كوللاجدى جاساعان – امانگەلدى قياس, «EQ»
ەلىمىزدە سالىق جۇيەسى قايتا جاڭعىرىپ جاتىر. ۇلتتىق ەكونوميكا ءمينيسترى سەرىك جۇمانعارين سالىق سالۋ سالاسىنا سەرپىن بەرەتىن بىرنەشە ماڭىزدى وزگەرىستى ايتتى. ەڭ باستى جاڭالىق – سالىق ەسەپتىلىگى 30%-عا قىسقارادى. بۇل كاسىپكەرلەرگە «تىنىس الۋ» مۇمكىندىگىن بەرەدى: بۇرىن تولتىراتىن قاعاز-قۇجات ازايادى, ەسەپ بەرۋ جەڭىلدەيدى. سونداي-اق سالىق ورگاندارى كاسىپكەرگە كەمشىلىگىن ايتىپ, بىردەن ايىپپۇل سالمايدى. ياعني تەكسەرۋ ەسكەرتۋ سيپاتىندا جۇرگىزىلەدى. قاتەلەسسەڭ – تۇزەتۋگە مۇمكىندىك بار.
– بۇل رەتتە سالىق ەسەپتىلىگى 30%-عا قىسقارادى. ءبىز كامەرالىق باقىلاۋ تاسىلدەرىن تۇبەگەيلى وزگەرتۋدى ۇسىنامىز. ەگەر قازىر بۇل باقىلاۋ ءتاسىلى بولسا, وندا بولاشاقتا بۇل ۇدەرىس بۇزۋشىلىقتاردى جويۋ سالاسىنان سايكەسسىزدىكتەر انىقتاۋ سالاسىنا اۋىسىپ, ەسكەرتۋ سيپاتىنا يە بولادى. سالىق بەرەشەگىن ماجبۇرلەپ ءوندىرىپ الۋ تاسىلدەرى دە وزگەرەدى, – دەدى مينيستر.
تاعى ءبىر جاقسى جاڭالىق – شاعىن جانە ورتا بيزنەسكە ارنالعان ارنايى سالىق رەجىمى جەڭىلدەتىلەدى. بۇرىن كاسىپكەر قىزمەتكەر سانىن اسىرىپ السا, اۆتوماتتى تۇردە جۇيەدەن شىعىپ قالاتىن. ەندى ولاي ەمەس.
– ەندى ورتا جانە شاعىن بيزنەسكە ارنالعان ارناۋلى سالىق رەجىمى وڭايلاتىلعان دەكلاراتسيا نەگىزىندەگى ارناۋلى سالىق رەجىمى دەپ اتالادى. كىرىس ءليميتى – قازىرگىدەي 600 مىڭ ايلىق ەسەپتىك كورسەتكىش بولىپ ساقتالادى. قىزمەتكەرلەر سانى بويىنشا شەكتەۋلەر الىنىپ تاستالادى. مولشەرلەمە – 4% جانە ونى ءماسليحاتتار 50%-عا دەيىن تومەندەتۋى مۇمكىن. ۇكىمەت رەجىمدى تەك بەلگىلى ءبىر قىزمەت تۇرلەرىنە قولدانۋدى ۇسىندى جانە باستى شارت – تەك B2C وپەراتسيالارى, – دەدى س.جۇمانعارين.
دەمەك جاڭا جۇيە – حالىققا تىكەلەي قىزمەت كورسەتەتىن كاسىپكەرلەرگە (B2C) ارنالعان. ياعني ناۋبايحانا, تىگىنشى, ءدامحانا, شاشتاراز سياقتى قاراپايىم كاسىپ يەلەرىنە بۇل – ۇلكەن مۇمكىندىك. ەندى بۇرىنعىداي جەتى ءتۇرلى سالىق رەجىمى بولمايدى, تەك ۇشەۋى قالادى: ءوزىن-ءوزى جۇمىسپەن قامتىعاندارعا ارنالعان, وڭايلاتىلعان دەكلاراتسيا نەگىزىندەگى جانە شارۋا قوجالىقتارىنا ارنالعان.
بىلەتىندەرىڭىزدەي, ماجىلىستە سالىق كودەكسىنىڭ جاڭا جوباسى ءبىرىنشى وقىلىمدا ماقۇلداندى. قۇجاتتاعى ۇسىنىستار از ەمەس – ولار ەلدىڭ سالىق جۇيەسىنە تۇبەگەيلى وزگەرىس اكەلمەك. ۇلتتىق ەكونوميكا مينيسترلىگى سالىق جانە كەدەن ساياساتى دەپارتامەنتى ديرەكتورىنىڭ ورىنباسارى نۇرلىبەك شايماحانوۆتىڭ ايتۋىنشا, بۇل وزگەرىستەر ەل ەكونوميكاسىنا تىڭ سەرپىن بەرەدى.
– كاسىپكەرلەر ءۇشىن ەڭ باستى جاڭالىق – ارناۋلى سالىق رەجىمىن قولدانۋعا شەكتەۋ بولمايدى. بۇرىن تەك ناقتى قىزمەت تۇرلەرىنە عانا رۇقسات ەتىلسە, ەندى ءتىزىم قىسقارىپ, رۇقسات ەتىلمەيتىن قىزمەتتەر عانا ناقتى بەلگىلەنەدى. بۇل – شاعىن جانە ورتا بيزنەس ءۇشىن ۇلكەن مۇمكىندىك. سونىمەن قاتار ارناۋلى رەجىممەن جۇمىس ىستەيتىن كاسىپكەرلەر قوسىلعان قۇن سالىعىن تولەمەي-اق 2,3 ملرد تەڭگەگە دەيىن اينالىم جاساي الادى. مينيسترلىكتىڭ الدىن الا ەسەپتەۋىنشە, ۇسىنىلعان وزگەرىستەر ەل بيۋدجەتىنە قوسىمشا 5 ترلن تەڭگەگە جۋىق تابىس ءتۇسىرۋى مۇمكىن. ونىڭ 3 ترلن-ى – قوسىلعان قۇن سالىعىن كوتەرۋدىڭ ناتيجەسى. قالعان بولىگى – سالىق جەڭىلدىكتەرىن قىسقارتۋ, بانكتەرگە, قۇرىلىس جانە قارجى سەكتورىنا قاتىستى سالىق مولشەرلەمەسىن ارتتىرۋ, سونداي-اق مەملەكەتتىك باعالى قاعازداردان تۇسەتىن تابىسقا سالىق ەنگىزۋ ارقىلى جينالماق, – دەيدى ول.
