قازاق كۇرەسىنەن وتكەن رەسپۋبليكالىق تۋرنيردە ەرەسەكتەر تۇيە بالۋان اتاعى ءۇشىن بەلدەسسە, 2008-2009 جىلدارى تۋعان جاسوسىپىرىمدەر 9 سالماق دارەجەسى بويىنشا كۇشىن سىنادى. ەكى كۇنگە ۇلاسقان ءدۇبىرلى دوداعا بارلىق وڭىردەن 187 بالۋان كىلەمگە شىقتى. پاۆلودار وبلىسىنىڭ اكىمى اسايىن بايحانوۆتىڭ قۇتتىقتاۋ سوزىنەن كەيىن, سوعىس ارداگەرىنىڭ ۇلى مارات ءىزباستين, گرەك-ريم كۇرەسىنەن اتلانتا وليمپياداسىنىڭ چەمپيونى يۋري مەلنيچەنكو, قازاق كۇرەسىنەن الەم چەمپيونى, «قازاقستان بارىسى» رەسپۋبليكالىق ءتۋرنيرىنىڭ بىرنەشە مارتە جەڭىمپازى ايبەك نۇعىماروۆ سپورتشىلارعا ساتتىلىك تىلەدى.
وسى وڭىردە قازاق كۇرەسىنىڭ دامۋىنا ۇلەس قوسىپ جۇرگەن بىرقاتار ازاماتتارعا Qazaq Kuresi اسسوتسياتسياسىنىڭ العىس حاتى تابىستالدى.
تۇيە بالۋاندار دوداسىندا پاۆلودار وبلىسىنىڭ بالۋانى مۇحتار دالەلحان ۇلى فينالدا ماڭعىستاۋلىق نۇرداۋلەت جارىلعاپوۆتى جىعىپ, چەمپيون اتاندى. قولا جۇلدە جامبىل وبلىسىنان كۇرەسكەن ايدار بەسكەمپىرگە بۇيىردى. الىپتار تارتىسىنىڭ جەڭىمپازىنا 2 ميلليون, كۇمىس بەلبەۋ يەگەرىنە 1 ميلليون, قولا بەلبەۋ ولجالاعان بالۋانعا 500 مىڭ تەڭگە بەرىلدى.
اسا تارتىستى وتكەن جاسوسپىرىمدەر تارتىسىندا ءى, ءىى جانە ءىىى ورىنداردىڭ يەگەرلەرىنە سىيعا 100 000, 50 000, 30 000 تەڭگە سىياقىعا قوسا مەدال, ديپلوممەن ماراپاتتالدى. ۇزدىكتەردى ماراپاتتاۋدا 60, 65 جانە +82 كگ سالماق دارەجەسىنىڭ جەڭىمپازدارى اباي قۇنانبايعا, سەرعازى قايىركەنوۆكە جانە الىشەر سالىققا ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ, س.تورايعىروۆ ۋنيۆەرسيتەتىنىڭ جانە م.قوزىباەۆ اتىنداعى سولتۇستىك قازاقستان ۋنيۆەرسيتەتىنىڭ وقۋ گرانتتارى تابىستالدى.
ەكىنشى دۇنيەجۇزىلىك سوعىس ارداگەرى رىمتاي ءىزباستى ۇلى پاۆلودار وبلىسىنداعى باياناۋىل اۋىلىنىڭ تۋماسى. ول ءار جىلدارى ءبولىم نۇسقاۋشىسى, اعا ينسپەكتور, باياناۋىل متس پارتيا بيۋروسىنىڭ, «الەكسەەۆ», «الەكساندروۆ», «باياناۋىل» كەڭشارلارى پارتيا كوميتەتتەرىنىڭ حاتشىسى, نۇسقاۋشى-پارتيا ۇيىمداستىرۋشىسى, يدەولوگيالىق ءبولىمىنىڭ مەڭگەرۋشىسى, كاسىپوداق توراعاسى قىزمەتتەرىن اتقارعان. «جاپونيانى جەڭگەنى ءۇشىن», «تىڭ جەرلەردى يگەرگەنى ءۇشىن» مەدالدارىمەن, «1941-1945 جىلدارداعى ۇلى وتان سوعىسىنداعى جەڭىسكە 20 جىل», «1941-1945 جىلدارداعى ۇلى وتان سوعىسىنداعى جەڭىسكە 30 جىل», «1941-1945 جىلدارداعى ۇلى وتان سوعىسىنداعى جەڭىسكە 40 جىل», كەڭەس وداعىنىڭ مارشالى گ.ك.جۋكوۆتىڭ مەرەيتويلىق مەدالدارىمەن ماراپاتتالعان.
