مەرەكە وقۋ ورداسىنىڭ الاڭىندا باستالىپ, شاتتىققا تولى مۋزىكامەن ارلەندى. اۋەلى مەكتەپ ديرەكتورى جانار ەرمۇحامبەتوۆا ءبىلىم وشاعىنىڭ قىسقا ۋاقىت ىشىندە قول جەتكىزگەن جەتىستىكتەرىن اتاپ ءوتتى.
ءىس-شارا بارىسىندا مەكتەپ وقۋشىلارىنىڭ وركەسترى «كەلىنشەك» كۇيىن ورىنداپ, 3-4 سىنىپ بالالارى اسەم بي بيلەدى. بي سوڭىندا جەتكىنشەكتەر 109 سانىن بەينەلەپ, مەرەكە ءمانىن ەرەكشە جەتكىزدى. مەكتەپ اۋلاسىنا 109 تال كوشەت وتىرعىزىلدى.
مازمۇندى جيىن اياسىندا مەكتەپ پسيحولوگى ر.مۇحامەدينا مەن ەڭبەك ءپانى مۇعالىمى ن.بايتۇگەلوۆا باستاماسىمەن اشىلعان «كوركەمARU» كلۋبىنىڭ تۇساۋكەسەرى ءوتتى. مۇندا 5-8 سىنىپ قىز بالالارى قولونەر مەن اسپازدىقتىڭ قىر-سىرىن ۇيرەنەدى. كابينەتتى قازاقستاننىڭ ەڭبەك سىڭىرگەن قايراتكەرى, «تەگىڭدى بىلگەن – تەكتىلىك» قوعامدىق بىرلەستىگىنىڭ ءتورايىمى ساۋلە جەلدىباەۆا اشىپ, اق باتاسىن بەردى. سونىمەن قاتار «مەكتەپ تىنىسى» كورمەسىندە وقۋشىلاردىڭ قولىمەن جاساعان روبوتتارى مەن بۇيىمدارى قويىلدى. سونداي-اق جەتكىنشەكتەر ۇلتتىق ويىندار مەن سپورت تۇرلەرىنەن شەبەرلىكتەرىن كورسەتتى. بۇعان كەلگەن قوناقتار دا قاتىستى.
مەرەكە سوڭىندا جينالعان قاۋىم ۇستازدار مەن وقۋشىلاردىڭ كونتسەرتتىك باعدارلاماسىن تاماشالاپ, جىلى اسەرگە بولەندى.
فاريزا ءىزباساروۆا,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
