سپورتشى گروسسمەيستەرلىك اتاققا قاجەتتى ءۇشىنشى جانە سوڭعى نورمانى ورىنداپ, ءوزىنىڭ سپورتتىق مانسابىندا العاش رەت 2500 رەيتينگىلىك ۇپاي مەجەسىنەن استى. بۇل حالىقارالىق گروسسمەيستەر اتاعىن الۋ ءۇشىن قويىلاتىن باستى شارتتاردىڭ ءبىرى ەدى.
تۋرنير قورىتىندىسى بويىنشا اساۋباەۆا 64 گروسسمەيستەردىڭ ىشىندە ۇزدىك وتىزدىققا ەندى. سونىمەن قاتار ول ايەلدەر اراسىندا ەڭ جوعارى ناتيجەگە قول جەتكىزىپ, الەمدىك دەڭگەيدەگى جۇلدىزدار – ايەلدەر گران-ءپريىنىڭ جەڭىمپازى چجۋ تسزينەر مەن دۇنيەجۇزىلىك شاحمات وليمپياداسىنىڭ چەمپيونى ديۆيا دەشمۋحتان وزىپ شىقتى.
قازاقستان شاحمات فەدەراتسياسىنىڭ مالىمەتىنشە, ەندى تەك فيدە كەڭەسىنىڭ الداعى وتىرىسىندا اتاقتىڭ رەسمي بەكىتىلۋىن كۇتۋ قالدى.
«ەندى فيدە كەڭەسىنىڭ الداعى وتىرىسىندا اتاقتىڭ رەسمي تۇردە بەكىتىلۋىن كۇتۋ عانا قالدى. سول كەزدە ءبيبىسارا قازاقستان تاريحىنداعى جانسايا ابدۋمالىكتەن كەيىنگى ەكىنشى ايەل گروسسمەيستەر اتانباق», دەلىنگەن حابارلامادا.
ءبيبىسارا اساۋباەۆا – جاسوسپىرىمدەر اراسىنداعى بىرنەشە دۇركىن الەم چەمپيونى, ايەلدەر اراسىنداعى الەم چەمپيوناتىنىڭ (راپيد) كۇمىس جۇلدەگەرى, ءىرى حالىقارالىق تۋرنيرلەردىڭ قاتىسۋشىسى جانە كوپتەگەن ماراپاتتاردىڭ يەگەرى.
