جاڭا نىساننىڭ لەنتاسى جەڭىستىڭ 80 جىلدىعى مەن باۋىرجان مومىش ۇلىنىڭ 115 جىلدىعىنا وراي قيىلدى. اشىلۋ راسىمىنە جامبىل وبلىسىنىڭ اكىمى ەربول قاراشوكەەۆ, ۇلى وتان سوعىسىنىڭ ارداگەرلەرى مەن تىل ەڭبەككەرلەرى, حالىق قاھارمانى, گەنەرال-لەيتەنانت باقىتجان ەرتاەۆ, قر پارلامەنتى ءماجىلىسىنىڭ دەپۋتاتتارى جانە ءوڭىر تۇرعىندارى قاتىستى. قوناقتار مۋزەيدى ارالاپ, تاۋ تۇلعانىڭ ءومىر جولى مەن قاھارماندىق بەينەسىن, سونداي-اق سوعىس جىلدارىنداعى ەرلىك شەجىرەسىن تاماشالادى.
كورمەگە باۋىرجان مومىش ۇلىنىڭ بالالىق شاعى, اسكەري قىزمەتى, وتباسى جايلى تىڭ دەرەكتەر, سونداي-اق جەكە زاتتارى مەن قۇجاتتارى قويىلعان. جادىگەرلەر قاتارىندا پولكوۆنيك شەنىندەگى شينەلى, باتىردىڭ ءوزى سىزعان اسكەري كارتا, سونداي-اق «ۇشقان ۇيا» مەن «ارتىمىزدا ماسكەۋ» شىعارمالارىن جازعان قالامى مەن سياساۋىتى دا ورنالاستىرىلعان.
جامبىل وبلىستىق تاريحي-ولكەتانۋ مۋزەيىنە باتىردىڭ ءوزى تارتۋ ەتكەن ماۋزەرى, كەڭەس وداعىنىڭ باتىرى التىن جۇلدىزى مەن لەنين وردەنىنىڭ كوشىرمەلەرى, ايداھار بەينەلەنگەن قىلىشى, سونداي-اق سيرەك كىتاپتارى مەن سۋرەتتەرى دە قويىلعان.
ودان بولەك, بەيبىت كۇندە كيگەن كيىمدەرى مەن ىدىس-اياقتارى, كۇمىس قاسىقتار, اعاش توستاعاندار, قىمىز ءشومىشى, شاي ىشەتىن ىدىستار مەن دومبىراسى كورمەنىڭ ءسانىن كىرگىزىپ تۇر. باتىردىڭ ءوزى ويعان ورنەكتەردەن تۇراتىن البوم, قۇرمەت گراموتاسى, كەڭەس وداعىنىڭ باتىرى اتاعىن بەرۋ تۋرالى جارلىق پەن وزگە دە ماراپاتتاۋ قۇجاتتارى دا ەكسپوزيتسيادان ورىن العان.
كورمەنىڭ بىرەگەي جادىگەرى – باۋىرجان مومىش ۇلى قىزىل ارميا قاتارىنا العاش شاقىرىلعان 1932 جىلى جانە زاپاسقا شىعىپ, ەلگە ورالعان 1956 جىلى وزىمەن بىرگە بولعان چەمودان مەن سوعىس كەزىندەگى باتالون, پولك, ديۆيزيانىڭ قۇپيا قۇجاتتارى ساقتالعان تەمىر سەيف.
سونداي-اق كورمەدەن باتىر كيگەن شينەل, ەتىك, پاپاحا جانە شىعارماشىلىققا بەت بۇرعان كەزەڭدەگى 70-تەن استام قولونەر تۋىندىلارى – ويۋلانعان فيگۋرالار ۇسىنىلعان.
تۇپنۇسقادا تاحاۋي احتانوۆ پەن ءابدىلدا تاجىباەۆ سەكىلدى قازاق ادەبيەتىنىڭ كورنەكتى وكىلدەرى وتىرعان ۇستەلى, باتىردىڭ سوعىس جىلدارىنان بەرى قاسىندا بولعان ۇستەل شامى, كومپاسى, ساعاتى مەن فورتەپيانوسى دا كەلۋشىلەردىڭ ەرەكشە قىزىعۋشىلىعىن تۋدىردى.
تاراز
