الاشقا اتى كەتكەن جاقسى-جايساڭدارىمىز جايىنداعى جۇزدەگەن دەرەكتى ءفيلمىن كوگىلدىر ەكراننان كورىپ, كوڭىل كونشىتكەنىمىزدى اتاپ ءوتۋدىڭ ارتىقتىعى جوق سياقتى. ەڭ باستىسى, اۆتور بۇل باعىتتا جۇيەلى تۇردە جۇمىس ىستەپ كەلەدى. سونىڭ ارقاسىندا ارعى-بەرگى زاماندارداعى ماڭدايعا باسار مارعاسقالارىمىزدىڭ ومىرىندەگى ءوزىمىز بىلەتىن جانە بىلمەيتىن ءبىراز جايعا قانىقتىق. وزگە ارىپتەستەرىمىزگە ۇلگى-ونەگە ەتۋگە لايىق بۇل ۇزدىك ءۇردىس الداعى ۋاقىتتاردا دا جالعاسادى دەگەن ۇمىتتەمىز.
ءبىزدى مايانىڭ اقپارات ايدىنىنداعى امبەباپتىعى ەرىكسىز ءتانتى ەتەدى. جۇيرىك جۋرناليستىگىنە رەجيسسەرلىگى مەن پروديۋسەرلىگى, الەۋمەتتى باۋرار ارتىستىگى قوسىلىپ قارىنداسىمىزدىڭ قابىلەت-قارىمىن ايشىقتاي تۇسكەندەي.
بەلگىلى بەكباەۆانىڭ كەيىنگى كەزدەرى جازبا جۋرناليستيكانىڭ دا اۋىلىنا ات ارقانداپ, تاريحي-تانىمدىق تۋىندىلارعا بەت بۇرعانىن جاقسىلىقتىڭ بەلگىسى رەتىندە قابىلداعانىمىز ءجون... باعالى باستامانىڭ العاشقى جورالعىسى رەتىندە جوشى حان حاقىنداعى ەلەۋلى ەڭبەگى جاقىندا وقىرمانعا جول تارتقانىنان حاباردارمىز.
ەلوردانى ەلەڭدەتكەن «Astana Eyrasian Book Fair-2025» حالىقارالىق كورمە-جارمەڭكەسى اياسىندا ونىڭ قازاق جانە ورىس تىلدەرىندە شىققان «قازاقستان: جەڭىسكە قوسقان ۇلەسى. 1941–1945» اتتى البوم-كىتابىنىڭ بەتاشار ءراسىمى بولدى. اۆتوردىڭ ايتۋىنشا «بۇل كىتاپ وتانىن قورعاعان, تىلدا ەڭبەك ەتكەن, بولاشاق ۇرپاق ءۇشىن وزدەرىن قۇربان ەتكەن باتىرلارعا ارنالعان ەستەلىك».
ادامزات تاريحىنداعى ەڭ الاپات قىرعىن – ەكىنشى دۇنيەجۇزىلىك سوعىسقا قازاقستاندىقتاردىڭ قاتىسۋى – تاۋسىلمايتىن تاقىرىپ. قانشاما كينو ءتۇسىرىلىپ, ادەبي-كوركەم شىعارمالار جازىلدى. ەسەبىنە جەتۋ ەش مۇمكىن ەمەس. مايانىڭ مىنا كىتابى دا تەلەگەي تەڭىزگە قوسىلعان ءبىر تامشىداي تابارىك دۇنيە ەكەنى تالاسسىز.
مۇندا نەگىزىنەن كەشەگى كۇندەي كۇركىرەپ وتكەن سۇراپىل سوعىستاعى جەرلەستەرىمىزدىڭ وشپەس ەرلىگى باياندالادى. ناقتىلاي تۇسسەك, ەل باسىنا ەكىتالاي كۇن تۋعاندا قايسارلىق پەن قاھارماندىقتىڭ قايتالانباس ۇلگىسىن كورسەتكەن باۋىرجان مومىش ۇلى, ءاليا مولداعۇلوۆا, راقىمجان قوشقارباەۆ, مانشۇك مامەتوۆا, مالىك عابدۋللين, حيۋاز دوسپانوۆا, قاسىم قايسەنوۆ, تالعات بيگەلدينوۆ سەكىلدى باتىرلارىمىزدىڭ ونەگەلى ءومىر جولدارى پۋبليتسيستيكالىق پافوسپەن ورىلەدى. دەرەكتەر مەن دايەكتەر, سيرەك كەزدەسەتىن سۋرەتتەر, مايداننان جولدانعان ءماندى حاتتار كىتاپ قۇندىلىعىن ارتتىرىپ تۇرعانى انىق.
ايتپاقشى, اتالعان كىتاپ «Arman – pv» baspasy» مايا بەكباەۆامەن بىرلەسىپ قولعا العان «تاريح تاعىلىمى» جوباسى اياسىندا جارىق كورىپ وتىر. يدەيا اۆتورى – وسى باسپانىڭ باس ديرەكتورى ديدارا الينا.
