ابايدىڭ اقىندىعىنان كەيىن, ونىڭ مۋزىكالىق مۇراسى كەڭ اۋقىمدا زەرتتەلەتىن تاقىرىپ. حاكىم ساز ونەرىنە دە ولەڭگە قوياتىن تالاپپەن قاراعانى انىق اڭعارىلادى. ونىڭ اندەرىندەگى وزگەشە ءپىشىن, تىڭ ىرعاق, ەرەك اۋەن قازاق حالقىنىڭ مۋزىكالىق تالعامىن جاڭا بيىككە كوتەردى. ال ونىڭ شاكارىم, اقىلباي سىندى رۋحاني شاكىرتتەرى ابايدىڭ ءان مەكتەبىن وزىنشە جالعاستىرىپ اكەتتى.
فيلولوگيا عىلىمدارىنىڭ كانديداتى, پروفەسسور بولات قورعانبەك اباي اندەرىنىڭ رۋحاني مازمۇنىن زەرتتەۋدە جاڭاشا كوزقاراس كەرەكتىگىن جەتكىزدى.
«ەكى ءتۇرلى زامان مەن مەكەندە ءومىر سۇرسە دە, رۋحاني كەمەلدىككە جەتكەن جانداردىڭ وي-پىكىرى ءبىر ارنادا توعىسىپ جاتادى. ءبىزدىڭ زەرتتەۋ نىسانىمىزداعى اباي دا وسىنداي جان. ول ءان-ولەڭدەرىن ا. پۋشكينمەن, م. لەرمونتوۆپەن ءبىر دەڭگەيدە يىقتاسىپ وتىرىپ شىعاردى. ءومىرىنىڭ سوڭعى جىلدارىندا حاكىم نازارىن سىرتقى الەمگە ەمەس, ءوزىنىڭ ىشكى الەمىنە قاراي اۋداردى. كاتارسيستىك ءھال كەشتى. سول سەزىمىن «ۋلى سيا, اششى تىلمەن» جەتكىزە ءبىلدى», دەدى ب. قورعانبەك.
مادەني جيىندا اباي جانە ونىڭ شاكىرتتەرىنىڭ ەل ىشىنە تاراي قويماعان بىرقاتار اندەرى ورىندالدى.
