فورۋم • 28 مامىر, 2025

«يتاليا – قازاقستان» ىسكەرلىك فورۋمىندا 10 مەموراندۋم جاسالدى

51 رەت
كورسەتىلدى
4 مين
وقۋ ءۇشىن

بۇگىن Astana International Forum اياسىندا قر ساۋدا جانە ينتەگراتسيا مينيسترلىگى, قازاقستان-يتاليا ساۋدا قاۋىمداستىعى (ACIK) جانە ەكى ەل ەلشىلىكتەرى  بىرلەسىپ ۇيىمداستىرعان «يتاليا – قازاقستان» ىسكەرلىك فورۋمى ءوتتى. ءىس-شارا ەكىجاقتى ىنتىماقتاستىقتىڭ پەرسپەكتيۆالارىن تالقىلاۋ, ىسكەرلىك بايلانىستاردى نىعايتۋ جانە قوسىلعان قۇن تىزبەگى بويىنشا – لوگيستيكا مەن ونەركاسىپتىك كووپەراتسيادان باستاپ جوعارى تەحنولوگيالار مەن «جاسىل» ەنەرگەتيكاعا دەيىن – بىرلەسكەن جوبالاردى ىسكە قوسۋ ءۇشىن ماڭىزدى الاڭعا اينالدى, دەپ حابارلايدى Egemen.kz ساۋدا جانە ينتەگراتسيا مينيسترلىگىنىڭ ءباسپاسوز قىزمەتىنە سىلتەمە جاساپ.

«يتاليا – قازاقستان» ىسكەرلىك فورۋمىندا 10 مەموراندۋم جاسالدى

فوتو: ساۋدا جانە ينتەگراتسيا مينيسترلىگى

فورۋم اياسىندا جالپى سوماسى 180 ميلليون ەۋرونى قۇرايتىن 10 مەموراندۋمعا قول قويىلدى. بۇل ەكى ەلدىڭ ىسكەر توپتارى اراسىنداعى جوعارى سەنىم دەڭگەيى مەن ءوزارا ءىس-قيمىلدى ساپالى جاڭا دەڭگەيگە كوتەرۋگە دايىن ەكەنىن كورسەتەدى. جوبالار ستراتەگيالىق سالالاردى قامتيدى, اتاپ ايتقاندا, ماشينا جاساۋ, مۇناي حيمياسى, اۋىل شارۋاشىلىعىن قايتا وڭدەۋ, مەتاللۋرگيا, لوگيستيكالىق پروتسەستەردى تسيفرلاندىرۋ جانە قازاقستان اۋماعىندا بىرلەسكەن وندىرىستەر قۇرۋ ارقىلى ەۋروپا, ورتالىق ازيا جانە قىتاي نارىعىنا شىعۋ.

gov.kz

قر ساۋدا جانە ينتەگراتسيا ءمينيسترى ارمان شاققاليەۆ فورۋم قازاقستان مەن يتاليا اراسىنداعى ەكونوميكالىق قاتىناستاردىڭ جاڭا كەزەڭىنىڭ باستالۋىن بىلدىرەتىنىن اتاپ ءوتتى.

«بۇگىنگى فورۋم ساۋدا-ەكونوميكالىق ارىپتەستىكتى نىعايتۋدىڭ نەگىزگى الاڭىنا جانە جاھاندىق وزگەرىستەر جاعدايىنداعى ستراتەگيالىق ديالوگقا ۇمتىلىستىڭ سيمۆولىنا اينالدى. قازاقستان يتاليا رەسپۋبليكاسىمەن جان-جاقتى, پراگماتيكالىق جانە ۇزاق مەرزىمدى ىنتىماقتاستىقتى دامىتۋعا ەرەكشە ءمان بەرەدى. ءبىز تەك ساۋدانى كەڭەيتىپ قانا قويماي, سونىمەن قاتار جاھاندىق لوگيستيكا قايتا قۇرىلىپ, پروتەكتسيونيزم مەن الەمدىك ەكونوميكانىڭ تسيفرلانۋى كۇشەيىپ جاتقان كەزدە حالىقارالىق جەتكىزۋ تىزبەكتەرىنىڭ تۇراقتىلىعىن قامتاماسىز ەتۋگە قابىلەتتى تۇراقتى ءارى يننوۆاتسيالىق ەكوجۇيە قالىپتاستىرىپ جاتىرمىز», دەدى مينيستر.

سونداي-اق ول قازاقستان ءوزىن تەك رەسۋرس جەتكىزۋشى عانا ەمەس, ەۋرازيانىڭ كولىك, وندىرىستىك جانە تەحنولوگيالىق حابى رەتىندە كورەتىنىن ايتتى. وسىعان بايلانىستى ترانسكاسپي حالىقارالىق كولىك باعىتىن (ورتا ءدالىز) دامىتۋعا ەرەكشە نازار اۋدارىلدى, ول گەوەكونوميكالىق وزگەرىستەر اياسىندا ءداستۇرلى باعىتتارعا ورنىقتى ءارى باسەكەگە قابىلەتتى بالاما رەتىندە ماڭىزدىلىققا يە بولىپ وتىر. 2024 جىلى بۇل باعىتتاعى تاسىمال كولەمى 63%-عا ارتىپ, 4,1 ملن توننانى قۇراعان, ال كونتەينەرلىك تاسىمالدار 2,6 ەسەگە ءوسىپ, 50,5 مىڭ جفە-گە جەتكەن.

تاراپتار ءداستۇرلى ساۋدا الماسۋدان بىرلەسكەن وندىرىستىك ينفراقۇرىلىم قالىپتاستىرۋعا كوشۋگە دايىن ەكەندەرىن كورسەتتى. پەرسپەكتيۆالى باعىتتار قاتارىندا – قازاقستان-يتاليا باستامالارىن قولدايتىن ينۆەستيتسيالىق قور قۇرۋ, «Digital Supply Chain 4.0» تسيفرلىق پلاتفورماسىن دامىتۋ, ەكسپورتتىق جانە ينۆەستيتسيالىق تاۋەكەلدەردى بىرلەسىپ ساقتاندىرۋ تەتىكتەرىن ەنگىزۋ, سونداي-اق بولاشاق جوبالاردىڭ زاماناۋي ەكولوگيالىق جانە الەۋمەتتىك ستاندارتتارعا ساي بولۋىن قامتاماسىز ەتەتىن ESG جول كارتاسىن جاساۋ بار. قازاقستان تاراپىنان ۇسىنىلعان نەگىزگى باستامالاردىڭ ءبىرى – «Made in Kazakhstan with Italy» بىرلەسكەن برەند قۇرۋ يدەياسى بولدى. بۇل برەند تەرەڭ تەحنولوگيالىق كووپەراتسيانىڭ جانە جوعارى باسەكەگە قابىلەتتى ءونىمدى بىرلەسىپ وڭدەۋ مەن ەكسپورتتاۋعا كوشۋ ءۇردىسىنىڭ سيمۆولىنا اينالا الادى.

اگروونەركاسىپتىك كووپەراتسيا دا باستى نازاردا بولدى. قازاقستان ورگانيكالىق بيداي, مايلى داقىلدار مەن مال ازىعىن ەكسپورتتاۋدى ۇلعايتۋعا دايىن ەكەنىن ءبىلدىرىپ, حالىقارالىق نارىققا باعىتتالعان بىرىڭعاي برەندپەن اۋىل شارۋاشىلىعى ونىمدەرىن بىرلەسىپ وڭدەۋ جانە بۋىپ-ءتۇيۋ جەلىلەرىن قۇرۋدى ۇسىندى.

ەكىجاقتى ساۋدا ديناميكاسى تەرەڭدەتىلگەن ارىپتەستىكتىڭ وزەكتىلىگى مەن قاجەتتىلىگىن دالەلدەپ وتىر: 2024 جىلدىڭ قورىتىندىسى بويىنشا قازاقستان مەن يتاليا اراسىنداعى تاۋار اينالىمى 19,9 ملرد دوللاردى (+24%) قۇراعان. ونىڭ ىشىندە قازاقستاننان ەكسپورت – 18,7 ملرد دوللاردى (+25,8%) قۇراسا, يتاليادان يمپورت – 1,3 ملرد دوللاردى (+2,2%) قۇراپ, ماشينا جاساۋ ونىمدەرىن, مەديتسينالىق پرەپاراتتار مەن وندىرىستىك جابدىقتاردى قامتىدى.

الايدا, مينيستر ا.شاققاليەۆ اتاپ وتكەندەي, بۇل كورسەتكىشتەر – الەۋەتتىڭ ءبىر بولىگى عانا.

قازاقستان مەن يتاليا ءوزارا سەنىمگە, تەحنولوگيالار الماسۋىنا, ءوندىرىستى جەرگىلىكتەندىرۋگە جانە ورنىقتى لوگيستيكاعا نەگىزدەلگەن مۇلدەم جاڭا فورماتتاعى ارىپتەستىك قۇرا الادى.

سوڭعى جاڭالىقتار