جوبا اۋىل شارۋاشىلىعى, اۆتوموبيل جانە تەمىرجول قۇرىلىسى سەكىلدى ستراتەگيالىق ماڭىزى بار سالالاردا سىنالىپ كورمەك.
«بۇل بيۋدجەت قارجىسىنىڭ جۇمسالۋىنا باقىلاۋدى كۇشەيتۋگە ىقپال ەتەدى. قارجىنى يگەرۋ كەزىندە اشىقتىقتى قامتاماسىز ەتىپ, جەمقورلىق قاۋپىن ازايتۋ ءۇشىن ماڭىزدى قۇرالعا اينالادى. بيۋدجەتتەن قارجى بولۋدەن باستاپ, ونى تولىق يگەرگەنگە دەيىنگى كەزەڭدى باقىلاۋعا مۇمكىندىك بەرەدى. ءار تەڭگەگە بىرەگەي تسيفرلىق بەلگى قويىلدى. ەندى قارجىنى جىمقىرۋ مۇمكىندىگى بولمايدى», دەيدى ن.جاحين.
ونىڭ دەرەگىنشە, «اقشانى بوياۋ» جوباسى اتىراۋ وبلىسىنداعى مۇقىر – قۇلسارى باعىتىنداعى جولدى جوندەۋ جوباسىندا قولدانىلماق. اتالعان جولدى جوندەۋگە 2,1 ملرد تەڭگە بولىنگەن. ال جولدى جوندەۋگە «قازاۆتوجول» ۇك» اق تاپسىرىس بەرىپ وتىر. مەردىگەرلىككە «اتىراۋينجستروي-ايس» جشس تاڭدالىپتى.
«جوباعا بولىنگەن قارجىنىڭ 100 ملن تەڭگەسى تسيفرلىق بەلگىمەن تاڭبالاندى. بۇل سوما ۇلتتىق ۆاليۋتاعا ايىرباستالدى. شارتقا سايكەس قۇرىلىس ماتەريالدارىن جەتكىزەتىن «ناقزات» جشس-نىڭ ەسەپشوتىنا اۋدارىلدى», دەپ مالىمدەدى ن.جاحين.
جول جوندەۋگە قاجەتتى قۇرىلىس ماتەريالدارىن تەمىرجولمەن مۇقىر ستانساسىنا جەتكىزۋ كوزدەلگەن. وسى ايدا ستانساعا 45 ۆاگونعا تيەلگەن ماتەريالدار جەتكىزىلەدى. قازىر بۇل ستانسادا 30 ۆاگونعا ارنالعان تەمىرجول تۇيىعى, جۇمىس كۇشى, ارنايى تەحنيكا بار. ماتەريالداردى تۇسىرۋگە ارنالعان اۋماق جارىقتاندىرىلىپ, قورشالعان. نىسان قۇرىلىس تەحنيكالارىمەن قامتاماسىز ەتىلگەن.
«شارت 2024 جىلعى قاراشادا جاسالدى. جۇمىستىڭ اياقتالۋ مەرزىمى 2025 جىلدىڭ سوڭىنا جوسپارلانىپ وتىر. جول قۇرىلىسى مامىر ايىندا باستالادى. «زاڭ مەن ءتارتىپ» قاعيداتىنا سايكەس بۇل جوبا وڭىرلىك دەپارتامەنتتىڭ باقىلاۋىنا الىندى. ويتكەنى تسيفرلىق تەڭگە پلاتفورماسى بيۋدجەت شىعىسىنىڭ اشىقتىعىن قامتاماسىز ەتەدى. قاناتقاقتى جوبا ماتەريالداردى جەتكىزۋشىلەر مەن جۇمىستى ورىندايتىن مەردىگەرلەرگە دەيىنگى بارلىق كەزەڭدە بيۋدجەت قارجىسىن ماقساتتى پايدالانۋعا كەپىلدىك بەرەدى. ەڭ باستىسى سىبايلاس جەمقورلىق قاۋپىنىڭ الدىن الامىز», دەيدى نۇرلان جاحين.
باسشى ورىنباسارىنىڭ پىكىرىنشە, تاڭبالانعان تسيفرلىق تەڭگە تەك كوزدەلگەن جۇمىستاردى ورىنداۋعا جۇمسالادى. مۇنداي قارجىنى قولما-قول اقشاعا اينالدىرۋعا, وزگە قاجەتتىلىكتەرگە قايتا باعىتتاۋعا جول بەرىلمەيدى. ال بۇل جول 1989 جىلى پايدالانۋعا بەرىلگەن. سودان بەرگى 30 جىلدان استان مەرزىمنەن بەرى جوندەۋ كورمەگەن. ەكى اۋداننىڭ ارالىعىن جالعايتىن جولدىڭ جالپى ۇزىندىعى –136 شاقىرىم, ەنى – 7 مەتر. جول جوندەلگەننەن كەيىن قىزىلقوعا جانە جىلىوي اۋدانىنىڭ ارالىعىنا تىكەلەي قاتىناۋعا بولادى.
قىزىلقوعا اۋدانىنىڭ تۇرعىندارى قۇلسارى قالاسىنا بارۋ ءۇشىن ماقات اۋدانىنداعى دوسسور كەنتى ارقىلى وتەتىن جولمەن قاتىناۋشى ەدى. اقتوبە مەن وڭتۇستىك, شىعىس جانە سولتۇستىك وڭىرلەرىنەن ماڭعىستاۋعا باراتىن جۇرگىزۋشىلەر دوسسور كەنتى ارقىلى اينالىپ جۇرەدى.
«جولدى تولىق جوندەگەننەن كەيىن اقتوبە وبلىسى باعىتىنان كەلە جاتقان كولىكتەر مۇقىر اۋىلى ارقىلى قۇلسارى قالاسىنا تىكە شىعادى. بۇل اسىرەسە جۇك كولىكتەرى ءۇشىن ءتيىمدى باعىت بولادى. جولدا ءجۇرۋ ۇزاقتىعى كەم دەگەندە 2 ساعاتقا قىسقارادى», دەيدى جول سالاسىنىڭ ماماندارى.
جۇرگىزۋشىلەر دە اتالعان جولدىڭ تەزىرەك جوندەلگەنىن قالايدى. «مۇقىر-قۇلسارى» باعىتىنداعى جولدىڭ بويىندا ەكى ەلدى مەكەن بار. ءبىرى – قوڭىراۋلى, ەكىنشىسى – تاسقۇدىق. ەكى اۋىل دا قىزىلقوعا اۋدانىنىڭ اكىمشىلىك اۋماقتىق بولىنىسىنە كىرەدى. قوڭىراۋلىنى مەكەن ەتكەندەر ءتورت ت ۇلىكپەن كۇن كورىپ وتىر. تاسقۇدىق ەلدى مەكەنىنىڭ كەيبىر تۇرعىنى مۇناي تاسىمالداۋ كومپانياسىندا جۇمىس ىستەپ ءجۇر.
اتىراۋ وبلىسى
