جاڭا ستاندارت وقۋ-اعارتۋ جانە دەنساۋلىق ساقتاۋ مينيسترلىكتەرى بىرلەسىپ, قازاق تاعامتانۋ اكادەمياسى مەن ساراپشىلار توبىنىڭ قاتىسۋىمەن ازىرلەنگەن. استانادا وتكەن دوڭگەلەك ۇستەل بارىسىندا وسى ستاندارتتىڭ نەگىزگى قاعيدالارى تانىستىرىلىپ, ءبىلىم بەرۋ ۇيىمدارىنا ەنگىزۋ جولدارى جان-جاقتى تالقىلاندى. ءىس-شارادا ءسوز سويلەگەن وقۋ-اعارتۋ ءمينيسترى عاني بەيسەمباەۆ ەلىمىزدەگى بارلىق مەكتەپكە عىلىمي نەگىزدەلگەن بىرىڭعاي اس ءمازىرىن ەنگىزۋ وقۋشىلاردىڭ دەنساۋلىعىن ساقتاۋ جانە ساپالى ءبىلىم الۋعا جاعداي جاساۋ جولىنداعى ماڭىزدى باستاما ەكەنىن اتاپ ءوتتى.
«بالالاردىڭ قاۋىپسىزدىگى مەن دەنساۋلىعى – مەملەكەت ساياساتىنىڭ باستى باعىتتارىنىڭ ءبىرى. دۇرىس تاماقتانۋ مادەنيەتىن قالىپتاستىرۋ – بولاشاق ۇلت ساۋلىعىنىڭ كەپىلى. مەملەكەت باسشىسىنىڭ قولداۋىمەن مەكتەپتەردە تەگىن تاماقتاندىرۋ جۇيەسى ەنگىزىلدى. ەندىگى باستى ماقسات – بەرىلەتىن تاعامنىڭ ساپاسى مەن قاۋىپسىزدىگىن تولىق قامتاماسىز ەتۋ. بۇل ءۇشىن ءتيىستى زاڭنامالىق نەگىز قالىپتاستىرىلدى, ەندى جەرگىلىكتى اتقارۋشى ورگاندار ستاندارتتى ارى قاراي جۇزەگە اسىرۋدى قامتاماسىز ەتۋى ءتيىس», دەدى مينيستر.
2023 جىلدان باستاپ ەلىمىزدە باستاۋىش سىنىپ وقۋشىلارى مەن الەۋمەتتىك تۇرعىدان وسال ساناتتاعى بالالارعا تەگىن ىستىق تاماق بەرىلىپ كەلەدى. بيىلعى وقۋ جىلىندا وسى قامقورلىقتىڭ يگىلىگىن 1,7 ميلليونعا جۋىق بالا كوردى.
وقۋ-اعارتۋ مينيسترلىگىنىڭ دەرەگىنە سۇيەنسەك, مەكتەپ اسحانالارىنداعى قىزمەت ساپاسىن ارتتىرۋ ءۇشىن زاڭنامالىق تالاپتار ايتارلىقتاي كۇشەيتىلدى. اتاپ ايتقاندا, تاماقتانۋعا قۇقىلى وقۋشىلاردىڭ ەسەبى الەۋمەتتىك ءاميان جۇيەسى ارقىلى اۆتوماتتاندىرىلدى, قوعامدىق باقىلاۋ تەتىكتەرى كەڭەيتىلدى, تاماقتاندىرۋدى ۇيىمداستىرۋ قاعيدالارى جەتىلدىرىلىپ, جاڭا ستاندارت بەكىتىلدى. ايتا كەتەيىك, مەكتەپتەگى تاماقتانۋدىڭ جاڭا ستاندارتى 2025 جىلدىڭ 1 قىركۇيەگىنەن باستاپ رەسمي تۇردە قولدانىسقا ەنەدى.
