قۇلەكە باتىر – ابىلاي حاننىڭ وڭ تىزەسىن باسا وتىرعان اقىلشى-باتىرلارىنىڭ ءبىرى. حان ونى رەسەي, قىتاي مەملەكەتتەرى اراسىنداعى ەلشىلىكتەرگە دە جىبەرىپ, ديپلوماتيالىق ىستەرگە جۇمساپ وتىرعان. قۇلەكە تۋرالى كەزىندە:
«قۇداي جاقسى جاراتقان قۇلەكەنى ايت,
ەلدە جاقسى بار بولسا ءبىر-ەكەنىن ايت.
اتىعايدا ءتورت قاسقا باتىر وتكەن
جانتەلى, جاپەك, تىلەكە, قۇلەكەنى ايت», دەگەن ءسوز قالعان.
قۇلەكەدەن بابەكە, موڭكە, تىلەۋكە, شارداق, قازاقباي, ءجۇسىپ اتتى التى ۇل تۋادى. وسىنداعى تىلەۋكە اقىن, فيلوسوف, اقىلىنا قاراپ جاسىنان شال اتانعان شال اقىن.
قازاقبايدىڭ ءبىر بالاسى – بەكمىرزا. ونىڭ جانتىلەۋ دەگەن بالاسىنان قوشان تۋىپ, ال ودان اتاقتى اكادەميك امانجول قوشانوۆتىڭ تاراعانىن بىلەمىز. بۇل اتانىڭ ۇرپاعى ەجەلدەن قارىمدى, تەكتى, ءبىلىمدى, اتالى ەكەنى كورىنىپ تۇر.
بەكمىرزا 1903–1904 جىلدارى قاسىنا ەلدەن ىبىراي جانە تاعى ءبىر جىگىتتى ەرتىپ, قاجىلىققا بارعان. ءوزى 60-تان جاڭا عانا اسقان جاستا بولسا كەرەك. وسى ساپاردا بەكمىرزانىڭ اللا بۇيىرعان اجال ساعاتى جەتىپ, شەيىت بولادى. ال ونىڭ ءزامزام سۋى جانە باسقا دا زاتتار سالعان ساندىعىن ەلگە ىبىراي مەن قاسىنداعى جىگىت امان-ەسەن جەتكىزىپ, ۇرپاعى جانتىلەۋدىڭ ۇيىنە تاپسىرادى. سودان بەرى بۇل ساندىق عاسىردان ارتىق ۋاقىت بويى قۇلەكە باتىر ۇرپاقتارىنىڭ باستان كەشكەن وقيعالارىنىڭ كۋاسى بولىپ تۇرعان.
جۋىردا وسى ساندىقتى جانتىلەۋدىڭ نەمەرەسى مۇرات اقساقال ءوز قولىمەن قىزىلجارداعى يسلام مادەنيەتىنىڭ مۋزەيىنە تاپسىردى.
پەتروپاۆل
