ساپاردىڭ باستى ماقساتى — وتاندىق سوت جۇيەسى ماماندارىنىڭ كاسىبي دامۋىن قامتاماسىز ەتۋ جانە حالىقارالىق اكادەميالىق ىنتىماقتاستىقتى نىعايتۋ.
رەسمي دەلەگاتسيا قۇرامىندا سوت اكىمشىلىگىنىڭ باسشىسى نايل احمەتزاكيروۆ تا بولدى. كەزدەسۋلەر بارىسىندا سۋديالار كورپۋسى ءۇشىن ارنايى تاعىلىمداما باعدارلامالارىن ۇيىمداستىرۋ ماسەلەلەرى قارالدى.
دارەم ۋنيۆەرسيتەتى جانە حالىقارالىق Advocacy & Advisory International ورتالىعىنىڭ باسشىلىعىمەن وتكەن كەلىسسوزدەر ناتيجەسىندە قازاقستاندىق سۋديالار ءۇشىن «بولاشاق» باعدارلاماسى شەڭبەرىندە شەتەلدىك تاعىلىمدامالاردان ءوتۋ مۇمكىندىگى قاراستىرىلدى. ءتيىستى مەموراندۋمدارعا قول قويىلدى.
سونىمەن قاتار, جوعارعى سوت توراعاسى ADR-ODR International ۇيىمىنىڭ نەگىزىن قالاۋشى راحيم چامدجيمەن جۇزدەسىپ, تسيفرلىق داۋلاردى شەشۋ جانە ونلاين مەدياتسيا سالاسىنداعى وزىق تاجىريبەلەردى تالقىلادى. بۇل ادىستەردى قازاقستاندىق سۋديالاردى دايارلاۋ جانە قايتا وقىتۋ جۇيەسىنە ەنگىزۋ جايى كەڭىنەن ءسوز بولدى.
University of Law ۋنيۆەرسيتەتىندە وتكەن كەلىسسوزدەر اياسىندا تاراپتار ۇزاق مەرزىمدى ىنتىماقتاستىق تۋرالى ۋاعدالاستى.
كاسىبي ءبىلىم بەرۋدىڭ ماڭىزدىلىعىن اتاپ وتكەن اسلامبەك مەرعاليەۆ قازاقستان سوت جۇيەسىنىڭ ستراتەگيالىق مىندەتى – جاھاندىق قۇقىقتىق كەڭىستىككە ينتەگراتسيالاۋ ارقىلى كادرلىق الەۋەتتى دامىتۋ ەكەنىن ايتتى.
