بۇل – تۇركى حالىقتارىنىڭ اراسىندا قاز ءوسىرۋدىڭ ەجەلگى ادىستەرى مەن تاسىلدەرىن ناسيحاتتاۋعا باعىتتالعان ءىس-شارا. سونىمەن قاتار وسىناۋ ءىس-شاراعا ء«بىرىنشى حالىقارالىق تۇركi ەتنومادەني فەستيۆالى» دەگەن قوسالقى اتاۋ دا بەرىلگەن. سوندىقتان فەستيۆالعا تۇركىتىلدەس ەلدەر ماجارستاننىڭ «Gallicoop», باشقۇرتستاننىڭ «باشكيرسكايا پتيتسا», ماري ەل رەسپۋبليكاسىنان «لوتفۋللين» كومپانيالارىنىڭ, سونداي-اق تاتارستان مەن چۋۆاشيانىڭ قۇس ءوسىرۋ سالاسىنىڭ وكىلدەرى قاتىستى.
قىزىلجارداعى قازعا ارنالعان فەستيۆال شاھاردىڭ ەڭ ۇلكەن سارايى ن.پوگودين اتىنداعى ورىس دراما تەاترىندا اشىلدى. ونىڭ رەسمي سالتاناتىنا ماجارستاننىڭ باس كونسۋلى سوكە سابولچ, تاتارستاننىڭ تاتار كاسىپكەرلەرىنە كومەك جونىندەگى دۇنيەجۇزىلىك قاۋىمداستىعىنىڭ اتقارۋشى ديرەكتورى فاريد ۋرازاەۆ جانە باشقۇرتستان, چۋۆاشيا جانە ماري ەل رەسپۋبليكاسىنان قۇس ءوسىرۋ سالاسىنىڭ باسشىلارى, ءوز ەلىمىزدەن باتىس قازاقستان, اقمولا, قاراعاندى, قوستاناي, سولتۇستىك قازاقستان وبلىستارىنىڭ اۋىل شارۋاشىلىعى ماماندارى قاتىستى.
جيىندى سولتۇستىك قازاقستان وبلىسىنىڭ اكىمى عاۋەز نۇرمۇحامبەتوۆ اشىپ, جۇرگىزىپ وتىردى. «اۋىل» پارتياسىنىڭ توراعاسى سەرىك ەگىزباەۆ اتالعان ءىس-شارانىڭ ماڭىزىنا توقتالا كەلە, قامتىلعان ماسەلەلەر سالانىڭ دامۋىنا تىڭ سەرپىن بەرەرىنە سەنىم ءبىلدىردى.
«بۇل بىرەگەي باستاما ىنتىماقتاستىقتى دامىتۋ, بىرلىكتى نىعايتۋ جانە قازاقستان حالقىنىڭ ەكونوميكالىق مۇراسىن ساقتاۋ, اۋىل تۇرعىندارى اراسىندا قاز وسىرۋگە قىزىعۋشىلىق ارتتىرۋ, اگروونەركاسىپتىك كەشەنگە ينۆەستيتسيا تارتۋدى كوزدەگەن يگى ءىس-شارا بولارىنا سەنىمدىمىز», دەدى ول.
سولتۇستىك قازاقستان وبلىستىق اۋىل شارۋاشىلىعى باسقارماسىنىڭ باسشىسى داۋرەن توقۋشىنوۆ وڭىردەگى قۇس شارۋاشىلىعىن دامىتۋدىڭ كەلەشەگى مەن ماسەلەلەرى تۋرالى ايتتى. سونىمەن قاتار ول وسى سالا بويىنشا شەتەلدىكتەرمەن ىنتىماقتاسۋعا ازىرلىگىن ءبىلدىردى.
فورۋم بارىسىندا قاز شارۋاشىلىعى بويىنشا ماجارستان مەملەكەتىمەن ىنتىماقتاسۋدى نىعايتۋ, سالانى دامىتۋدىڭ پراكتيكالىق نەگىزدەرى, قۇراماجەم جانە ول ءۇشىن كونتسەنتراتتار ءوندىرۋ, مامىق وڭدەۋ, سويۋ مەن وتكىزۋ, باتىس قازاقستان وبلىسىندا قاز ءوسىرۋ تاجىريبەسى مەن الماتى وبلىسىندا قاز شارۋاشىلىعىن دامىتۋ بارىسى سياقتى ماسەلەلەر تالقىلاندى.
بۇعان قوسا وسىدان ءبىراز جىل بۇرىن قاناتقاقتى جوبا رەتىندە اقمولا وبلىسىندا بىرنەشە وتباسىنا 160 قاز بالاپانىنان باعۋ ءۇشىن تەگىن بەرىلگەنىن, ولاردىڭ جەمى مەن ۆەتەرينارلىق باقىلاۋدى وزدەرى جۇرگىزگەنىن, ال ارادا 4-5 اي وتكەندە باعۋشىلار فەرمەرلەرگە ونىڭ سانىنىڭ تەك 25 پايىزىن عانا قايتارىپ, شىعىنىن وتەگەنىن, ال قالعانىن وزدەرى قالاۋىنشا ساتىپ, 1,5 ملن تەڭگەدەي تابىس تاپقانى ايتىلدى. قازىر سول وتباسىلارىنىڭ كەيبىرى 1,5 مىڭداي بالاپان اسىراپ, ساتۋعا قول جەتكىزىپ وتىر ەكەن. مىنە, وسىنداي وزىق تاجىريبەلەردى تاراتۋ جاعى ناسيحاتتالدى.
فەستيۆال بارىسىندا قاز ەتىنەن جاسالعان تاعامدار ۇسىنىلدى. رەسەي جەرىنەن كەلگەن تاتار, باشقۇرت جانە ت.ب حالىقتاردىڭ اسپازدارى دايىنداعان بۇل دامدەر ءتىل ءۇيىردى. ولار قىزىعۋشىلارعا تاعامدى دايىنداۋ رەتسەپتەرىمەن دە ءبولىستى. ال تەاتر الدىنداعى الاڭدا فەرمەرلىك جانە كادەسىي تاۋارلارىنىڭ جارمەڭكەسى قىزىپ جاتتى. وسى جەردە ەر-توقىم تۇرلەرى, ات ابزەلدەرى سورەلەردە سامساپ تۇردى. فەستيۆال قالانىڭ باس الاڭىندا دا جالعاسىپ, مۇندا اسىق اتۋ, ارمرەستلينگ, گىر كوتەرۋ, قازدار جارىسى جانە ت.ب سپورت جارىستارى مەن ەتنوفولكلورلىق انسامبلدەر كونتسەرتى ءوتتى. بۇرىن-سوڭدى قىزىلجاردا بولماعان قاز جارىسىنىڭ دا وزىندىك قىزىعى كوپ بولىپ, كورەرمەندەردى ءماز قىلدى. 20 قاز قاتىسقان قورشاۋلى جولدىڭ بويىندا كورەرمەندەر قازداردى تەلەفوندارىمەن ءتۇسىرىپ الەك. وسىلايشا, سولتۇستىك قازاقستان كوكتەمىنىڭ العاشقى كۇندەرىندە ەلدى ەلەڭ ەتكىزگەن, حالىقتى شاتتىققا بولەگەن ەرەكشە دۋمان سالتانات قۇردى.
سولتۇستىك قازاقستان وبلىسى
