Úmit – مۇمكىندىگى شەكتەۋلى جاندارعا ارنالعان اقىلدى قۇرىلعى. وسى جۇيەنىڭ ارقاسىندا تولىق سال بولىپ قالعان ادام دا كىتاپ وقىپ, جۇمىس ىستەي الادى, ءتىپتى باعدارلاما جازىپ, ديزاين جاسايدى. اتالعان قۇرىلعى ءتىل مەن باستىڭ قوزعالىسى ارقىلى سمارتفون مەن كومپيۋتەردى باسقارۋعا, مۇگەدەكتەر ارباسىن جۇرگىزۋگە مۇمكىندىك بەرەدى. ەڭ باستىسى – قۇرىلعى جاساندى ينتەللەكتپەن جابدىقتالعان. ياعني ول ادامنىڭ ارەكەتىن تەك ورىنداپ قانا قويماي, نە ىستەگىسى كەلەتىنىن الدىن الا بولجايدى. مىسالى, پايدالانۋشى تىكبۇرىش سىزعىسى كەلسە, جي ءپىشىندى ءوزى-اق تۇزەتىپ بەرەدى, نە بولماسا ەكرانداعى باتىرمانى ءدال تابۋعا كومەكتەسەدى.
جوبا نەگىزىن قالاۋشىلار العاشقى يدەيانى ناقتى ومىردەن العان. ولاردىڭ جاقىن تۋىستارى اراسىندا سال اۋرۋىنا شالدىققاندار بولعان. كوماندا مۇشەلەرى وڭالتۋ ورتالىقتارىندا زەرتتەۋ جۇرگىزىپ, ءتىپتى ءوز قاتارلاستارى اراسىندا دا سمارتفون قولدانۋعا مۇمكىندىك ىزدەپ جۇرگەن جاستاردىڭ بار ەكەنىن بىلگەن. «سول كەزدە بۇل – جاي عانا تەحنولوگيا ەمەس, قوعامعا قاجەت شەشىم ەكەنىن ۇقتىق», دەيدى جوبانىڭ نەگىزىن قالاۋشى قانات ءتاجىحان.
قۇرىلعىنى جاساۋ بارىسىندا كوماندا سەنسورلاردى باسقارۋ, ۋىتسىز ءارى ىڭعايلى ماتەريال تابۋ, شاعىن ءارى قۋاتتى ميكروچيپ دايىنداۋ سياقتى كوپتەگەن قيىندىقتارعا تاپ بولعان. سوعان قاراماستان, ولار ەكى جىل ىشىندە العاشقى ءپروتوتيپتى دايىنداپ, كەيىن جاساندى ينتەللەكتپەن جەتىلدىرىلگەن جاڭا نۇسقاسىن شىعاردى. كوماندا الداعى ۋاقىتتا قۇرىلعىنى تولىق اۆتوماتتاندىرىپ, قولدانۋعا بارىنشا ىڭعايلى ەتىپ جاساماق, سونىمەن قاتار, ينۆەستورلار مەن سەرىكتەستەر تارتىپ, Úmit-ءتى حالىقارالىق نارىققا شىعارۋدى جوسپارلاپ وتىر.
