كونگو دەموكراتيالىق رەسپۋبليكاسىنىڭ شىعىسىندا, يتۋري پروۆينتسياسىندا ەبولا ۆيرۋسى ءورشىپ تۇر. افريكانىڭ اۋرۋلاردى باقىلاۋ جانە الدىن الۋ ورتالىعى (Africa CDC) شامامەن 246 كۇدىكتى جاعداي مەن 65 ءولىمدى تىركەدى. بۇل تۋرالى Associated Press اگەنتتىگى حابار تاراتتى.
ينفەكتسيانىڭ نەگىزگى وشاعى مونگۆالۋ جانە رۆامپارا اۋداندارىندا شوعىرلانعان. جاقىن ماڭداعى بۋنيا قالاسىندا دا قازىر تەكسەرىلىپ جاتقان كۇدىكتى جاعدايلار انىقتالدى. زەرتحانادا راستالعان ينفەكتسيالارى بار ءتورت پاتسيەنت كوز جۇمدى.
الدىن الا تەستىلەۋ بويىنشا 20 سىنامانىڭ 13-ءى وڭ ناتيجە بەردى.
ەبولا – سيرەك كەزدەسەتىن, بىراق وتە قاۋىپتى ۆيرۋستىق اۋرۋ. ول جۇقتىرعان ادامنىڭ بيلوگيالىق سۇيىقتىقتارىمەن نەمەسە لاستانعان زاتتارمەن تىكەلەي بايلانىس ارقىلى بەرىلەدى. وسىدان بەس اي بۇرىن كونگو رەسمي تۇردە كەساپاتتىڭ اياقتالعانىن جاريالاعان ەدى. ول كەزدە 43 ادام قايتىس بولدى. ەندى مىنە ۆيرۋستىڭ جاڭا ۇشقىنى قايتا شىعىپ وتىر.
قازىر ماماندار اۋرۋدىڭ جاڭا تولقىنىن قاي شتامم تۋدىرعانىن انىقتاپ جاتىر. ەڭ قاۋىپتى جانە كەڭ تارالعان نۇسقا – زاير ەبولاۆيرۋسى. ول ادامدار مەن پريماتتاردا اۋىر گەمورراگيالىق قىزبانى تۋدىرادى.
Africa CDC كونگو, ۋگاندا جانە وڭتۇستىك سۋدان بيلىگى مەن حالىقارالىق سەرىكتەستەردىڭ قاتىسۋىمەن شۇعىل جينالىستى باستادى. كۇن تارتىبىندە – ەپيدەميولوگيالىق قاداعالاۋدى, شەكارالىق باقىلاۋ مەن الدىن الۋ شارالارىن كۇشەيتۋ, سونداي-اق بىرلەسكەن ءىس-قيمىلداردى ۇيلەستىرۋ ماسەلەلەرى تۇر.
يتۋري پروۆينتسياسى استاناسى كينشاسادان مىڭ شاقىرىمنان استام جەردە ورنالاسقان. ايماققا جەتۋ وتە قيىن. وندا ناشار جولدار, قارۋلى توپتاردىڭ بەلسەندىلىگى جانە حالىقتىڭ جوعارى كوشى-قونى, سونىڭ ىشىندە تاۋ-كەن جۇمىستارىمەن بايلانىس تىعىز. وسىنىڭ بارلىعى دارىگەرلەردىڭ جۇمىسىن ەداۋىر قيىنداتادى جانە ۆيرۋستىڭ تارالۋ قاۋپىن ارتتىرادى.
