مۇنداي ويىنداردىڭ باستى ماقساتى – جاسوسپىرىمدەردى شىنايى ومىردەن الىستاتىپ, ولاردىڭ پسيحولوگيالىق السىزدىگىن پايدالانۋ. ولار بالانى ءتۇرلى قاۋىپتى تاپسىرمالار ورىنداۋعا ماجبۇرلەيدى, بۇل تاپسىرمالار العاشقىدا جەڭىل ءارى قىزىقتى بولىپ كورىنگەنىمەن, ۋاقىت وتە كەلە ولار بالانىڭ پسيحولوگيالىق جاعدايىن كۇردەلەندىرىپ, ءتىپتى سۋيتسيدكە دەيىن جەتكىزۋى مۇمكىن. پسيحولوگ نازگۇل سەيداحمەتوۆانىڭ پىكىرىنشە, مۇنداي ويىنداردىڭ باستى قاۋپى – ولاردىڭ بالالاردىڭ ساناسىنا تەرەڭ اسەر ەتۋىندە.
«بۇل ويىندار بالالاردىڭ ءوزىن ماڭىزدى سەزىنگىسى كەلۋى سەزىمىن پايدالانادى. كوپتەگەن بالا اتا-اناسىمەن قارىم-قاتىناسىنىڭ سۋىپ كەتكەنىنەن نەمەسە قۇرداستارىنان قولداۋ تاپپاعانىنان وسىنداي ۆيرتۋالدى قاۋىمداستىقتارعا قوسىلادى», دەيدى ول.
ينتەرنەت قاۋىپسىزدىگى جونىندەگى ساراپشى تيمۋر ابدىقۇلوۆ بۇل ماسەلەنى شەشۋ ءۇشىن تسيفرلىق ساۋاتتىلىقتى ارتتىرۋ كەرەكتىگىن ايتادى.
«مۇنداي قاۋىپتى كونتەنت كوبىنەسە الەۋمەتتىك جەلىلەر مەن جابىق توپتار ارقىلى تاراتىلادى. سوندىقتان اتا-انالار بالالارىنىڭ ينتەرنەتتەگى ارەكەتتەرىن قاداعالاعانى ءجون. جالپى بالالاردىڭ ينتەرنەتتەگى قاۋىپسىزدىگىن قامتاماسىز ەتۋ – بارشامىزدىڭ ورتاق مىندەتىمىز. ولارعا سۇيەنىش بولا وتىرىپ, شىنايى ءومىردىڭ ۆيرتۋالدى الەمنەن الدەقايدا ماڭىزدى ەكەنىن ءتۇسىندىرۋىمىز كەرەك», دەيدى ول.
اتا-انالار دا بۇل ماسەلەگە ەرەكشە نازار اۋدارۋى كەرەك. الماتى قالاسىنىڭ تۇرعىنى, ءۇش بالانىڭ اناسى گۇلنار سەيىلحان بالالارىنىڭ سمارتفوندارىنان وسىنداي ويىندارعا قاتىستى بەلگىلەردى بايقاپ قالعانىن ايتادى. «مەن بالامنىڭ تەلەفونىنان وسىنداي ويىننىڭ باستاپقى تاپسىرماسىن كورگەندە, بىردەن سويلەسىپ, ونىڭ زيانىن ءتۇسىندىردىم. ەڭ باستىسى – بالالارىمىزبەن اشىق اڭگىمەلەسىپ, ولاردىڭ نە ويلايتىنىن تىڭداي ءبىلۋ» دەيدى گ. سەيىلحان.
