بىلتىر توپشىسى سىنعاندا قاناتىنان قان ساۋلاپ جاتسا دا قايتا ۇشپاق بولىپ الاسۇرعان. توبەسىنەن بىرنەشە رەت اينالىپ ءوتىپ, اقىرى ۇزاي-ۇزاي كوككە ءسىڭىپ كەتكەن ءبىر توپ قازدىڭ سوڭىنان جانۇشىرا جۇگىرگەنىن عانا ەمىس-ەمىس بىلەدى. ال قىستاي ءوزى قامالىپ جاتقان تار قاپاسقا قالاي تۇسكەنى ەسىندە جوق.
كۇزدىڭ قارا سۋىعىندا ۇشارعا قاناتى بولماي ءولىمشى بولعان قۇس ەركەسىن مەيىرىمدى جاندار جىلى جەرگە پانالاتىپ, اۋا رايى جىلىنعان سوڭ, تابيعات اياسىنا بوساتقان.
«كۇزدە بالالارىم كولىكپەن كەلە جاتقاندا, جالپىلداپ جولعا شىققان عوي. ءبىر جاق قاناتى قانعا بويالىپتى. بۇل قۇس قاتتى ۇشىپ كەلە جاتىپ نە باعانعا, نە ەلەكتر سىمىنا سوعىلعان نەمەسە تۇلكىگە جەم بولا جازداعان بولۋ كەرەك. قىستاي جىلى جەرگە قاماپ, جەم-سۋىن بەرىپ باقتىق. قاز, ۇيرەك سياقتى ەمەس, قولعا ۇيرەنبەيدى ەكەن. الدىنداعى جەمىن جاڭالايىق دەسەك, قاناتىن كوتەرە كەرىپ ىسىلداپ جولاتپاي ايبات شەگىپ تۇرىپ الادى. بۇل ەندى تاعى قۇس قوي. قانشا ماپەلەپ كۇتسەڭ دە ادامعا باۋىر باسپايدى ەكەن. تابيعات اياسىندا ەركىن وسكەن قۇسقا جەمدە تۇرۋ – تار قاپاسقا قامالعانمەن بىردەي عوي. كولگە ەركىنە جىبەرسەك تە, اندا-ساندا سىرتىنان باقىلاپ قويامىز. وتكەندە جانىنا التى اققۋ قونعان. بىرنەشە كۇننەن سوڭ ولار ۇشىپ كەتتى دە, بۇل قالىپ قويدى. ەسىلگە اپارىپ, مال دارىگەرىنە دە كورسەتتىك. دارىگەر بۇل قۇس ەندى ۇشا المايدى دەدى. بۇل اققۋعا قۇس الەمىنە جاناشىر ورنيتولوگ مامانداردىڭ قامقورلىعى كەرەك. بالكىم, سول كىسىلەر ەمدەپ كورەر, ءتىپتى بولماسا, زووپارك سياقتى مەكەمەلەرگە وتكىزەر», دەيدى جارالى اققۋدى قىستاي باعىپ شىققان قالا تۇرعىنى بولات ابدىبەكوۆ.
قازىر جارالى اققۋ ايدىن كولدى ەركىن شارلاپ, ازىعىن ءوزى تاۋىپ ءجۇر. الايدا التى ايدان سوڭ قاھارىن سۇيرەتىپ قىس كەلسە, كۇنى نە بولادى, بەلگىسىز. بولات اعا «ەشكىمنەن قايىر بولماسا, تاعى ءبىر قىستاتىپ شىعارمىن» دەپ وتىر. الايدا اۋقىمى شامامەن 200 گەكتار بولاتىن ايدىندا جالعىز جۇزگەن كيەلى قۇس وڭايلىقپەن ۇستاتا قويار ما ەكەن؟
قوستاناي وبلىسى
