كەزدەسۋ بارىسىندا ماۋلەن اشىمباەۆ مەيماندى ەكپا-نىڭ قازاقستان بويىنشا بايانداماشىسى بولىپ تاعايىندالۋىمەن قۇتتىقتاي كەلىپ, قازاقستان پارلامەنتى مەن اتالعان اسسامبلەيا اراسىندا 20 جىل ىشىندە تىعىز جانە ءتيىمدى ءوزارا قارىم-قاتىناس ورناعانىن اتاپ ءوتتى. سونداي-اق ءىس-شارا كەزىندە قازىرگى تاڭدا قازاقستان دەپۋتاتتارى ەكپا-نىڭ پلەنارلىق وتىرىستارىنا جانە ونىڭ كوميتەتتەرىنىڭ جۇمىسىنا بەلسەندى قاتىسىپ كەلە جاتقانى ايتىلدى.
سۇحباتتاسۋشىلار بىرلەسكەن جۇمىستىڭ ماڭىزدى باعىتتارىمەن قاتار, ادىلەتتى قازاقستان قالىپتاستىرۋ جولىنداعى تۇراقتى دامۋ تەتىكتەرىن دە تالقىلادى. سەنات توراعاسى ساياسي جۇيەنى دەموكراتيالاندىرۋ باعىتىندا اتقارىلىپ جاتقان جۇمىستارعا جانە ادام قۇقىقتارىن قورعاۋ, گەندەرلىك تەڭدىك جۇيەسىن نىعايتۋ, بيلىك تارماقتارى, سونداي-اق ورتالىق پەن وڭىرلەر اراسىنداعى وكىلەتتىكتەر مەن جاۋاپكەرشىلىكتىڭ تەڭگەرىمىن قامتاماسىز ەتۋگە قولعا الىنعان شارالارعا دا جان-جاقتى توقتالىپ ءوتتى.
«ەل پرەزيدەنتى قاسىم-جومارت توقاەۆتىڭ باستاماسىمەن ەلىمىزدە اۋقىمدى جانە كەشەندى رەفورمالار ىسكە اسىرىلىپ جاتىر. مەملەكەت باسشىسى ادىلەتتى قازاقستان قالىپتاستىرۋ تۇجىرىمداماسىن ۇسىندى. بۇل جۇمىس زاڭ ۇستەمدىگىن كۇشەيتۋدى, بيلىك تارماقتارى اراسىندا وكىلەتتىكتەردىڭ تەڭگەرىمدى ءبولىنۋىن قامتاماسىز ەتۋدى, سونداي-اق ورتالىق جانە وڭىرلىك بيلىك ورگاندارى اراسىنداعى ۇيلەسىمدىلىكتى ارتتىرۋدى كوزدەيدى. قازىرگى تاڭدا پرەزيدەنت باستاماشىلىق ەتكەن ساياسي جانە ەكونوميكالىق رەفورمالاردى زاڭنامالىق تۇرعىدان قامتاماسىز ەتۋ پارلامەنت قىزمەتىنىڭ نەگىزگى باسىمدىعى بولىپ سانالادى», دەدى پالاتا سپيكەرى.
سونىمەن قاتار كەزدەسۋدە رۋحاني ديپلوماتيانى دارىپتەۋ ماسەلەلەرىنە دە باسا ءمان بەرىلدى. بۇل رەتتە بيىل قىركۇيەكتە وتەتىن الەمدىك جانە ءداستۇرلى دىندەر كوشباسشىلارىنىڭ VIII سەزىنە دايىندىق بارىسى ءسوز بولدى.
ءوز كەزەگىندە جولت نەمەت ەلىمىزدەگى ساياسي جانە الەۋمەتتىك-ەكونوميكالىق وزگەرىستەرگە جوعارى باعا بەردى. سونداي-اق ول قازاقستاننىڭ ەكپا-مەن سەرىكتەستىگى ودان ءارى نىعايا تۇسەتىنىنە سەنىم ءبىلدىردى.
بۇدان باسقا, تاراپتار قازاقستان مەن ماجارستان اراسىنداعى ىنتىماقتاستىققا, ونىڭ ىشىندە پارلامەنتارالىق بايلانىسقا قاتىستى ماسەلەلەرگە نازار اۋداردى. كەزدەسۋدە ەكى ەلدىڭ حالىقتارىن تەرەڭ تاريحي تامىر بايلانىستىراتىنى, جوعارى دەڭگەيدەگى بۇگىنگى ءوزارا ءتيىمدى ىنتىماقتاستىق مەملەكەتتەردىڭ قارىم-قاتىناسىن ودان ءارى دامىتۋعا جاڭا مۇمكىندىكتەر بەرەتىنى ايتىلدى.
