جاڭا مادەني نىسان – ەكى ەل اراسىنداعى كوپجىلدىق ىنتىماقتاستىق پەن سەنىمنىڭ, سونداي-اق قاسىم-جومارت توقاەۆ پەن ۆلاديمير پۋتين اراسىنداعى دوستىق قارىم-قاتىناس پەن ءوزارا قۇرمەتتىڭ جەمىسى.
اللەيانىڭ اشىلۋ راسىمىنە قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا مەن رەسەي فەدەراتسياسىنىڭ مادەنيەت ءمينيسترى ولگا ليۋبيموۆا باستاعان رەسەيلىك دەلەگاتسيا قاتىستى.
ءىس-شارا بارىسىندا ايدا بالاەۆا ەكى ەل اراسىنداعى قارىم-قاتىناستا مادەني ىنتىماقتاستىقتىڭ ورنى ەرەكشە ەكەنىن اتاپ ءوتتى. ونىڭ ايتۋىنشا, قوس تاراپ بىرلەسكەن كورمەلەر ۇيىمداستىرىپ, شىعارماشىلىق ۇجىمداردىڭ گاسترولدەرىن, كينوفەستيۆالدەر وتكىزۋدە, سونداي-اق مادەني-گۋمانيتارلىق ىنتىماقتاستىق جونىندەگى كىشى كوميسسيا جەمىستى جۇمىس ىستەپ كەلەدى.
سوڭعى جىلدارداعى ماڭىزدى وقيعالار قاتارىندا – ەكى ەلدىڭ مادەني كۇندەرىن, قازاقستاندا «ورىس ماۋسىمدارى» مادەني-گۋمانيتارلىق جوباسىن جانە «اۋقىمدى گاسترولدەر» باعدارلاماسى ءساتتى جۇزەگە اسىپ كەلەدى.
«مادەنيەت ارقاشان حالىقتاردى جاقىنداستىراتىن كوپىر بولىپ كەلەدى. ونەر, ءتىل, ءداستۇر مەن مۋزىكا ارقىلى ءبىز ءبىر-ءبىرىمىزدى تەرەڭىرەك تانيمىز, ەرەكشەلىگىمىزدى تۇسىنۋگە ءارى قۇرمەتتەۋگە ۇيرەنەمىز, ورتاق قۇندىلىقتاردى تابامىز. سوندىقتان دا ماڭگىلىك دوستىق اللەياسى – حالىقتارىمىزدىڭ رۋحاني بىرلىگىنىڭ, ورتاق تاريح پەن كەلەشەككە باعىتتالعان ىنتىماقتاستىقتىڭ ايقىن بەلگىسى. بۇل ورىن بولاشاقتا بىرلەسكەن مادەني جوبالار جۇزەگە اساتىن, سۋرەتشىلەر, مۋزىكانتتار, اكتەرلەر, تاريحشىلار مەن جاس تالانتتار باس قوساتىن الاڭعا اينالارىنا سەنەمىن. اللەيا – ۇرپاقتان-ۇرپاققا جالعاسار سەنىم مەن قۇرمەت, ورتاق قۇندىلىقتاردى ساقتاۋ قاجەتتىگىن ەسكە سالىپ تۇراتىن سيمۆول», – دەدى ايدا بالاەۆا.
رەسەي مادەنيەت ءمينيسترى ولگا ليۋبيموۆا ەكى ەل اراسىنداعى مادەني بايلانىستاردى نىعايتۋعا نيەتتى ەكەنىن جەتكىزدى.
«دوستىق اللەياسىن اشۋ قۇرمەتى ەكى ەلدىڭ مادەنيەت مينيسترلىگىنە بەرىلىپ وتىر. مادەني بايلانىستار, ورتاق قۇندىلىقتار مەن تاريح – حالىقتار دوستىعىنىڭ بەرىك تىرەگى ەكەنى ءسوزسىز», – دەپ اتاپ ءوتتى ولگا ليۋبيموۆا.
سونىمەن قاتار «مادەني ديالوگ: قازاقستان – رەسەي» اتتى دوڭگەلەك ۇستەل ۇيىمداستىرىلدى. وعان قوس ەلدىڭ شىعارماشىلىق جانە عىلىمي زيالى قاۋىم وكىلدەرى قاتىستى. جيىن بارىسىندا تەاتر ونەرى, مۋزەي ءىسى, كىتاپحانا سالاسى, كينەماتوگرافيا جانە مادەني ءبىلىم بەرۋ باعىتتارىنداعى بىرلەسكەن جوبالاردى دامىتۋ پەرسپەكتيۆالارى تالقىلاندى.
اتالمىش مادەني ءىس-شارالار ەكى ەل ونەرپازدارى قويعان كونتسەرتپەن تۇيىندەلدى. «استانا وپەرا» تەاترىندا قازاقستان مەن رەسەيدىڭ مادەنيەت قايراتكەرلەرى, حالىقارالىق بايقاۋلاردىڭ لاۋرەاتتارى, اكادەميالىق ونەر جۇلدىزدارى ونەر كورسەتتى.
