وقۋشى ورىندارىنىڭ تاپشىلىعىن ازايتۋ ماقساتىندا 2024 جىلدىڭ قاراشا ايىندا №59 مەكتەپ-گيمنازياسىنىڭ 300 ورىندىق قوسالقى عيماراتىنىڭ قۇرىلىسى مەن سەيسميكالىق بەرىكتىگىن كۇشەيتە وتىرىپ كۇردەلى جوندەۋ جۇمىستارى اياقتالماق. سونىمەن قاتار, بيىلعى اقپان ايىندا №195 مەكتەپكە 450 ورىندىق قوسالقى عيماراتتىڭ قۇرىلىسى اياقتالىپ, وتكەن جىلى №83 گيمنازيا فيليالى قايتا جاڭعىرتۋدان وتكەن.
بيىل جىل سوڭىنا دەيىن №50 مەكتەپتە سەيسميكالىق كۇشەيتۋ ارقىلى كۇردەلى جوندەۋ جۇمىستارى اياقتالادى.
بۇدان بولەك, ءتورت جوبا بويىنشا جوبالىق-سمەتالىق قۇجاتتاما ازىرلەنىپ جاتىر: №198 مەكتەپكە 600 ورىندىق قوسالقى عيمارات سالۋ, №142 مەكتەپتى قايتا جاڭعىرتۋ, №78 مەكتەپكە 450 ورىندىق قوسالقى عيمارات سالىپ, كۇردەلى جوندەۋ جۇرگىزۋ جانە №170 مەكتەپتىڭ ەسكى عيماراتىن بۇزىپ, جاڭا قوسالقى عيمارات سالۋ كوزدەلگەن.
ۇلتتىق «جايلى مەكتەپ» جوباسى اياسىندا, بيىل تۇركسىب اۋدانىندا 6100 ورىندىق ءتورت جاڭا مەكتەپتىڭ قۇرىلىسى اياقتالادى دەپ بولجانىپ وتىر.
بيىل مامىردا جاس قانات شاعىن اۋدانىندا دامۋ جانە شىعارماشىلىق ورتالىعىنىڭ قۇرىلىسى باستالادى. جوسپار بويىنشا قۇرىلىس 2026 جىلدىڭ ماۋسىم ايىندا اياقتالۋى ءتيىس.
