ەڭبەك جانە حالىقتى الەۋمەتتىك قورعاۋ مينيسترلىگى ءباسپاسوز قىزمەتىنىڭ مالىمەتىنشە, پورتالعا جولدانعان ءوتىنىشتىڭ ناتيجەسىندە 167,8 مىڭ وڭالتۋدىڭ تەحنيكالىق قۇرالدارىن (وتق), 7,7 مىڭ ىمداۋ ءتىلى قىزمەتىن, 24,4 مىڭ جەكە كومەكشىنىڭ, 11,7 مىڭ ساناتوريلىك-كۋرورتتىق ەمدەۋ قىزمەتىن الدى.
مۇگەدەكتىگى بار ادامداردى وڭالتۋ قۇرالدارىمەن قامتاماسىز ەتۋدە پروتەزدىك-ورتوپەديالىق, سۋردوتەحنيكالىق, تيفلوتەحنيكالىق, گيگيەنالىق قۇرالدار, سونداي-اق ورىندىق-اربالار بەرىلەدى.
بۇگىندە پورتالدا 703 ارناۋلى الەۋمەتتىك قىزمەت كورسەتۋشى, 979 وتق جەتكىزۋشىسى, 31 مىڭنان استام جەكە كومەكشى, 759 ىمداۋ ءتىلى مەن 129 ساناتوريلىك-كۋرورتتىق ەمدەۋ قىزمەتتەرىن ۇسىنۋشى تىركەلگەن.
«2020 جىلى ەلىمىزدە الەۋمەتتىك قىزمەتتەر پورتالى ىسكە قوسىلدى. بۇل پلاتفورما مۇگەدەكتىگى بار ازاماتتارعا تەحنيكالىق قۇرالدار مەن وڭالتۋ قىزمەتتەرىن تىكەلەي جەتكىزۋشىلەردەن ءوز بەتىنشە تاڭداۋعا ءارى ساتىپ الۋعا مۇمكىندىك بەردى. پورتالداعى قىزمەت تۇرلەرىنە تاپسىرىس ەلەكتروندىق تسيفرلىق قولتاڭبا ارقىلى راستالادى. ءوزارا جاساسقان شارتقا سايكەس قىزمەت الۋشى, ءونىم بەرۋشى, ياعني قىزمەت ءتۇرىن ۇسىنۋشى تاراپ ءوز مىندەتتەمەلەرىن بۇزسا, 14 كۇننەن كەشىكتىرمەي پورتالدا ءتيىستى اقپاراتتى جاريالايدى. سونىمەن قاتار تاۋارعا نەمەسە كورسەتىلەتىن قىزمەت تۇرىنە قاتىستى بەرگەن تاپسىرىستان باس تارتىپ, وزگە قىزمەت ۇسىنۋشىنى تاڭداي الادى. كورسەتىلگەن قىزمەتتەر مەن تاۋارلار تۋرالى پىكىرىن جازۋعا قۇقىلى», دەيدى ەڭبەك جانە حالىقتى الەۋمەتتىك قورعاۋ مينيسترلىگى ينكليۋزيا دەپارتامەنتىنىڭ باس ساراپشىسى جانار تىنىبەكوۆا.
جەتكىزۋشىلەردى تىركەۋ, تىركەۋدەن شىعارۋ سونداي-اق تاۋارلار مەن كورسەتىلەتىن قىزمەتتەردى پورتالعا ورنالاستىرۋ جەرگىلىكتى اتقارۋشى ورگاندار جانىنداعى ارنايى كوميسسيانىڭ قورىتىندىسى نەگىزىندە جۇزەگە اسىرىلادى. الەۋمەتتىك قىزمەتتەر پورتالىنىڭ ماسەلەلەرى جونىندەگى كوميسسيا ءونىم بەرۋشىلەرگە مونيتورينگ جۇرگىزەدى. كورسەتىلەتىن تاۋارلار مەن قىزمەتتەردىڭ ساپاسىنا قاتىستى مۇگەدەكتىگى بار ازاماتتاردىڭ شاعىمدارىن بەس جۇمىس كۇنى ىشىندە قاراۋمەن اينالىسادى.
