قوستاناي قالاسىنداعى №17 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى اقبوتا ەرماعانبەتوۆا 5-9 سىنىپتارعا ساباق بەرەدى. ونىڭ ەنگىزگەن ەرەكشە ءادىسى بويىنشا وقۋشىلار كوركەم شىعارما كەيىپكەرلەرىن سۋرەت ارقىلى وڭاي تاني الادى. اۆتور شىعارما ءتىلىن بالا جەڭىل تۇسىنەتىندەي ەتىپ وڭدەپ, شاعىن ماتىنمەن تولىقتىرعان. جاس پەداگوگتىڭ كوميسكە اينالدىرعان تۋىندىلارىنىڭ قاتارىندا مىرجاقىپ دۋلات ۇلىنىڭ «باقىتسىز جامال», بەيىمبەت ءمايليننىڭ «شۇعانىڭ بەلگىسى», تىنىمباي نۇرماعانبەتوۆتىڭ «اناسىن ساعىنعان بالا» جانە قورقىت اتا, تولەن ابدىك پەن اسقار التاي ەڭبەكتەرى بار. مۇعالىم بارلىق اۆتورلىق قۇقىقتى Egov.kz پورتالى ارقىلى تىركەپتى.
«بۇل ءادىس ماتىندەردى وقۋشىلاردىڭ جاس ەرەكشەلىكتەرىنە قاراي بەيىمدەپ, سويلەمدەردى قىسقارتىپ, ماتەريالدى وڭاي ءارى تۇسىنىكتى قابىلداۋعا مۇمكىندىك جاسايدى. وسى رەتتە مەن ءۇشىن كوميكستەر – قىزىق فورمات قانا ەمەس, ءبىلىم الۋشىلاردىڭ نازارىن اۋدارىپ, سيۋجەتتەردى جاقسى ەستە ساقتاۋعا كومەكتەسەتىن قۇرال», دەيدى ا.ەرماعانبەتوۆا.
جاس تا بولسا, كەيىپكەرىمىز قازىردىڭ وزىندە قازاقستاندا, رەسەيدە جانە جاپونيادا جاريالانعان 30-دان اسا عىلىمي ماقالا مەن 5 ادىستەمەلىك قۇرالدىڭ اۆتورى اتانىپ ۇلگەرگەن ەكەن. ىزدەنىمپاز ۇستازدىڭ الدىن كورگەن, تامىرى تەرەڭدە جاتقان ۇلت رۋحانياتىنىڭ قازىنالارىنان ءنار العان وقۋشىلارى دا – وبلىستىق, رەسپۋبليكالىق بايقاۋلاردىڭ جۇلدەگەرلەرى.
