قازاقستاننىڭ بارلىق وڭىرلەرىندە, قالا مەن اۋىلدىق ەلدى مەكەندەردە تەرەك وتىرعىزۋعا ارنالعان جاپپاي شارالار ۇيىمداستىرىلدى. ءداستۇرلى تۇردە بۇل اكتسيا بۇرىن ساياباقتارداعى «وتباسى – باقىت مەكەنى» اتاۋىمەن اتالعان اللەيالاردا وتەدى.
جىل سايىن وسى اللەيالارعا جاڭا اعاشتار وتىرعىزىلادى. بۇل – تاتۋ ءارى بەرىك قازاقستاندىق وتباسىلاردىڭ سيمۆولى ىسپەتتەس.
اكتسيانىڭ باستى ماقساتى — وتباسىلىق داستۇرلەردىڭ ماڭىزىن كورسەتۋ, سونداي-اق وتباسى ينستيتۋتىن نىعايتۋ, تابيعاتتى قورعاۋ جانە قوعامدىق باستامالاردى دامىتۋ ارقىلى بولاشاق ۇرپاققا قامقورلىق كورسەتۋ.
ءىس-شاراعا تانىمال قوعام قايراتكەرلەرى, قوعام بەلسەندىلەرى, سونداي-اق وتكەن جىلدارداعى «مەرەيلى وتباسى» بايقاۋىنىڭ جەڭىمپازدارى قاتىستى.
