اۋدان ورتالىعىنان 90 شاقىرىم قاشىقتىقتا ورنالاسقان نۇرا ەلدىمەكەنى بىلتىرعى تورعاي مەن ىرعىز وزەندەرىنىڭ تاسۋىنان قاتتى زارداپ شەگىپ, بىرنەشە تۇرعىن ءۇي مەن تەمىربەك جۇرگەنوۆ اتىنداعى ورتا مەكتەپ عيماراتى سۋ استىندا قالدى. جاز ورتاسىنا دەيىن سۋ ورتاسىندا قالعان مەكتەپ عيماراتى مۇلدە جارامسىز جاعدايعا جەتتى.
باسپانالارى سۋعا كەتكەن تۇرعىندارعا نۇرا اۋىلىنىڭ ىرگەسىندەگى سارىوبا دەگەن قىراتتان بىرنەشە ءۇي سالىنا باستاعاندا, جەكە ينۆەستور «قۋانىشبەك» جشس-ءى ەسەبىنەن 100 ورىندىق مەكتەپ قۇرىلىسى باستالىپ, از ۋاقىتتا پايدالانۋعا بەرىلدى. سونىمەن قاتار مەكتەپ جانىندا بۇلدىرشىندەرگە ارنالعان ورتالىق تا سالىندى.
قازىرگى كەزدە 105 وقۋشى جاڭا مەكتەپتە وقۋ جىلىن اياقتاۋعا جاقىن. نىسان الداعى ۋاقىتتا مەملەكەتتىك مەنشىككە الىنباقشى. نۇرا ەلدىمەكەنىنىڭ تۇرعىندارى جاڭا باسپانادا تۇرۋ مۇمكىندىگىنە يە بولعان قۋانىشتارىن جەتكىزە وتىرىپ, كوكتەمگى-كۇزگى لايساڭدا جۇرۋگە مۇلدە جارامايتىن «ىرعىز-نۇرا» تاسجولىن جوندەۋدى سۇرادى. ءوڭىر باسشىسى اۋىلىشىلىك جولدى جوندەۋ جاقىن ارالىقتا جوسپارعا ەنگىزىلەتىنىن, ونىمەن قوسا نۇرا اۋىلىندا مادەنيەت ءۇيى, دارىگەرلىك امبۋلاتوريا سالىناتىنىن ايتتى.
اقتوبە وبلىسى.
