وقۋشىلار جاز ايلارىندا قايدا جۇمىسقا كىرە الادى

جاز – تەك دەمالىس ۋاقىتى ەمەس, العاشقى ەڭبەك تاجىريبەسىن جيناپ, ءوز بەتىمەن تابىس تاۋىپ كورۋگە تاماشا مۇمكىندىك. سۆەتلانا جاقىپوۆانىڭ ايتۋىنشا, ەلىمىزدە ەڭبەك قىزمەتىمەن اينالىسۋعا زاڭ بويىنشا رۇقسات ەتىلگەن 14-تەن 18 جاسقا دەيىنگى وقۋشىلاردىڭ سانى – شامامەن 1,5 ميلليون. ولاردىڭ 26,5 مىڭى – مۇمكىندىگى شەكتەۋلى بالالار.

قازىرگى تاڭدا 24,3 مىڭعا جۋىق وقۋشى جازعى جۇمىسپەن قامتىلعان. ەڭ كوپ جۇمىس ىستەيتىن سالالار – ساۋدا (5,3 مىڭ بالا) جانە تۇرعىن ءۇي مەن قوعامدىق تاماقتانۋ قىزمەتتەرى (3,6 مىڭ). بۇل كورسەتكىش جىل سايىن ارتىپ كەلەدى.

مينيستر بۇل باعىتتا ارنايى ونلاين قۇرالداردىڭ ىسكە قوسىلعانىن ايتتى. اتاپ ايتقاندا, ەلەكتروندى ەڭبەك بيرجاسىندا «مەنىڭ جازعى كانيكۋلدارىم» اتتى ءبولىم اشىلىپ, 14 جاستان اسقان وقۋشىلارعا جەكە كابينەت اشىپ, تۇيىندەمە قالدىرۋ جانە وزىنە ىڭعايلى بوس جۇمىس ورنىن تاڭداۋ مۇمكىندىگى بەرىلگەن. تىركەلۋ اتا-انالارى نەمەسە قامقورشىلارى ارقىلى جۇزەگە اسادى.

سونداي-اق, Skills.Enbek پلاتفورماسىندا بالالار ءتۇرلى ماماندىقتار بويىنشا جاڭا داعدىلاردى ۇيرەنە الادى. قازىر بۇل جۇيەدە 1 294 كۋرس بار, ونىڭ 322-ءسى – تەگىن, ال 67-ءسى – ەرەكشە قاجەتتىلىگى بار جاستارعا بەيىمدەلگەن.

سۆەتلانا جاقىپوۆا جازعى دەمالىس كەزىندە جەرگىلىكتى اكىمدىكتەر تاراپىنان قوعامدىق جۇمىستاردى ۇيىمداستىرۋ تاجىريبەسى جالعاساتىنىن دا اتاپ ءوتتى. بۇل جۇمىستار ارنايى دايىندىقتى قاجەت ەتپەيدى, يكەمدى كەستە بويىنشا ورىندالادى جانە ەكونوميكالىق, الەۋمەتتىك نەمەسە ەكولوگيالىق پايدا اكەلۋى ءتيىس. مۇنداي جۇمىس ءۇشىن وقۋشىلارعا اي سايىن كەمىندە 24 اەك (2025 جىلى – 94 368 تەڭگە) كولەمىندە جالاقى تولەنەدى.

ء«بىز وقۋشىلارعا جازعى دەمالىس كەزىندە جۇمىس ىستەۋگە مۇمكىندىك بەرىپ قانا قويماي, ولارعا تەڭ جاعداي جاساۋعا, يكەمدى ەڭبەك شارتتارىن ۇسىنۋعا تىرىسامىز. بۇل – ولاردىڭ بولاشاق ماماندىق تاڭداۋى مەن جەكە دامۋىنا ۇلكەن سەرپىن بەرەدى», دەدى مينيستر.

وسىلايشا, مەملەكەت تاراپىنان جاسوسپىرىمدەرگە جۇمىس ىستەۋگە, ءبىلىم الۋعا جانە ءوزىن دامىتۋعا ناقتى جاعداي جاسالىپ وتىر. بۇل – ەڭبەككە العاشقى قادام, ومىرگە دايىندىقتىڭ ءبىر بولىگى.

جانەل تولەۋبەكوۆا, ەۇۋ 2 كۋرس ستۋدەنتى