كەشكى اۋىسىمعا ءتۇسىپ, بەكىتىلگەن اۋماقتارىن ارالاپ جۇرگەن ءتارتىپ ساقشىلارى اراي شاعىن اۋدانىنداعى جاستىلەك كوشەسىندەگى ۇيلەردىڭ بىرىنەن شىققان قويۋ ءتۇتىندى بايقادى.
جاعدايدى باعامداپ ۇلگەرگەن پوليتسەيلەر دەرەۋ ءورت ءسوندىرۋ قىزمەتىنە حابارلاسىپ, وقيعا ورنىنا جەدەل جەتىپتى. ىسكە دەرەۋ كىرىسىپ, باسپاناسىن ءورت شالعانىن بايقاماي الاڭسىز ۇيىقتاپ جاتقان 66 جاستاعى قاريا مەن نەمەرەسىن الىپ شىعادى. ولار كورشى ءۇيدىڭ تۇرعىندارىن دا دەر كەزىندە وياتىپ, قاۋىپتىڭ الدىن الدى.
ءورت سوندىرۋشىلەر قىزىل جالىندى اۋىزدىقتاپ جاتقاندا پوليتسيا قىزمەتكەرلەرى قوعامدىق ءتارتىپتى قامتاماسىز ەتىپ تۇرادى. ارتىنشا كەزەكشىلىكتەرىن جالعاستىرىپ, پاترۋلدەۋگە قايتا كىرىسكەن قوس ساقشىعا ورتتەن امان قالعان تۇرعىندار العىس ايتتى.
