ماجىلىستە ازاماتتىق قورعاۋ ماسەلەلەرى بويىنشا زاڭ قابىلداندى

دەپۋتات ايان زەينولليننىڭ مالىمدەۋىنشە, زاڭ جوباسىنىڭ نەگىزگى نورمالارى مىناداي باعىتتارعا ارنالعان:

• ازاماتتىق قورعاۋ جۇيەسىن كۇشەيتۋ جانە قىزمەتكەرلەردىڭ مارتەبەسىن ارتتىرۋ;

• مەملەكەتتىك ماتەريالدىق رەزەرۆ جۇيەسىن ورتالىقسىزداندىرۋ;

• ءورت قاۋىپسىزدىگىنە باقىلاۋدى قايتا ەنگىزۋ;

• سەيسميكالىق قاۋىپسىزدىكتى قامتاماسىز ەتۋ;

• ومىرگە قاۋىپ توندىرەتىن قول جەتۋى قيىن ايماقتارعا ساياحات كەزىندە مارشرۋتتار تۋرالى حابارلاۋ ءتارتىبىن بەلگىلەۋ.

زاڭ جوباسىنىڭ ەكىنشى وقىلىمىنا دايىندىق بارىسىندا ونىڭ نورمالارى دەپۋتاتتار تاراپىنان ەداۋىر قايتا قارالدى. سونىمەن قاتار, كەلەسى جاڭا باستامالار ەنگىزىلدى:

• ادامدار كوپ جينالاتىن نىسانداردىڭ يەلەرىنە ءورت سالدارىنان ءۇشىنشى تۇلعالارعا زيان كەلتىرىلگەن جاعدايدا ازاماتتىق-قۇقىقتىق جاۋاپكەرشىلىگىن مىندەتتى ساقتاندىرۋ;

• توتەنشە جاعدايلاردىڭ الدىن الۋ بويىنشا ورتالىق جانە جەرگىلىكتى اتقارۋشى ورگانداردىڭ قىزمەتىنە مەملەكەتتىك باقىلاۋ جۇرگىزۋ;

• جاھاندىق نەمەسە وڭىرلىك اۋقىمداعى توتەنشە جاعدايلاردى جويۋ بويىنشا رەسپۋبليكالىق جەدەل شتاب قۇرۋ جانە ونىڭ جۇمىس ءتارتىبىن ايقىنداۋ;

• ءورتتىڭ الدىن الۋ جانە ءسوندىرۋ ءىس-شارالارىنا ەرىكتى ءورت ءسوندىرۋشى رەتىندە تارتىلعان قىزمەتكەرلەردىڭ ەڭبەك كەپىلدىكتەرىن ساقتاۋ;

• ەرىكتى ءورت سوندىرۋشىلەر جاراقات العان, اۋرۋعا شالدىققان جاعدايدا ەڭ تومەنگى جالاقىدان كەم ەمەس مولشەردە وتەماقى الۋ قۇقىعىن بەكىتۋ;

• ينفلياتسيا مەن ۆاليۋتا تاۋەكەلدەرىن ەسكەرە وتىرىپ, ەلەكتر ەنەرگياسى ءوندىرىسى سالاسىنىڭ ينۆەستيتسيالىق تارتىمدىلىعىن ارتتىرۋ ءۇشىن ەلەكتر قۋاتىن ۇستاپ تۇرۋ قىزمەتىنە ارنالعان جەكە تاريفتەردى جىل سايىن يندەكستەۋ;

• مەملەكەتتىك م ۇلىكتى تىكەلەي ساتۋ ارقىلى جەكەشەلەندىرۋ نورمالارىن الىپ تاستاۋ;

• اففيليرلەنگەن تۇلعالاردىڭ اۋكتسيوندارعا جانە ساۋدا-ساتتىقتارعا قاتىسۋىنا تىيىم سالۋ ارقىلى جەكەشەلەندىرۋ مەحانيزمىن ايقىنداۋ;

• جارعىلىق كاپيتالىندا مەملەكەتتىڭ 100% قاتىسۋى بار اكتسيونەرلىك قوعامداردا كورپوراتيۆتىك باسقارۋ جۇيەسىن جەتىلدىرۋ.

سونىمەن قاتار, زاڭدا ازاماتتىق قورعاۋ ورگاندارى قىزمەتكەرلەرىنىڭ كەلەسى قۇقىقتارى بەكىتىلەدى:

• تۇرعىن ۇيگە مۇقتاج قىزمەتكەرلەرگە تۇرعىن ءۇي تولەمدەرىن الۋ;

• قىزمەتتىك تۇرعىن ءۇيدى جەكەشەلەندىرۋ;

• قىزمەتتىك اۋىسىم كەزىندە وتباسىن كوشىرۋ مەن جول شىعىندارىن وتەۋ ءۇشىن كوتەرمە جاردەماقىلار مەن وتەماقىلار الۋ.

سونداي-اق, توتەنشە جاعداي, اسكەري نەمەسە ەرەكشە جاعداي كەزىندە, سونداي-اق تەرروريزمگە قارسى وپەراتسيالار جۇرگىزۋ كەزىندە قىزمەت ەتكەندەرگە ءۇش ەسە اقشالاي تولەم مەن ءبىر كۇن قىزمەت ءۇشىن ءۇش كۇن ەڭبەك ءوتىلى ەسەبىندە ەسەپتەلەتىن ۇستەمەاقىلار قاراستىرىلعان.