فوتو: Ticketon.kz سكرينشوتى
ساتىلىم اشىلعان العاشقى مينۋتتاردا سايتقا كىرۋشىلەر سانى كۇرت ءوسىپ, جۇيە ەلەكتروندى كەزەك كۇتىپ تۇرعان ادامداردىڭ سانىن كورسەتتى. ماسەلەن, سايتقا كىرۋ ءۇشىن كەزەكتە 15 مىڭنان استام قولدانۋشى تۇرسا, ناقتى بيلەت ساتىپ الىپ جاتقان ادام سانى نەبارى 35 بولعان.
Ticketon پايدالانۋشىلارعا بەتتى جاڭارتپاۋدى جانە جاپپاۋدى ەسكەرتتى. مۇنداي ارەكەتتەر ەلەكتروندى كەزەكتەن اۆتوماتتى تۇردە شىعارىپ تاستايدى.
«دجەننيفەر لوپەستىڭ كونتسەرتىنە بيلەتتەر تومەندەگى باتىرما ارقىلى قولجەتىمدى. نەمەسە بىرنەشە مينۋت كۇتكەننەن كەيىن ءسىز اۆتوماتتى تۇردە Ticketon-نىڭ باستى بەتىنە وتەسىز. ەگەر بۇل پاراقشادان شىعىپ, 10 مينۋت ىشىندە قايتا ورالماساڭىز, كەزەگىڭىز جويىلادى», دەلىنگەن سايتتاعى حابارلامادا.
بيلەتتەردىڭ باعاسى 40 مىڭ تەڭگەدەن باستالادى (تريبۋنا), ال VIP, FAN جانە DANCE-ايماقتارعا كىرۋ 90 مىڭ تەڭگەدەن جوعارى. الەۋمەتتىك جەلى قولدانۋشىلارىنىڭ ايتۋىنشا, ساتىلىم باستالعان العاشقى ساعات ىشىندە ەڭ تانىمال ورىندار لەزدە ساتىلىپ كەتكەن.
ايتا كەتەيىك, بۇعان دەيىن «استانا كونتسەرت» پروديۋسەرى مالىك حاسەنوۆ استاناداعى كونتسەرتكە بيلەتتەردىڭ ساتىلىمى 11 ساۋىردە باستالاتىنىن حابارلاعان. ول كۇنى سايتقا كىرۋ مۇمكىن بولماي, تەحنيكالىق قيىندىقتار ورىن العان ەدى.
جانەل تولەۋبەكوۆا, ەۇۋ ستۋدەنتى
