالدى تۇركىستان وبلىسىنان ءابىلحان جانىبەك جينادى.
جالپى, تەستىلەۋگە قاتىسۋعا 216 مىڭ تالاپكەردەن 399 مىڭعا جۋىق ءوتىنىش كەلىپ تۇسكەنىن ەسكە سالا كەتەيىك. قازىرگى تاڭدا تەستكە قاتىسۋشىلاردىڭ باسىم بولىگى, اتاپ ايتقاندا, 20%-ى «ماتەماتيكا-فيزيكا», 17%-ى «شىعارماشىلىق ەمتيحان» پاندەر كومبيناتسياسىن تاپسىردى. 11%-ى «بيولوگيا-حيميا» كومبيناتسياسىن تاڭداعان.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە قولجەتىمدى بولادى.
ۇلتتىق تەستىلەۋ ورتالىعىنىڭ دەرەگىنە سۇيەنسەك, ۇبت-نى وتكىزۋدىڭ ءبىرىنشى اپتاسىندا 55 ەرەجە بۇزۋشىلىق انىقتالدى. 26 تالاپكەر سمارتفونداردى, شپارگالكالاردى جانە باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 29 ادام تەستىلەۋ كەزىندە ەرەجەلەردى بۇزعانى ءۇشىن اۋديتوريادان شىعارىلدى, ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
2025 جىلعى ۇبت اياقتالعاننان كەيىن 31 قازانعا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
