حالىق ديپلوماتتارى الەمنىڭ 14 مەملەكەتىندە – گەرمانيا, فرانتسيا, وزبەكستان, رەسەي, ارگەنتينا, ازەربايجان, قىرعىزستان, پولشا, تۇركيا, بولگاريا, تاجىكستان, ارمەنيا, كورەيا ەلدەرىندە قىزمەت ەتىپ ءجۇر. ولار سول مەملەكەتتەردە بەيبىتشىلىك پەن كەلىسىمنىڭ وتاندىق ۇلگىسىن تانىستىرىپ, وزگە حالىقتارمەن ءوزارا ىنتىماقتاستىقتى دامىتۋعا ۇلەس قوسىپ جاتىر. دوستىق ەلشىلەرى – حالىقتار اراسىنداعى ىنتىماقتاستىقتى نىعايتۋعا ۇلەس قوسىپ جۇرگەن بەدەلدى مەملەكەت جانە قوعام قايراتكەرلەرى.
2018 جىلى قحا كەڭەسىنىڭ شەشىمىمەن العاشقى دوستىق ەلشىلەرى تاعايىندالدى. ماسەلەن, رەسەي فەدەراتسياسىنىڭ كورنەكتى مەملەكەت جانە قوعام قايراتكەرى رۋسلان اۋشەۆ, گەرمانيا بۋندەستاگىنىڭ ەكس-دەپۋتاتى گەنريح تسەرتيك جانە ارگەنتيناداعى (روساريو ق.) قازاق مادەني ورتالىعىنىڭ جەتەكشىسى يرينا ۆاگنەر قازاق مادەنيەتىن, تاريحىن وزگە ۇلتتارعا ناسيحاتتاپ, ەتنوسارالىق قاتىناستاردى ۇيلەستىرۋدە جانە بەيبىتشىلىك پەن كەلىسىم ساياساتىن ىلگەرىلەتۋدە ەلىمىزدىڭ تاجىريبەسىمەن بولىسكەن ناعىز ەلدىڭ جاناشىر دوستارى بولدى.
فرانتسياداعى ەلىمىزدىڭ دوستىق ەلشىسى – قوعام قايراتكەرى, كاسىپكەر مالگوجاتا وبورون-تۋار دا 30 جىلدان بەرى تىعىز دوستىق قارىم-قاتىناس قۇرىپ كەلەدى. ول التى جىلدان بەرى قحا دوستىق ەلشىسى قىزمەتىندە ەكى ەل اراسىنداعى كوپتەگەن ەكونوميكالىق جانە مادەني بىرلەسكەن جوباعا باستاماشى بولىپ, قولداۋ كورسەتتى. ماسەلەن, العاشقىلاردىڭ ءبىرى بولىپ قازاقتىڭ كوكپار ويىنىن تاماشالاعان فرانتسۋزدار بولدى. وسىدان 3-4 جىل بۇرىن فرانتسيادا كوكپار ءتۋرنيرى مەن پاريج گالەرەياسىندا قازاق كوكپارى تۋرالى كورمە ۇيىمداستىرىلدى. دوستىق ەلشىسى كەلىسىم مەن بىرلىكتىڭ وتاندىق ۇلگىسىن كەڭىنەن ناسيحاتتاۋدى دا جوسپارلاپ وتىر.
– قحا ۇلگىسى – بىرەگەي. بۇل – ءتۇرلى ءداستۇر مەن ءتىل توپتارىنداعى ادامداردىڭ ءبىر-ءبىرىن قالاي تۇسىنە الاتىنىنىڭ ناعىز مىسالى. مۇنى ساياسي جۇيەنىڭ ەڭ تولەرانتتى قۇرالى دەپ سانايمىن. ويتكەنى ءبىزدىڭ الەم – وتە كۇردەلى ءارى نازىك. بۇگىن ءبىز تەپە-تەڭدىكتى بۇزىپ, الاۋىزدىق وتىن جاعۋدىڭ قانشالىقتى وڭاي ەكەنىن انىق كورىپ وتىرمىز. ستراتەگيالىق ماسەلەلەر بويىنشا ءتيىمدى پىكىرتالاسقا قول جەتكىزۋ ءۇشىن ساياسي جانە ينستيتۋتسيونالدىق سالالاردىڭ, ەكونوميكالىق ورتانىڭ جانە يدەيالار الەمىنىڭ توعىسقان جەرىندە ديالوگ الاڭدارىن قۇرۋ وتە ماڭىزدى. قازاقستان وسى ماسەلەدە كوشباسشى بولىپ تۇر. ورتالىق ازيا ەلدەرى تۋرالى حابارى از باتىس باق-تارىندا ەل تۋرالى, جالپى ورتالىق ازيانى ءالى دە كوپتەپ ناسيحاتتاۋىمىز كەرەك, –دەدى فرانتسياداعى دوستىق ەلشىسى.
جالپى, دوستىق ەلشىلەرى شەتەلدەردە ەل مادەنيەتىن تانىتاتىن فەستيۆال, كورمە, كونفەرەنتسيالار وتكىزۋگە ىقپال ەتەدى. مادەنيەتارالىق ديالوگ پەن ىنتىماقتاستىقتى دامىتۋعا باعىتتالعان حالىقارالىق باستامالاردى ىسكە اسىرۋعا قاتىسادى.
وسىنداي مارتەبەلى جۇمىستى اتقارىپ جۇرگەن تاجىك مەتسەناتى, قحا دوستىق ەلشىسى اقبار اسادۋللوعا قحا-نىڭ 30 جىلدىعىنا ارنالعان قازاقستان حالقى اسسامبلەياسىنىڭ كەزەكتى XXXIV سەسسياسىندا قاسىم-جومارت توقاەۆ قازاقستان مەن تاجىكستان حالىقتارىنىڭ اراسىندا دوستىقتى, ەتنوستارالىق بىرلىك پەن كەلىسىمدى نىعايتۋعا قوسقان ەلەۋلى ۇلەسى ءۇشىن قۇرمەت گراموتاسىن تاپسىردى.
وسىلايشا, حالىق ديپلوماتتارىنىڭ قىزمەتى قاي كەزدە دە ماڭىزدى بولىپ قالا بەرەدى.
