«كەلەشەك مەكتەپتەردىڭ» قاتارى كوبەيەدى

ۇلتتىق جوبانىڭ شاراپاتىن ال­عاش­قىلاردىڭ ءبىرى بولىپ باي­زاق اۋدانىنىڭ حالقى سەزىندى. وتكەن وقۋ جىلىنىڭ باسىندا وبلىس ورتا­لىعى تاراز قالاسىمەن ىرگەلەس جاتقان اۋداننىڭ ورتالىعى سارىكەمەر اۋىلىندا سۋ جاڭا ءبىلىم ورداسى پايدالانۋعا بەرىلدى. وسىلايشا, كوپتەن بەرى ايتىلىپ كەلگەن سارىكەمەرلىكتەردىڭ ماسەلەسى وڭىنان شە­شىلىپ, ءبىلىم الۋشىلار جاڭا ءبىلىم وردا­سىنىڭ تابالدىرىعىنان اتتادى.

پرەزيدەنت تاپسىرماسىنا سايكەس بوي كوتەرگەن جاڭا نىسان راسىندا دا قالا مەكتەپتەرىنەن ءبىر مىسقال كەم ەمەس. جۇر­گى­زىلگەن قۇرىلىس جۇمىسىنىڭ ساپاسى كوڭىلگە قونادى. رەسمي دەرەككە جۇ­گىن­سەك, ءبىلىم ورداسى 600 وقۋشىعا شاق­تالىپ سالىنعان. مۇندا جەتكىنشەكتەردىڭ ساپالى ءبىلىم الۋى ءۇشىن بارلىق جاعداي قاراستىرىلعان. زاماناۋي ۇلگىدەگى كابينەتتەر وزىق تەحنولوگيانىڭ سوڭعى ۇلگىسىمەن جابدىقتالعان.

ناقتىراق ايتساق, جاڭا عيماراتتا 35 وقۋ بولمەسى, 2 سپورت زال, 2 كومپيۋتەر كابينەتى, ءماجىلىس زالى, كىتاپحانا جانە اسحانا, ۇلدار مەن قىزدارعا ارنالعان جەكە شە­بەرحانالار قاراستىرىلعان. سونى­مەن قاتار بالالارعا وقۋلىقتار مەن جەكە زاتتارىن ساقتاۋعا ارنالعان شكاف­تار ورنالاستىرىلىپتى. «كەلەشەك مەك­تەپتەرى» ۇلتتىق جوباسى اياسىندا سالىن­عان جاڭا نىسان تولىققاندى بەينەكامەرامەن قامتىلعان. سونداي-اق جەدەلساتى ورناتىلعان.

اۋدان ورتالىعىندا بوي كوتەرگەن جاڭا نىساندى «Samruk-Kazyna Construction» اق-نىڭ تاپسىرىسى نەگىزىندە «تاراز قۇ­رىلىس ديزاين» جشس سالعان. سەرىكتەستىك 600 وقۋشىعا ارنالعان عيمارات قۇرىلىسىن ۋاقىت تالابىنا ساي جۇرگىزگەنى كوزگە كورىنىپ تۇر.

وبلىس ورتالىعى تاراز قالاسىنداعى ىرگەلى شاعىن اۋدانداردىڭ ءبىرى – «بايتە­رەك». ون جىلدان استام ۋاقىت بۇرىن بوي كوتەرگەن شاعىن اۋداندا مىڭداعان حالىق قونىستانعان. «بايتەرەك» تۇرعىندارى­نىڭ سۇرانىسىن قاناعاتتاندىرۋ ماقساتىن­دا جەرگىلىكتى اتقارۋشى بيلىك قولدان كەلگەنشە جۇمىس اتقارىپ جاتىر. سونىڭ ءبىر كورىنىسى – وتكەن جىلدىڭ ەكىنشى جارتىسىندا پايدالانۋعا بەرىلگەن جاڭا مەكتەپ.

«بايتەرەك» شاعىن اۋدانىندا بوي كوتەرگەن №66 مەكتەپ عيماراتى زاماناۋي ارحيتەكتۋرالىق شەشىممەن سالىنعانىنا ەش كۇمان جوق. الىستان كوزگە شوقتاي باسىلاتىن جاڭا مەكتەپتە وقۋشىلاردىڭ ساپالى ءبىلىم الۋى ءۇشىن بارلىق جاعداي قاراستىرىلعان. 1200 وقۋشىعا شاقتالعان ءبىلىم ورداسى جەرگىلىكتى تۇرعىنداردىڭ كوڭىلىنەن شىقتى.

وبلىس اكىمدىگىنىڭ ءباسپاسوز قىزمەتى كەلتىرگەن دەرەككە جۇگىنسەك, عيماراتتا ينتەراكتيۆتى تاقتامەن قامتىلعان 59 وقۋ كابينەتى بار. سونداي-اق ءبىلىم نىسانى اسحانا, 2 سپورت زال, بىرنەشە زەرتحانالىق كابينەتپەن, جايلى كىتاپحانامەن, ارنايى شەبەرحانالار جانە كوۆوركينگ ورتالىقپەن قامتىلعان. بۇدان بولەك, قوسىمشا ءبىلىم بەرۋ ساباقتارىن وتكىزۋگە ارنالعان كابينەتتەر دە بار. «كەلەشەك مەكتەپ» ۇلتتىق جوباسى اياسىندا سالىنعان عيماراتتا ەرەكشە ءبىلىم بەرۋ قاجەتتىلىگى بار بالالاردى ۋاقىت تالابىنا ساي وقىتۋ ماسەلەسى دە نازاردان تىس قالماعان.

تاراز قالاسىندا جاڭادان بوي كوتەرگەن « ۇلى دالا» شاعىن اۋدانى ەلىمىزدەگى ەڭ ءىرى شاعىن اۋدان ساناتىنا ەنگەن. ون مىڭداعان حالىق شوعىرلانعان شاعىن اۋدانعا بىرنەشە ءبىلىم ورداسى كەرەك ەكەنى بەلگىلى. تۇرعىنداردىڭ سۇرانىسىن ەسكەرگەن جەرگىلىكتى اتقارۋشى بيلىك وتكەن جىلدىڭ اياق تۇسىندا «كەلەشەك مەكتەپ» ۇلتتىق جوباسى اياسىندا №67 مەكتەپتى پايدالانۋعا بەردى. مەملەكەت باسشىسىنىڭ تاپسىرماسى اياسىندا سالىنعان جاڭا نىساندا 1200 وقۋشىنىڭ ءبىلىم الۋىنا مۇمكىندىك بار.

رەسمي دەرەككە زەر سالساق, عيمارات وزىق تەحنولوگيامەن جابدىقتالعان. مۇن­دا وقۋ­شىلاردىڭ ساپالى ءارى قاۋىپسىز ءبى­لىم الۋىنا بارلىق جاعداي جاسالعان. ءبىلىم ور­داسىندا ينتەراكتيۆتى تاقتامەن جابدىق­تال­عان 59 وقۋ كابينەتى, 3 اسحانا, 2 سپورت زال, كى­تاپحانا, 3 زەرتحانا, 2 كومپيۋتەر كابي­نەتى, 3 زەرتحانا جانە 10 كوۆوركينگ ورتا­لىق بار.

«ەڭ ىرگەلى شاعىن اۋدان سانالاتىن « ۇلى دالادا» ۇلكەن مەكتەپتىڭ سالىنعانى كوڭىل قۋانتادى. «كەلەشەك مەكتەپ» ۇلتتىق جوباسى اياسىندا بوي كوتەرگەن جاڭا ءبىلىم ورداسىنىڭ قۇرىلىس جۇمىسىن العاشقى كىرپىشى قالانعان ساتتەن قالت جىبەرمەي قاراپ وتىردىم. ساپاسى كوڭىلگە قونادى. مۇندا ءتورت نەمەرەم ءبىلىم نارىمەن سۋسىنداپ وتىر. زاماناۋي ۇلگىدەگى مەكتەپتىڭ سالىنۋىنا مۇرىندىق بولعان مەملەكەت باسشىسىنا العىستان باسقا ايتارىم جوق», دەيدى « ۇلى دالا» شاعىن اۋدانىنىڭ تۇرعىنى الماش اۋعانباەۆا.

جالپى العاندا, « ۇلى دالا» شاعىن اۋدانىنداعى يگىلىكتى ءىس مۇنىمەن توقتاعان جوق. وسى جىلدىڭ ءساۋىر ايىندا ۇلتتىق جوبا اياسىندا №69 جاڭا مەكتەپ ءبىلىم الۋشىلارعا ەسىگىن ايقارا اشتى. رەسمي دەرەككە سەنسەك, قازىرگى كەزدە مۇندا 1310 بالا ءبىلىم الىپ جاتىر.

جاڭا ۇلگىدە سالىنعان ءبىلىم ۇياسىندا 97 كابينەت بار. سونىمەن قاتار 3 شەبەرحا­نا, 4 كومپيۋتەرلىك سىنىپ, 6 زەرتحانا, حورەوگرافيالىق زال, كوۆوركينگ ورتالىق­تار, 4 سپورت زال بار. جاڭا مەكتەپ جالپى سانى 2000 وقۋشىعا ارنالىپ سالىنعان ەكەن. دەرەككە سەنسەك, مۇندا وقۋشىلاردىڭ شىعارماشىلىق الەۋەتىن ارتتىرۋ ءۇشىن زاماناۋي روبوتتەحنيكا جانە STEM زەرتحانا­لارى قاراستىرىلعان. سونداي-اق ءبىلىم وشاعى تولىققاندى بەي­نەباقىلاۋ جۇيە­سىمەن قامتىلعان. سونىمەن قاتار ەرەكشە قاجەتتىلىگى بار بالالار ءۇشىن پاندۋس, ليفت, سانيتارلىق توراپتار جانە ينكليۋزيۆتى ءبىلىم بەرۋ كابينەتى قاراس­تىرىلعان.

«مەملەكەت باسشىسى قاسىم-جومارت توقاەۆتىڭ تىكەلەي تاپسىرماسى اياسىندا قولعا الىنعان «كەلەشەك مەكتەپ» ۇلتتىق جوباسى ەلىمىزدىڭ بارلىق وڭىرىندە ساتىمەن جۇزەگە اسىرىلىپ جاتىر. وتكەن جىلى وڭىردە بىرنەشە ءبىلىم ورداسى «كەلەشەك مەكتەپ» ۇلتتىق جوباسى شەڭبەرىندە بوي كوتەردى. وسى جىلى تاراز قالاسىنداعى ء«شولدالا» تۇرعىن الابىندا جانە قورداي اۋدانىندا جالپى سانى 3 ءبىلىم بەرۋ نىسانى پايدالانۋعا بەرىلمەك. وڭىردە ءبىلىم بەرۋ سالاسىندا اتقارىلاتىن جۇمىس از ەمەس. ەڭ باستى مىندەت – وقۋشىلاردى ساپالى بىلىممەن قامتۋ», دەيدى ءوڭىر باسشىسى ەربول قاراشوكەەۆ.

وبلىس اكىمدىگىنىڭ ءباسپاسوز قىزمەتى كەلتىرگەن رەسمي دەرەككە جۇگىنسەك, ءوڭىر بو­يىنشا «كەلەشەك مەكتەپتەرى» ۇلتتىق جوباسى اياسىندا 12 مەكتەپ سالۋ جوسپارلانعان. ونىڭ ىشىندە بىرنەشە مەكتەپ وتكەن جىلدارى پايدالانۋعا بەرىلگەن. بۇل جۇمىس وسى جىلى دا ۇزدىكسىز جۇرگىزىلمەك. ناتيجەسىندە, ءۇش اۋىسىمداعى جانە اپاتتى جاعدايداعى مەكتەپتەردىڭ ماسەلەسى تولىعىمەن شەشىمىن تابادى.

جامبىل وبلىسى