بۇل – كوكتەم مەزگىلىنە ارنالعان, تابيعاتتى ءتىرى جانە نۇرلى كەڭىستىك رەتىندە قابىلداۋ يدەياسىن جالعاستىراتىن ەرەكشە تۋىندىلار. ءا.قاستەەۆ اتىنداعى مەملەكەتتىك ونەر مۋزەيىندە جاساقتالعان ەكسپوزيتسياعا سۋرەتشىنىڭ 2008–2025 جىلدار ارالىعىندا دۇنيەگە كەلگەن 21 كەسكىندەمەسى ەنگىزىلگەن. ولاردىڭ اراسىندا پورترەتتەر, پەيزاجدار, گۇلدى كومپوزيتسيالار جانە اللەگوريالىق تۋىندىلار بار. كورمەدەگى ءاربىر جۇمىس – كوكتەمنىڭ, ونىڭ جارىعىنىڭ, تىنىسىنىڭ جەكە كۇندەلىگى
ىسپەتتى.
ينديرا بادامباەۆا – كەسكىندەمە جانە گرافيكا سالاسىندا تىنىمسىز ەڭبەكتەنىپ كەلە جاتقان كوپ قىرلى دارىن يەسى. ونىڭ ءستيلى اكادەميالىق مەكتەپتىڭ, تابيعاتقا رۋحاني كاتەگوريا رەتىندە قىزىعۋشىلىقتىڭ جانە جارىققا دەگەن ۇمتىلىستىڭ توعىسقان تۇسىندا قالىپتاسقان. سۋرەتشى پەيزاج بەن ناتيۋرمورتقا دا, ميفولوگيالىق بەينەلەر مەن فورمانىڭ ىشكى قوزعالىسى وقىلاتىن تۇجىرىمدامالىق سەريالار جاساۋعا دا قىزىعۋشىلىق تانىتادى.
«ماڭگىلىك كوكتەم» كورمەسى – ۋاقىتتان تىس كەڭىستىكتىڭ ءرامىزى رەتىندە باقتىڭ بەينەسىنە ارنالعان كوركەم جانە كەسكىندەمەلىك اينالىم. گۇلدەر (گۇلشەتەن, باقباق, تۇيمەداق, لالاگۇل) ساندىك نەمەسە تۇرمىستىق ەلەمەنتتەر رەتىندە ەمەس, جارىق پەن تىنىسى سىرتىنا تەپكەن ءتىرى جاراتىلىس رەتىندە ۇسىنىلعان. ولاردىڭ بەينەسى جانرلىق شەڭبەرلەردەن تىس, بۇل تۋىندىلاردى تىنىشتىق پەن ىشكى ويانۋدىڭ تۇتاس اعىنى رەتىندە دە قابىلداۋعا بولادى. تۇستىك پاليترا جۇمساق رەڭكتەردەن قانىق جاسىل جانە اشىق التىن تۇستەس بوياۋعا دەيىن قۇبىلادى. تۇستەردى ويناتا ءبىلۋ شەبەرلىگى فرانتسۋز يمپرەسسيونيزمىنىڭ, ەڭ الدىمەن, كلود مونەنىڭ اسەرىن كورسەتەدى. دەگەنمەن, ينديرا وتكىنشى ساتتىلىككە ەمەس, تۇراقتىلىق پەن ىشكى ۇندەستىككە ۇمتىلادى», – دەيدى كورمەنىڭ جەتەكشىسى س.سىرعاباەۆ.
سۋرەتشىنىڭ ءوزى: «مونە جاراتۋشىعا جاقىن», – دەپ اتاپ ءوتىپ, كەسكىندەمە ارقىلى ءتىرى باستاۋعا جاقىنداۋعا بولاتىنىن ءوز تالپىنىسى نەگىزىندە كورسەتەدى.
ينديرا بادامباەۆا – بىرنەشە مارتە رەسپۋبليكالىق جانە حالىقارالىق جوبالارعا قاتىسقان, «گۇلدەر ەلى» اتتى ارت-بوياۋ كىتابىنىڭ جانە «Harper’s Bazaar Kazakhstan» جۋرنالى مۇقاباسىنىڭ اۆتورى, سونداي-اق «كوك تۋ» بەينەبايانى مەن «لاتىن قارپىندەگى قازاق ءالىپبيى» جوباسى سياقتى بىرقاتار مادەني باستامالاردىڭ تەڭ اۆتورى. سۋرەتشىنىڭ جۇمىستارى ۇلىبريتانيا, يسپانيا, يتاليا, گەرمانيا, اقش جانە باسقا دا ەلدەردىڭ جەكە كوللەكتسيالارىندا ساقتاۋلى.
الماتى
