فورۋمدا تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا ءىس-شارانىڭ جوعارى دەڭگەيدە ۇيىمداستىرىلعانى, جىلى قابىلداۋ مەن كورسەتىلگەن قوناقجايلىق ءۇشىن وزبەكستان رەسپۋبليكاسىنىڭ پرەزيدەنتى شاۆكات ميرزيوەۆكە جانە وزبەكستان رەسپۋبليكاسىنىڭ مادەنيەت مينيسترلىگىنە العىسىن ءبىلدىردى.
ءوز سوزىندە اقتوتى رايىمقۇلوۆا وزبەكستاننىڭ جاقىن ارادا تۇركى مادەنيەتى جانە مۇراسى قورىنا تولىققاندى مۇشە رەتىندە قوسىلاتىنى تۋرالى ريزاشىلىعىن ءبىلدىرىپ, بىلاي دەپ اتاپ ءوتتى:
«بۇل قادام تۇركى الەمىندەگى ينتەگراتسيانى تەرەڭدەتىپ, عىلىمي, مادەني جانە اعارتۋشىلىق باعىتتاعى بىرلەسكەن باستامالار ءۇشىن جاڭا كوكجيەكتەر اشاتىن ماڭىزدى كەزەڭ بولادى».
فورۋم قاتىسۋشىلارىنا قوردىڭ تۇركى الەمىنىڭ باي مادەني مۇراسىن ساقتاۋ جانە ونى حالىقارالىق دەڭگەيدە تانىتۋ باعىتىندا جۇزەگە اسىرىپ جاتقان نەگىزگى جوبالارى تانىستىرىلدى. باسىم باعىتتار قاتارىندا – تۇركى حالىقتارى فولكلورىنىڭ انتولوگياسىن ازىرلەۋ, كوپتىلدى تسيفرلىق مۇرا كاتالوگىن جاساۋ, حالىقارالىق كونفەرەنتسيالار مەن كورمەلەر ۇيىمداستىرۋ, قايتا قالپىنا كەلتىرۋ جوبالارىن قولداۋ جانە تۇركى مادەنيەتى مەن مۇراسى ورتالىقتارىن قۇرۋ ەرەكشە اتاپ ءوتىلدى. قور وزبەكستان رەسپۋبليكاسىنىڭ مادەنيەت مينيسترلىگىنىڭ قولداۋىمەن وسىنداي ورتالىقتاردىڭ ءبىرىن تاشكەنت قالاسىندا اشۋعا دايىن ەكەنىن مالىمدەدى.
اقتوتى رايىمقۇلوۆا بۇل ءىس-شارانىڭ باقسى ونەرىن عىلىمي تۇرعىدان تەرەڭىرەك زەرتتەۋگە عانا ەمەس, سونىمەن قاتار تۇركى مەملەكەتتەرى اراسىنداعى مادەني جانە رۋحاني بايلانىستاردى كەڭەيتۋگە باعىتتالعانىن ەرەكشە اتاپ ءوتتى.
ايتا كەتۋ كەرەك, وزبەكستان رەسپۋبليكاسىنىڭ مادەنيەت مينيسترلىگىنىڭ ۇيىمداستىرۋىمەن وتكەن فورۋمعا ازەربايجان رەسپۋبليكاسىنىڭ مادەنيەت ءمينيسترى, قىرعىز رەسپۋبليكاسىنىڭ مادەنيەت ءمينيسترىنىڭ ورىنباسارى, سونداي-اق ICESCO, TÜRKSOY, TÜRKPA, تۇركى اكادەمياسى سەكىلدى حالىقارالىق ۇيىمداردىڭ باسشىلارى مەن وكىلدەرى, بەلگىلى عالىمدار, فولكلورتانۋشىلار, باقسىلار, تۇركى الەمىنىڭ مادەنيەت قايراتكەرلەرى مەن بۇقارالىق اقپارات قۇرالدارىنىڭ وكىلدەرى قاتىستى.
