ساپار اياسىندا رومان سكليار باۆاريا پرەمەر-ءمينيسترىنىڭ ورىنباسارى – ەكونوميكا, وڭىرلىك دامۋ جانە ەنەرگەتيكا ءمينيسترى حۋبەرت ايۆانگەرمەن جانە حالىقارالىق ىنتىماقتاستىق پەن ەۋروپا ماسەلەلەرى جونىندەگى ءمينيسترى ەريك بايسۆەنگەرمەن كەزدەسۋلەر وتكىزدى.
باۆاريا فەدەرالدى جەرى ۇكىمەتىنىڭ عيماراتىندا وتكەن ە.بايسۆەنگەرمەن كەزدەسۋدە قازاقستان مەن باۆاريا ۇكىمەتتەرى اراسىنداعى ىنتىماقتاستىقتى دامىتۋ ماسەلەلەرى تالقىلاندى.
ءوز كەزەگىندە ە.بايسۆەنگەر باۆاريانىڭ قازاقستانمەن جان-جاقتى ىسكەرلىك جانە گۋمانيتارلىق بايلانىستاردى ودان ءارى كەڭەيتۋگە ۇلكەن قىزىعۋشىلىق تانىتاتىنىن اتاپ ءوتىپ, ءتيىستى باستامالاردى قولداۋعا دايىن ەكەنىن ءبىلدىردى.
ح.ايۆانگەرمەن كەزدەسۋ بارىسىندا تاراپتار قازاقستان مەن باۆاريا اراسىنداعى ساۋدا-ەكونوميكالىق قاتىناستاردىڭ جاعدايى تۋرالى پىكىر الماسىپ, ءارى قاراي دامىتۋ كەلەشەگىن تالقىلادى. ح.ايۆانگەر قازاقستاننىڭ قارقىندى دامۋىن ءارى ەكونوميكاسىن ارتاراپتاندىرۋداعى جەتىستىكتەرىن اتاپ ءوتىپ, ەكىجاقتى بايلانىس ءوزارا ءتيىمدى مۇمكىندىكتەرگە جول اشاتىنىن, اسىرەسە بيزنەس ءۇشىن يگىلىگى مول ەكەنىنە توقتالدى.
وسى تۇرعىدا ماڭىزدى قادام رەتىندە 2025 جىلعى مامىر ايىنىڭ سوڭىندا شىمكەنت–ميۋنحەن تىكەلەي اۋە رەيسىنىڭ ىسكە قوسىلۋى كۇتىلىپ وتىر.
سونىمەن قاتار ر.سكليار مەن ح.ايۆانگەر وسى كۇنى وتكەن دوڭگەلەك ۇستەلدە بايانداما جاساپ, «قازاقستان – باۆاريا بيزنەس-ديالوگى: قازاقستان ونەركاسىپ جانە اۋىل شارۋاشىلىعى تەحنولوگيالارى مەن لوگيستيكا سالاسىنداعى سەرىكتەس رەتىندە» تاقىرىبىندا پىكىر الماستى.
ءىس-شاراعا باۆاريانىڭ شامامەن 70 كاسىپورنىنىڭ باسشىلارى قاتىستى. قازاقستانداعى كاسىپكەرلىكتى دامىتۋ تاجىريبەسىمەن جانە ەلدەگى قارجىلىق ءارى ىسكەرلىك مۇمكىندىكتەر تۋرالى Horsch, Linde Gas AG جانە Rhenus سياقتى كومپانيالاردىڭ وكىلدەرى پىكىرىن ءبولىستى.
ءوز سوزىندە ح.ايۆانگەر باۆاريانىڭ قازاقستانمەن تىعىز ەكونوميكالىق بايلانىستارىن جوعارى باعالادى. ونىڭ ايتۋىنشا, قازاقستان بۇگىنگى تاڭدا باۆاريانىڭ تمد جانە ورتالىق ازيا ەلدەرى اراسىنداعى ەڭ ءىرى ساۋدا سەرىكتەسى بولىپ سانالادى.
ر.سكليار سونداي-اق دوڭگەلەك ۇستەلدىڭ تەڭ ۇيىمداستىرۋشىسى بولعان «باۆاريا ەكونوميكاسى وداعى» ىسكەرلىك قاۋىمداستىعىنىڭ توراعاسى بەرترام بروسساردتپەن كەلىسسوز جۇرگىزدى.
باۆاريا – ەكونوميكالىق دامۋ بويىنشا گەرمانياداعى جەتەكشى فەدەرالدىق جەر سانالادى. 2024 جىلى ونىڭ ءىجو كولەمى شامامەن $800 ملرد-تى (گەرمانيا – 4,5 ترلن) قۇراپ, ونى الەمدە 22-ورىنعا قويدى. بۇل كورسەتكىش ارگەنتينا, وڭتۇستىك افريكا, ءباا, شۆەتسيا, يزرايل, اۋستريا جانە بەلگيا سياقتى ەلدەردەن جوعارى.
نەمىس ستاتيستيكاسى بويىنشا 2024 جىلى قازاقستان مەن باۆاريا اراسىنداعى ساۋدا كولەمى 4,7 ملرد ەۋروعا جەتتى, بۇل قازاقستان مەن گەرمانيا اراسىنداعى جالپى ساۋدا كولەمىنىڭ شامامەن جارتىسىنا تەڭ. باۆاريانىڭ مۇناي يمپورتىنىڭ جارتىسىن قازاقستاننان جەتكىزىلەتىن شيكىزات قۇرايدى.
ەگەر قازاقستان گەرمانيا ءۇشىن ساۋدا سەرىكتەستەرىنىڭ ىشىندە 43-ورىندا بولسا, باۆاريا ءۇشىن 21-ورىندا تۇر. باۆارياعا يمپورت كولەمى بويىنشا قازاقستان 15-ورىندا, ياعني بەلگيا, تۇركيا, جاپونيا, ۆەتنام, وڭتۇستىك كورەيادان جوعارى كورسەتكىشكە يە.
