يۋري پيا جەتەكشىلىك ەتەتىن UMC جۇرەك ورتالىعىنىڭ دارىگەر-زەرتتەۋشىلەر توبى 13 ءساۋىر مەن 13 قازان ارالىعىندا جاپونيانىڭ وساكا قالاسىنداعى دۇنيەجۇزىلىك Expo-2025 كورمەسىندە «ALEM» اتتى بىرەگەي جۇيەنى تانىستىرادى. دونورلىق جۇرەكتى ساقتاۋ جانە تاسىمالداۋعا ارنالعان قۇرىلعى «Heart Center Foundation» قوعامدىق قورىنىڭ قولداۋىمەن جۇزەگە اسىرىلعان.
ALEM (Astana Life Ex-situ Machine) قۇرىلعىسى – دونورلىق ورگانداردىڭ ومىرشەڭدىگىن 24 ساعاتتان استام ۋاقىت بويى ساقتاۋعا مۇمكىندىك بەرەتىن يننوۆاتسيالىق ازىرلەمە. بۇل قازاقستان سياقتى اۋماعى ۇلكەن ەلدەر ءۇشىن اسا ماڭىزدى دۇنيە. سەبەبى ترانسپلانتولوگيا سالاسىنداعى باستى ماسەلەلەردىڭ ءبىرى – اعزالاردى دەر كەزىندە جەتكىزۋ. ءداستۇرلى ادىسپەن ورگان نەبارى 4-6 ساعات ساقتالسا, ALEM تەحنولوگياسى اعزاداعى جاعدايعا بارىنشا ءتيىمدى ورتا جاساپ, قاجەتتى تەمپەراتۋرانى ساقتاپ, قاندى وتتەگىمەن قانىقتىرىپ, ومىرلىك ماڭىزدى كورسەتكىشتەردى ناقتى ۋاقىت رەجيمىندە باقىلاۋعا مۇمكىندىك بەرەدى.
ء«بىز اۋا رايىنىڭ قولايسىزدىعىنا بايلانىستى دونورلىق جۇرەكتى ۋاقىتىندا الا الماي, كۇردەلى جاعدايعا تاپ بولدىق. سول كەزدە قازاقستان ءۇشىن قولجەتىمدى ءارى ءتيىمدى بولاتىن ءوز جۇيەمىزدى جاساۋ يدەياسى تۋىندادى», دەپ ەسكە الادى جوبا جەتەكشىسى ءارى UMC باسقارما توراعاسى يۋري پيا.
قيىن ساتتە پايدا بولعان تىڭ يدەيا قازىر تيىمدىلىگى مەن قاۋىپسىزدىگىن جانۋارلارعا جاسالعان كلينيكاعا دەيىنگى زەرتتەۋلەر بارىسىندا دالەلدەگەن قۇرىلعىعا اينالدى. تانىمال كارديوحيرۋرگتىڭ ايتۋىنشا, اتالعان قۇرىلعىدا دونورلىق اعزانى تەك ساقتاپ قانا قويماي, قاجەت بولعان جاعدايدا ەمدەۋ مۇمكىندىگى بار. بۇل ترانسپلانتاتسيا ناتيجەسىن جاقسارتىپ, كومەككە مۇقتاج ادامدارعا ءۇمىت سىيلارى ءسوزسىز.
«حيرۋرگ رەتىندە ايتارىم – ءبىر ادام ەشتەڭە تىندىرا المايدى. مىقتى ناتيجە كوماندالىق جۇمىسقا تىكەلەي بايلانىستى. ءبىزدىڭ اۋقىمدى جوبامىز ءۇشىن بىلىكتى ماماندار فيزيكالىق, ينتەللەكتۋالدىق تۇرعىدا تىنباي تەر توكتى. وسى رەتتە, «Heart Center Foundation» قوعامدىق قورى ماتەريالدىق قولداۋ بىلدىرمەگەندە, بۇل جوبا استە جۇزەگە اسپايتىن ەدى», دەپ اعىنان جارىلدى يۋري پيا.
مەديتسينالىق جۇيەنى ازىرلەۋگە ينجەنەرلەرمەن قاتار كارديوحيرۋرگتەر, پەرفۋزيولوگتار, انەستەزيولوگ-رەانيماتولوگتار, مورفولوگتار, مەيىرگەر ءىسى ماماندارى, زەرتحاناشىلار جانە UMC جۇرەك ورتالىعىنىڭ وزگە دە قىزمەتكەرلەرى اتسالىستى. يدەيادان باستاپ قۇرىلعىنى قۇرۋعا دەيىنگى جول بىرنەشە جىلعا سوزىلدى. ەندى الدا ALEM جۇيەسىنە كلينيكالىق زەرتتەۋلەر جۇرگىزۋ كەزەڭى تۇر.
مىڭداعان ادامنىڭ ءومىرىن قۇتقارۋعا جول اشاتىن قۇرىلعى دۇنيەجۇزىلىك Expo-2025 كورمەسىندە حالىقارالىق قاۋىمداستىققا كەڭىنەن تانىستىرىلىپ جاتىر. ايتا كەتەيىك, بيىلعى كورمەنىڭ باستى تاقىرىبى – «Designing Future Society for Our ءLives»(«ومىرىمىز ءۇشىن بولاشاق قوعامدى قالىپتاستىرۋ»). «QazExpoCongress» ۇلتتىق كومپانياسىمەن بەزەندىرىلگەن ALEM جوباسى قازاقستان پاۆيلونىنداعى «Connecting Lives» («ومىرلەردى بىرىكتىرۋ») ايماعىندا ۇسىنىلدى. ALEM-ءنىڭ 2025 جىلعى Expo كورمەسىنە قاتىسۋى سەرىكتەستەردىڭ قولداۋىنىڭ ارقاسىندا مۇمكىن بولدى.
«بۇل ءونىم ناعىز سەرپىلىس اكەلدى. تەحنولوگيا بۇرىننان بەلگىلى بولعاندىقتان, ونى جاڭاشىلدىق دەپ قابىلداي المايسىڭ. دەسە دە, ءىس جۇزىندە كلينيكاعا دەيىنگى باستاپقى سىناق دەڭگەيىندە بولسا دا ونى جۇزەگە اسىرىپ, ءبىر تاۋلىككە دەيىن قولدانۋ – مەديتسينا ءۇشىن ۇلكەن جەتىستىك دەر ەدىم. ALEM جۇيەسىندە ورگاندى تەك ساقتاماي, دەنەدەن تىس جەردە ەمدەۋگە بولاتىنى ماڭىزدى», دەپ اتاپ ءوتتى جوبا اۆتورلارىنىڭ ءبىرى, UMC جۇرەك ورتالىعىنىڭ كلينيكالىق اكادەميالىق كارديوحيرۋرگيا دەپارتامەنتىنىڭ ديرەكتورى تيمۋر لەسبەكوۆ.
Expo-2025 كورمەسىنە قاتىسۋ – ترانسپلانتولوگيانى دامىتۋدىڭ ماڭىزدىلىعىن جەتكىزۋ, كاسىبي قاۋىمداستىقتى ورتاق ماقسات جولىندا بىرىكتىرۋ, سونداي-اق قازاقستاننىڭ عىلىمي جانە تەحنولوگيالىق الەۋەتىن كورسەتۋ مۇمكىندىگى. مۇنداي پىكىردى «Heart Center Foundation» قوعامدىق قورىنىڭ ديرەكتورى مۇرات زاۋىروۆ تا العا تارتىپ وتىر. قور كارديولوگيا, كارديوحيرۋرگيا جانە ترانسپلانتولوگيا سالالارىندا وزىق تەحنولوگيالاردى, ءبىلىم بەرۋ باستامالارىن جانە اعارتۋشىلىق جوبالاردى قولداۋ ارقىلى يننوۆاتسيالاردى دامىتۋعا ايتارلىقتاي ۇلەس قوسىپ كەلەدى.
«بۇل – قازاقستان ءۇشىن تاريحي ءسات. ءبىز حالىقارالىق دەڭگەيدەگى كورمەدە العاش رەت وسىنداي اۋقىمدى مەديتسينالىق جوبانى – ALEM قۇرىلعىسىن كوپشىلىك نازارىنا ۇسىندىق. دۇنيەجۇزىلىك كورمەگە قاتىسۋ الەم بويىنشا ترانسپلانتولوگيا مۇمكىندىكتەرىن كەڭەيتىپ, يننوۆاتسيالاردىڭ ماڭىزدىلىعىنا نازار اۋدارتىپ, دارىگەرلەردى, عالىمداردى جانە ينجەنەرلەردى بىرىكتىرىپ, ادام ءومىرىن ساقتاپ قالۋ جولىندا جاڭا شەشىمدەردى بىرلەسە ىزدەۋگە مۇمكىندىك بەرەدى. ءبىزدىڭ باستى ماقساتىمىز – ازىرلەمەنى جۇرتشىلىققا جاي عانا كورسەتۋ ەمەس, جاھاندىق تەحنولوگيالىق جانە مەديتسينالىق پروگرەستىڭ ءبىر بولىگىنە اينالۋ», دەپ تولىقتىردى مۇرات زاۋىروۆ.
جوبا اۆتورلارىنىڭ ايتۋىنشا, ALEM ءتارىزدى تەحنولوگيالار ءداستۇرلى كلينيكالىق شەشىمدەردىڭ شەكاراسىنان شىعىپ, مەديتسينالىق عىلىمنىڭ كوكجيەگىن كەڭەيتەدى جانە وزىق تەحنولوگيالاردى سولارعا مۇقتاج ادامدار ءۇشىن قولجەتىمدى ەتەدى.
