فوتو: اقوردا
2024 – 2025 جىلدارى اتاپ وتىلەتىن ۆەتنامنىڭ كورنەكتى پارتيا جانە مەملەكەت باسشىسى حو شي ءميننىڭ قازاقستانعا رەسمي ساپارىنىڭ 65 جىلدىعىنا وراي, 2027 جىلى اتاپ وتىلەتىن قازاقستان مەن ۆەتنام اراسىنداعى ديپلوماتيالىق قارىم-قاتىناستاردىڭ 35 جىلدىعى قارساڭىندا, قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ شاقىرۋىمەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام 2025 جىلعى 6 – 7 مامىردا قازاقستان رەسپۋبليكاسىنا مەملەكەتتىك ساپارمەن كەلدى.
ساپار بارىسىندا باس حاتشى تو لام پرەزيدەنت قاسىم-جومارت توقاەۆپەن كەلىسسوزدەر جۇرگىزىپ, سونداي-اق قازاقستان رەسپۋبليكاسىنىڭ باسقا دا رەسمي تۇلعالارىمەن كەزدەسۋلەر وتكىزدى.
ەكى ەلدىڭ كوشباسشىلارى (بۇدان ءارى – تاراپتار) قازاقستان مەن ۆەتنام اراسىنداعى سوڭعى جىلدارى بەلسەندى تۇردە كەڭەيىپ, نىعايىپ كەلە جاتقان ءداستۇرلى دوستىق پەن ىنتىماقتاستىققا جوعارى باعا بەردى.
بولاشاقتا ەكىجاقتى بايلانىستاردى دامىتۋ, سونداي-اق ءوزارا قىزىعۋشىلىق تۋدىراتىن وڭىرلىك جانە حالىقارالىق ماسەلەلەر بويىنشا مازمۇندى جانە جان-جاقتى تالقىلاۋلار وتكىزدى.
قازاقستان مەن ۆەتنام ءبىر-بىرىنە ءوز وڭىرلەرىندەگى اسا ماڭىزدى سەرىكتەس ەكەنىن راستادى.
قازاقستان مەن ۆەتنام اراسىنداعى ءتۇرلى سالالارداعى ءوزارا ءتيىمدى ىنتىماقتاستىقتى كەڭەيتۋگە كەلىستى.
جاقىن بولاشاقتا ەكى ەل اراسىنداعى ەكىجاقتى قاتىناستاردى نىعايتۋ مەن ودان ءارى دامىتۋدىڭ ماڭىزدىلىعىن اتاپ ءوتتى.
قازاقستان رەسپۋبليكاسى مەن ۆەتنام سوتسياليستىك رەسپۋبليكاسى حالىقتارى اراسىنداعى جىلى بايلانىستاردىڭ نەگىزىندە ەكى ەل اراسىندا بەرىك, وڭ جانە كوپ قىرلى قارىم-قاتىناس قالىپتاستى.
تاراپتار:
قازاقستان-ۆەتنام قاتىناستارىن دامىتۋ مەن تەرەڭدەتۋ ەكى حالىقتىڭ ورتاق مۇددەلەرىنە ساي كەلەتىندىگىمەن, وڭىردە جانە الەمدە بەيبىتشىلىكتى, تۇراقتىلىق پەن دامۋدى قامتاماسىز ەتۋگە ەلەۋلى ۇلەس قوساتىندىعىمەن كەلىستى.
ەكىجاقتى قاتىناستاردى ستراتەگيالىق سەرىكتەستىك دەڭگەيىنە كوتەرىپ, ىنتىماقتاستىقتى ارتتىرۋدى تومەندەگىدەي سيپاتتا ودان ءارى جالعاستىرادى.
I. ساياسي ىنتىماقتاستىق پەن ديپلوماتيانى نىعايتۋ
تاراپتار:
پارتيا, مەملەكەت, ۇكىمەت جانە پارلامەنت ارنالارى بويىنشا بارلىق دەڭگەيدە دەلەگاتسيالار الماسۋعا جانە بايلانىستاردى جانداندىرۋعا;
قازاقستان مەن ۆەتنام حالىقتارى اراسىنداعى تىعىز قارىم-قاتىناستى كەڭەيتۋدى قولداۋعا جانە ەكى ەلدىڭ مينيسترلىكتەرى, ۆەدومستۆولارى مەن جەرگىلىكتى بيلىك ورگاندارى اراسىنداعى ىنتىماقتاستىقتىڭ جاڭا نىساندارىن قۇرۋ تۋرالى ماسەلەنى قاراستىرۋعا كەلىستى.
تاراپتار:
دەلەگاتسيا الماسۋدى ۇلعايتۋدى, اسىرەسە اعا باسشىلار اراسىندا, ەكى ەل سەرىكتەستىگىنىڭ جاڭا شەڭبەرىنە سايكەس بەيىندى كوميتەتتەر, جاس دەپۋتاتتار مەن ايەل پارلامەنتشىلەر توپتارى اراسىندا ەكىجاقتى جانە كوپجاقتى بايلانىستاردى قوسا العاندا, زاڭ شىعارۋشى ورگاندار اراسىنداعى ىنتىماقتاستىقتى نىعايتۋعا;
جاقىن ارادا ەكى زاڭ شىعارۋشى ورگان اراسىنداعى ىنتىماقتاستىق تۋرالى كەلىسىمگە قول قويۋ مۇمكىندىگىن قاراستىرۋعا;
سىرتقى ىستەر مينيسترلەرىنىڭ ورىنباسارلارى دەڭگەيىندە ساياسي كونسۋلتاتسيالاردىڭ تيىمدىلىگىن ارتتىرۋعا كەلىستى.
ەكىجاقتى ىنتىماقتاستىق, سىرتقى ساياسات ماسەلەلەرى, سونداي-اق ءوزارا قىزىعۋشىلىق تۋدىراتىن وڭىرلىك جانە حالىقارالىق پروبلەمالار بويىنشا تۇراقتى پىكىر الماسۋدىڭ ماڭىزدىلىعىن اتاپ ءوتتى.
II. ۇلتتىق قورعانىس, قاۋىپسىزدىك جانە قۇقىق سالاسىنداعى ىنتىماقتاستىقتى كەڭەيتۋ
ۇلتتىق قورعانىس جانە قاۋىپسىزدىك
ەكى ەلدىڭ كوشباسشىلارى قورعانىس جانە قاۋىپسىزدىك سالاسىنداعى ىنتىماقتاستىقتى جولعا قويۋ جولدارىن قاراستىرۋعا;
قورعانىس جانە قاۋىپسىزدىك سالاسىنداعى ىنتىماقتاستىق تۋرالى كەلىسىمدەرگە قول قويۋعا ۇمتىلا وتىرىپ, ىنتىماقتاستىق شەڭبەرىن نىعايتۋعا جاردەمدەسۋگە, سونداي-اق كادرلاردى دايارلاۋ جانە بۇۇ بىتىمگەرشىلىك وپەراتسيالارى سالاسىنداعى ىنتىماقتاستىق جاساۋ مۇمكىندىكتەرىن زەردەلەۋگە كەلىستى.
تاراپتار قول قويىلعان ىنتىماقتاستىق تۋرالى كەلىسىمدەردىڭ تيىمدىلىگىن ارتتىرۋدىڭ ماڭىزدىلىعىن اتاپ ءوتتى.
ەكى ەلدىڭ كوشباسشىلارى قاۋىپسىزدىك سالاسىنداعى جانە قىلمىسقا قارسى كۇرەس ماسەلەلەرىندەگى ىنتىماقتاستىق تۋرالى كەلىسىمدەرگە قول قويۋ, ىنتىماقتاستىقتى نىعايتۋ, اقپارات الماسۋ جانە قورعانىس تەحنولوگيالارىن بەرۋ جونىندەگى كەلىسسوزدەردى ىلگەرىلەتۋگە;
ەكى ەلدىڭ ۇلتتىق مۇددەلەرى مەن قاۋىپسىزدىگىنە بايلانىستى ماسەلەلەردى باعالاۋ مەن بولجاۋدا ىنتىماقتاسۋعا كەلىستى.
سوت تورەلىگى
تاراپتار سوت تورەلىگى سالاسىنداعى ۇيلەستىرۋ مەن ىنتىماقتاستىقتى نىعايتۋعا, قول قويىلعان ىنتىماقتاستىق تۋرالى كەلىسىمدەردى ءتيىمدى ورىنداۋعا جانە جاڭا قۇجاتتارعا قول قويۋ مۇمكىندىگىن زەردەلەۋگە كەلىستى;
سىبايلاس جەمقورلىقتىڭ الدىن الۋ مەن وعان قارسى كۇرەستىڭ ماڭىزدىلىعىن راستادى;
اقپارات الماسۋ, الەۋەتتى ارتتىرۋ جانە مەملەكەتتىك باسقارۋدا اشىقتىق پەن ادالدىقتى ىلگەرىلەتۋ ارقىلى ىنتىماقتاستىقتى نىعايتۋعا كەلىستى.
III. ەكونوميكالىق, ساۋدا, ينۆەستيتسيالىق جانە قارجىلىق ىنتىماقتاستىقتى كەڭەيتۋ
تاراپتار ەكونوميكالىق ىنتىماقتاستىقتى نىسانالى, ءتيىمدى جانە جان-جاقتى دامىتۋعا كەلىستى;
قول قويىلعان ىنتىماقتاستىق تۋرالى كەلىسىمدەردى ىسكە اسىرۋدى جالعاستىرۋدىڭ ماڭىزدىلىعىن اتاپ ءوتتى;
ساۋدا-ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيانىڭ تيىمدىلىگىن ارتتىرۋ جونىندەگى كۇش-جىگەردى قۇپتادى.
قازاقستان رەسپۋبليكاسىنىڭ سىرتقى ساۋدا پالاتاسى مەن ۆەتنام ساۋدا-ونەركاسىپ پالاتاسى اراسىنداعى ىنتىماقتاستىق تۋرالى كەلىسىم شەڭبەرىندە ساۋدانى دامىتۋعا جاردەمدەسۋ جانە ىسكەرلىك بايلانىستاردى نىعايتۋ ءۇشىن قازاقستان مەن ۆەتنام بىرلەسكەن ىسكەرلىك كەڭەسىنىڭ قۇرىلۋى مەن ونىڭ ءرولىن ىلگەرىلەتۋدى قولدادى;
ينۆەستيتسيالىق جانە ىسكەرلىك احۋالدى جاقسارتۋعا, ينۆەستيتسيالاردى كوتەرمەلەۋ مەن قورعاۋ تۋرالى جاڭا كەلىسىمگە, سونداي-اق ساۋدا-ەكونوميكالىق ىنتىماقتاستىقتى دامىتۋ جونىندەگى بىرلەسكەن ءىس-قيمىل جوسپارىنا قول قويۋ مۇمكىندىگىن قاراستىرۋعا كەلىستى;
ۆەتنامنان ەۋرازيالىق ەكونوميكالىق وداققا (بۇدان ءارى – ەاەو) تاۋارلاردىڭ ەكسپورتىنا جانە كەرىسىنشە جۇزەگە اسىرىلۋىنا جاردەمدەسۋگە كوبىرەك كوڭىل ءبولىپ, ەاەو شەڭبەرىندە نەعۇرلىم ءتيىمدى ۇيلەستىرۋ مەن ءوزارا قولداۋدى قامتاماسىز ەتۋگە كەلىستى;
قۇرىلىس, حالىقارالىق قارجى ورتالىقتارىن باسقارۋ جانە ولاردى پايدالانۋ سالاسىنداعى ىنتىماقتاستىق پەن تاجىريبە الماسۋدى ىلگەرىلەتۋگە; سونداي-اق وسىنداي ورتالىقتاردىڭ قىزمەتىن قامتاماسىز ەتۋ ءۇشىن كادرلار دايارلاۋدى قولداۋعا كەلىستى.
IV. اۋىل شارۋاشىلىعى, عىلىم, تەحنولوگيالار, تسيفرلىق ترانسفورماتسيا, ەنەرگەتيكا, مادەنيەت, سپورت, تۋريزم, ءبىلىم, ەڭبەك جانە قورشاعان ورتا سالالارىنداعى جان-جاقتى ىنتىماقتاستىققا جاردەمدەسۋ
اۋىل شارۋاشىلىعى
تاراپتار ۇكىمەتارالىق كوميسسيا شەڭبەرىندەگى قىزمەت ارقىلى اۋىل شارۋاشىلىعى سالاسىنداعى ىنتىماقتاستىق باعدارلاماسىن جاڭعىرتۋدى ىلگەرىلەتۋگە كەلىستى;
قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن ۆەتنام سوتسياليستىك رەسپۋبليكاسىنىڭ اۋىل شارۋاشىلىعى جانە قورشاعان ورتانى قورعاۋ مينيسترلىگى اراسىنداعى ۆەتەريناريالىق ىنتىماقتاستىق تۋرالى كەلىسىمگە قول قويىلۋىن قۇپتاپ, ونى اۋىل شارۋاشىلىعى سالاسىنداعى ىنتىماقتاستىقتى نىعايتۋ جولىنداعى ماڭىزدى قادام دەپ سانادى;
جاقىن بولاشاقتا سەرىكتەستىكتى ودان ءارى تەرەڭدەتۋ ءۇشىن باسقا دا قۇرالداردىڭ ازىرلەنۋ مۇمكىندىگىمەن كەلىستى.
تاراپتار اۋىل شارۋاشىلىعى سالاسىنداعى تاجىريبەمەن جانە پراكتيكالىق جەتىستىكتەرمەن الماسۋدى ارتتىرۋعا;
اۋىل شارۋاشىلىعى ءونىمىن ءوزارا ەكسپورتتاۋعا ىقپال ەتەتىن نورماتيۆتىك-قۇقىقتىق بازانى قالىپتاستىرۋ مۇمكىندىگىن زەردەلەۋگە;
اۋىل شارۋاشىلىعى سەكتورىندا زەرتتەۋلەر مەن جوعارى تەحنولوگيالاردى قولدانۋدى قولداۋعا;
ەكى جاقتى تاۋار اينالىمىن ۇلعايتۋ ءۇشىن اۋىل شارۋاشىلىعى, ورمان جانە بالىق ونىمدەرى نارىقتارىنىڭ اشىلۋىنا جاردەمدەسۋگە كەلىستى.
عىلىم, تەحنولوگيا جانە تسيفرلىق ترانسفورماتسيا
تاراپتار ۇكىمەتارالىق كوميسسيا شەڭبەرىندە كەلىسىمدەر مەن مىندەتتەمەلەردى پراكتيكالىق تۇرعىدان ىسكە اسىرۋعا جاردەمدەسۋگە, ونىڭ ىشىندە عىلىمي-تەحنيكالىق ىنتىماقتاستىق جونىندەگى كىشى كوميتەت قۇرۋ ماسەلەسىن قاراستىرۋعا;
جوعارى تەحنولوگيالاردى, تسيفرلىق تەحنولوگيالاردى, يننوۆاتسيالار مەن تسيفرلىق ينفراقۇرىلىمدى زەرتتەۋ جانە ازىرلەۋ سالاسىنداعى ىنتىماقتاستىقتى جانداندىرۋعا, ونىڭ ىشىندە وسى سالالاردا ىنتىماقتاستىق تۋرالى كەلىسىمدەرگە قول قويۋعا جاردەمدەسۋگە;
عارىش كەڭىستىگىن بەيبىت ماقساتتا زەرتتەۋ جانە پايدالانۋ سالاسىندا ەكى ەلدىڭ ءتيىستى ۆەدومستۆولارى اراسىندا ىنتىماقتاستىق ورناتۋ مۇمكىندىگىن قاراستىرۋعا كەلىستى.
كولىك
قازاقستان ۆەتنام تاراپىن ترانسكاسپي حالىقارالىق كولىك باعىتىنىڭ (ورتا ءدالىز) ترانزيتتىك-كولىكتىك الەۋەتىن دامىتۋ جونىندەگى مەملەكەتتەر قابىلداپ جاتقان شارالار تۋرالى حاباردار ەتتى جانە ۆەتنام تاراپىنا ءوزىنىڭ ەكسپورتتىق تاۋارلارىن قازاقستان اۋماعى ارقىلى ءارتۇرلى باعىتتاردا جەتكىزۋ ءۇشىن ورتا ءدالىزدى پايدالانۋ مۇمكىندىگىن زەردەلەۋدى ۇسىندى.
تاراپتار 2024 جىلعى 24 جەلتوقساندا «سامۇرىق-قازىنا» ۇاق» اق, ۆەتنامدىق «Sovico Group» كونگلومەراتى مەن ونىڭ جەرگىلىكتى سەرىكتەسى اراسىنداعى «Qazaq Air-ءدى» ساتىپ الۋ-ساتۋ مامىلەسى بويىنشا مىندەتتى قۇجاتتاماعا قول قويىلۋىن جوعارى باعالايدى;
جاقىن بولاشاقتا ەكى ەل اراسىنداعى ساۋداعا, ينۆەستيتسيالارعا, تۋريزمگە جانە ادامدار اراسىنداعى گۋمانيتارلىق بايلانىستارعا جاردەمدەسۋ ماقساتىنداعى وسى سالاداعى وسىعان ۇقساس ىنتىماقتاستىقتى كوتەرمەلەيدى.
ەنەرگەتيكا – پايدالى قازبالاردى ءوندىرۋ
تاراپتار مۇناي مەن گازدى بارلاۋ جانە مۇناي-گاز قىزمەتتەرىن ۇسىنۋ سالالارىنداعى ىنتىماقتاستىقتى دامىتۋعا;
تازا جانە جاڭارتىلاتىن ەنەرگيانى قوسا العاندا, ەنەرگەتيكا سالاسىنداعى ىنتىماقتاستىقتى نىعايتۋ ءۇشىن الەۋەتتى جانە ىقتيمال شەشىمدەردى زەردەلەۋگە;
جاڭا قۇجاتتارعا قول قويۋ مۇمكىندىگىن كۇشەيتۋگە;
شيكىزات پەن وتىن كوزدەرىن ءارتاراپتاندىرۋ ءۇشىن ءوندىرۋ سالاسىنداعى ىنتىماقتاستىقتى ىلگەرىلەتۋگە كەلىستى.
مادەنيەت جانە سپورت
تاراپتار 2015 جىلى قول قويىلعان قازاقستان رەسپۋبليكاسىنىڭ مادەنيەت جانە سپورت مينيسترلىگى مەن ۆەتنام سوتسياليستىك رەسپۋبليكاسىنىڭ مادەنيەت, سپورت جانە تۋريزم مينيسترلىگى اراسىنداعى مادەنيەت جانە سپورت سالاسىنداعى ىنتىماقتاستىق تۋرالى كەلىسىمدى ىلگەرىلەتۋدى جالعاستىرۋعا;
ەكى ەل اراسىنداعى مادەني, كوركەمونەر جانە سپورت دەلەگاتسيالارىمەن الماسۋدى ۇلعايتۋعا;
ءبىر-ءبىرىنىڭ مىقتى سپورت تۇرلەرى (فۋتزال, ۆولەيبول جانە ت.ب.) بويىنشا سپورتشىلار دايارلاۋدى قامتاماسىز ەتۋگە نيەتتى ەكەندىگىن ءبىلدىردى.
2025 جىلى قازاقستاندا ۆەتنامنىڭ مادەنيەت كۇندەرىن جانە 2026 جىلى ۆەتنامدا قازاقستاننىڭ مادەنيەت كۇندەرىن وتكىزۋدىڭ ماڭىزدىلىعىن اتاپ ءوتتى.
تۋريزم
تاراپتار قول قويىلعان قۇجاتتاردى ودان ءارى ىلگەرىلەتۋدىڭ;
تاراپتاردىڭ ارقايسىسىنىڭ تۋريستىك الەۋەتىن جانە بىرەگەي باسىمدىقتارىن ىلگەرىلەتۋدى جانداندىرۋدىڭ;
ساياسات جانە ءتۋريزمدى باسقارۋ سالاسىندا تاجىريبەمەن جانە اقپاراتپەن بەلسەندى تۇردە الماسۋ قاجەتتىلىگىن اتاپ ءوتتى.
ءبىلىم
تاراپتار 2009 جىلى قول قويىلعان ءبىلىم سالاسىنداعى ىنتىماقتاستىق تۋرالى كەلىسىم جانە 2011 جىلى قول قويىلعان كەلىسىمگە وزگەرىستەر ەنگىزۋ تۋرالى حاتتاما شەڭبەرىندە ىنتىماقتاستىقتى جانداندىرۋعا, ونىڭ ىشىندە تاراپتاردىڭ ارقايسىسىنىڭ قاجەتتىلىكتەرى مەن وقۋ باعىتتارىنا سايكەس ولاردىڭ ستۋدەنتتەرىنە گرانتتار بەرۋ مۇمكىندىگىن قاراستىرۋعا;
ستۋدەنتتەردىڭ, وقىتۋشىلار مەن زەرتتەۋشىلەردىڭ اكادەميالىق ۇتقىرلىعىن قوسا العاندا, جان-جاقتى جانە تۇراقتى ىنتىماقتاستىقتى, الماسۋلاردىڭ اۋقىمىن كەڭەيتۋدى, سونداي-اق قازاقستاندا دا, ۆەتنامدا دا جوعارى بىلىكتى مامانداردى دايارلاۋدا ءوزارا ءىس-قيمىلدى كۇشەيتۋدى كوتەرمەلەۋگە كەلىستى.
ەڭبەك
تاراپتار 2010 جىلى قول قويىلعان قازاقستان ازاماتتارىنىڭ ۆەتنامداعى جانە ۆەتنام ازاماتتارىنىڭ قازاقستانداعى ۋاقىتشا ەڭبەك قىزمەتى تۋرالى كەلىسىم نەگىزىندە ەكى تاراپتىڭ ەڭبەك نارىعىنا مۇقتاج سالالار مەن سەكتورلاردا جۇمىس كۇشىمەن الماسۋدىڭ اۋقىمىن كەڭەيتۋ مۇمكىندىكتەرىن تالقىلادى.
قورشاعان ورتا
ەكى ەلدىڭ كوشباسشىلارى شولەيتتەنۋ مەن كوگالداندىرۋ شارالارىن قوسا العاندا, كليماتتىڭ وزگەرۋىنە دەن قويۋ جونىندەگى بىرلەسكەن كۇش-جىگەردى ارتتىرۋعا;
كليماتتىڭ وزگەرۋىنە بەيىمدەلۋ, قورشاعان ورتانى قورعاۋ جانە جاسىل جەلەك ءوسىرۋ جونىندەگى بىرلەسكەن باعدارلامالار مەن جوبالاردى ىسكە اسىرۋ مۇمكىندىگىن زەردەلەۋگە كەلىستى.
V. ەكىجاقتى وڭىرارالىق ىنتىماقتاستىق پەن ادامدار اراسىنداعى الماسۋدى نىعايتۋ
تاراپتار تىعىز ىنتىماقتاستىق ورناتۋدى جوعارى باعالادى جانە ەكى ەل اراسىنداعى ىنتىماقتاستىقتى جەرگىلىكتى دەڭگەيدە ودان ءارى دامىتۋعا كەلىستى, اتاپ ايتقاندا, 2012 جىلى استانا مەن حانوي قالالارى اراسىندا; 2024 جىلى شىعىس قازاقستان وبلىسى مەن باك نين پروۆينتسياسى اراسىندا; 2025 جىلى اقتاۋ مەن دا نانگ قالالارى اراسىندا, سونداي-اق وسى مەملەكەتتىك ساپار شەڭبەرىندە باسقا ەلدى مەكەندەر اراسىندا ورناعان باۋىرلاستىق قاتىناستاردى اتاپ ءوتتى.
VI. وڭىرلىك جانە حالىقارالىق ىنتىماقتاستىقتى نىعايتۋ
تاراپتار ەلدەر اراسىنداعى وڭىرلىك جانە حالىقارالىق ۇيىمدارداعى تىعىز ىنتىماقتاستىقتى جوعارى باعالادى, سونداي-اق بۇۇ جانە باسقا دا حالىقارالىق ۇيىمدار شەڭبەرىندە تىعىز ءوزارا ءىس-قيمىل مەن ءوزارا قولداۋدى جالعاستىرۋعا, وڭىرلىك قاۋىپسىزدىك پەن ساياسات ماسەلەلەرى جانە ءوزارا مۇددەنى بىلدىرەتىن حالىقارالىق كۇن تارتىبىندەگى جاعدايلار بويىنشا تۇراقتى پىكىر الماسۋعا نيەتتى;
بۇۇ, اوسشك, اسەم, دسۇ, ەۋرازيالىق ەكونوميكالىق وداق جانە باسقا حالىقارالىق جانە وڭىرلىك ۇيىمدار شەڭبەرىندە تىعىز ىنتىماقتاستىقتى جالعاستىرۋعا كەلىستى. ۆەتنام تاراپى كوپىر رەتىندە ارەكەت ەتۋگە جانە اسەان-مەن, سونداي-اق اسەان-عا مۇشە مەملەكەتتەرمەن ىنتىماقتاستىقتى نىعايتۋدا قازاقستانعا قولداۋ كورسەتۋگە دايىندىعىن راستادى;
كليماتتىڭ وزگەرۋى, تەرروريزم, ترانسۇلتتىق قىلمىس سياقتى قاۋىپسىزدىكتىڭ ءداستۇرلى ەمەس قاۋىپ-قاتەرلەرىنە قارسى ءىس-قيمىل جاساۋ, سونداي-اق جاپپاي قىرىپ-جويۋ قارۋىنىڭ تارالۋىن بولعىزباۋ ءۇشىن ىنتىماقتاستىقتى كەڭەيتۋ مۇمكىندىكتەرىن تالقىلادى.
ۆەتنام «باكتەريولوگيالىق (بيولوگيالىق) جانە ۋىتتى قارۋلار جاساۋعا, وندىرۋگە جانە ونىڭ قورلارىن شوعىرلاندىرۋعا تىيىم سالۋ جانە ولاردى جويۋ جونىندەگى كونۆەنتسيانى» نىعايتۋ جونىندەگى, ونىڭ ىشىندە بيولوگيالىق قاۋىپسىزدىك جونىندەگى حالىقارالىق اگەنتتىكتى قۇرۋ مۇمكىندىگى جانە باسقا دا ينستيتۋتسيونالدىق تەتىكتەر ارقىلى نىعايتۋ جونىندەگى قازاقستاننىڭ كۇش-جىگەرىن قولدايدى.
تاراپتار قورشاعان ورتانى قورعاۋ, شولەيتتەنۋگە قارسى كۇرەس جانە كليماتتىڭ وزگەرۋىنە دەن قويۋ جونىندەگى جاھاندىق كۇش-جىگەرگە وزدەرىنىڭ ۇلەسىن قوسا وتىرىپ, حالىقارالىق قوعامداستىقپەن ىنتىماقتاستىقتى كەڭەيتۋگە كەلىستى;
حالىقارالىق جانە وڭىرلىك ماسەلەلەر, ونىڭ ىشىندە وڭتۇستىك-قىتاي تەڭىزىندەگى جاعداي تۋرالى پىكىر الماستى; ءتيىستى وڭىرلەردەگى بەيبىت جاعدايدى, قاۋىپسىزدىك پەن تۇراقتىلىقتى ۇستاپ تۇرۋدىڭ, سونداي-اق حالىقارالىق قۇقىق پەن بۇۇ جارعىسى نەگىزىندە داۋلاردى بەيبىت جولمەن شەشۋدىڭ ماڭىزدىلىعىن اتاپ ءوتتى.
باس حاتشى تو لامنىڭ قازاقستان رەسپۋبليكاسىنا مەملەكەتتىك ساپارى ءداستۇرلى دوستىقتى نىعايتادى, ەكى ەل اراسىنداعى ىنتىماقتاستىقتىڭ جاڭا كەزەڭىنە نەگىز بولادى جانە قازاقستان مەن ۆەتنام اراسىنداعى وڭىردەگى بەيبىتشىلىك, تۇراقتىلىق جانە دامۋ جولىنداعى ەكى ەل حالىقتارىنىڭ مۇددەسى ءۇشىن ءتيىمدى جانە پراكتيكالىق ىنتىماقتاستىقتىڭ جاڭا پەرسپەكتيۆالارىن اشادى دەپ كەلىستى.
باس حاتشى قازاقستان رەسپۋبليكاسىنىڭ پرەزيدەنتى قاسىم-جومارت توقاەۆقا جانە قازاقستان حالقىنا مەملەكەتتىك ساپار بارىسىندا جوعارى دارەجەلى ۆەتنام دەلەگاتسياسىنا كورسەتكەن جىلى قوناقجايلىلىعى ءۇشىن شىنايى العىسىن ءبىلدىردى.
بىرلەسكەن مالىمدەمە 2025 جىلعى 6 مامىردا قازاقستان رەسپۋبليكاسىنىڭ استانا قالاسىندا قازاق, ۆەتنام جانە اعىلشىن تىلدەرىندە قابىلداندى.
