فوتولار: election.gov.kz
ەقىۇ دياقب باسشىلىعىمەن كەزدەسۋ
قر وسك باستاماسىمەن العاش رەت ەۋروپاداعى قاۋىپسىزدىك جانە ىنتىماقتاستىق ۇيىمىنىڭ (ەقىۇ) دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ (دياقب) ديرەكتورى ماريا تەلاليانمەن كەزدەسۋ ۆارشاۆا قالاسىنداعى ەقىۇ دياقب-نىڭ شتاب-پاتەرىندە ءوتتى.
كەزدەسۋ بارىسىندا قر وسك توراعاسى نۇرلان ءابدىروۆ ماريا تەلالياندى جاقىندا عانا تاعايىندالۋىمەن قۇتتىقتاپ, بۇل جاۋاپتى قىزمەتىندە تابىس تىلەدى.
نۇرلان ءابدىروۆ قازاقستاننىڭ ەقىۇ دياقب-مەن سىندارلى ديالوگتى ءداستۇرلى تۇردە جوعارى باعالايتىنىن جانە ونىڭ بايقاۋ ميسسيالارىنىڭ قورىتىندى ۇسىنىمدارىنا مۇقيات قارايتىنىن اتاپ ءوتتى.
ء«بىز بيۋرو ۇسىنىمدارىن قر وسك جانىنداعى ساراپشىلىق كەڭەستە ازاماتتىق قوعام وكىلدەرىنىڭ, ونىڭ ىشىندە جاس سايلاۋشىلار كلۋبىنىڭ جانە مۇگەدەكتىگى بار ادامداردىڭ سايلاۋ قۇقىقتارى جونىندەگى جۇمىس توبىنىڭ قاتىسۋىمەن جۇيەلى تۇردە تالقىلايمىز», دەدى نۇرلان ءابدىروۆ.
ورتالىق سايلاۋ كوميسسياسىنىڭ توراعاسى ەقىۇ دياقب-مەن ىنتىماقتاستىق قازاقستانعا باسقا ەلدەردەگى سايلاۋلاردى بايقاۋعا عانا ەمەس, سونىمەن قاتار دياقب-نىڭ ۇزاق جانە قىسقا مەرزىمدى ميسسيالارى اياسىندا بايقاۋشى رەتىندە قاتىسۋعا مۇمكىندىك بەرەتىنىن ايتتى. سونىمەن قاتار, بۇل قازاقستاننىڭ حالىقارالىق كونفەرەنتسيالارعا قاتىسۋىنا جول اشادى جانە ەلەكتورالدىق وزگەرىستەر ۇدەرىسىندە بەلسەندى بولۋعا مۇمكىندىك بەرەدى.
پرەزيدەنت باستاماشىلىق ەتكەن كونستيتۋتسيالىق رەفورمالار اياسىندا قازاقستانداعى سايلاۋ جۇيەسىنىڭ ترانسفورماتسياسى تۋرالى نۇرلان ءابدىروۆ كەڭىنەن بايانداپ, بۇل وزگەرىستەر قوعام سۇرانىسىنا نەگىزدەلگەنىن اتاپ ءوتتى. بۇل ترانسفورماتسيا ەقىۇ دياقب باسشىلىعىنىڭ قىزىعۋشىلىعىن تۋعىزدى.
«ەڭ الدىمەن, بۇل ساپاردىڭ وتە پايدالى بولعانىن ايتۋىم كەرەك. ول قازاقستان رەسپۋبليكاسىنىڭ ورتالىق سايلاۋ كوميسسياسى سايلاۋدى بايقاۋ ماسەلەلەرى بويىنشا دياقب-مەن سىندارلى ديالوگ جۇرگىزۋگە شىنىمەن دە نيەتتى ەكەنىن دالەلدەيدى. بۇل كەزدەسۋ بولاشاقتا دا ىنتىماقتاستىقتى جالعاستىرۋعا دايىندىق بار ەكەنىن ايقىن كورسەتتى. ءبىز مۇنداي ءوزارا ءىس-قيمىلدى دامىتۋ الەۋەتىن كورىپ وتىرمىز», دەدى ءوز كەزەگىندە ەقىۇ دياقب-نىڭ ديرەكتورى ماريا تەلاليان.
كەزدەسۋ بارىسىندا تاراپتار ساراپتامالىق كونسۋلتاتسيالاردى تۇراقتى تۇردە وتكىزۋگە نيەتتى ەكەنىن راستادى. سونىمەن قاتار سايلاۋدى ۇيىمداستىرۋ, مونيتورينگ جۇرگىزۋ تاجىريبەسى جانە استاناداعى ەقىۇ باعدارلامالار كەڭسەسىمەن ءوزارا ءىس-قيمىل ماسەلەلەرى تالقىلاندى.
پولشا ۇلتتىق سايلاۋ كوميسسياسىنىڭ توراعاسىمەن كەزدەسۋ
نۇرلان ءابدىروۆ پولشا رەسپۋبليكاسىنىڭ ۇلتتىق سايلاۋ كوميسسياسىنىڭ توراعاسى سيلۆەستر مارچينياكپەن كەزدەسۋ وتكىزدى.
قر وسك توراعاسى 2025 جىلعى 18 مامىردا وتكەن پرەزيدەنتتىك سايلاۋدىڭ ءبىرىنشى تۋرىنىڭ ءساتتى وتۋىمەن ارىپتەسىن قۇتتىقتادى.
كەزدەسۋ بارىسىندا سايلاۋ ناۋقاندارى كەزىندەگى جالعان اقپارات پەن ديپفەيكتەرگە قارسى كۇرەس تاقىرىبىنا ەرەكشە نازار اۋدارىلدى. نۇرلان ءابدىروۆ وسى باعىتتاعى تاجىريبە الماسۋعا مۇددەلىلىك تانىتىپ, تسيفرلىق ورتاداعى زاماناۋي قاۋىپتەرگە قارسى تۇرا الاتىن تۇراقتى تەتىكتەر قالىپتاستىرۋدىڭ ماڭىزدىلىعىن اتاپ ءوتتى.
تاراپتار ەلەكتورالدىق وزەكتى ماسەلەلەر بويىنشا ساراپتامالىق كونسۋلتاتسيالار وتكىزۋدى قوسا العاندا ەكىجاقتى ىنتىماقتاستىقتى كەڭەيتۋ مۇمكىندىكتەرىن تالقىلادى.
كەزدەسۋ سوڭىندا قازاقستان دەلەگاتسياسى پولياك ارىپتەستەرىنە وسك ازىرلەگەن عىلىمي باسىلىمداردى, ونىڭ ىشىندە اعىلشىن تىلىندەگى «قازاقستان رەسپۋبليكاسى ورتالىق سايلاۋ كوميسسياسىنا – 30 جىل. قازاقستان رەسپۋبليكاسى سايلاۋ جۇيەسىنىڭ ترانسفورماتسياسى» اتتى مونوگرافيانى جانە «كونستيتۋتسيالىق رەفورما جانە سايلاۋ جۇيەسى» حالىقارالىق كونفەرەنتسياسىنىڭ ماتەريالدار جيناعىن تابىستادى.
سونداي-اق, ورتسايلاۋكوم توراعاسى پولشاداعى پرەزيدەنتتىك سايلاۋدى بايقاۋ بويىنشا ەقىۇ دياقب ميسسياسىنىڭ ءباسپاسوز كونفەرەنتسياسىنىڭ جۇمىسىنا قاتىستى.
