«قازاقتىڭ قوناەۆى» – ۇلتىمىزدىڭ دارا پەرزەنتى دىنمۇحامەد قوناەۆتىڭ ۇزاق جىلدار ۇلت مۇددەسىنە ساي اتقارعان قايراتكەرلىك ەڭبەگىنە ارنالادى. قۋانىش سۇلتانوۆتىڭ ەستەلىكتەرىندە تاريحي وقيعالار مەن تولقۋلى ساتتەر باياندالادى. وداقتىق ۇستەمدىك جاعدايىنداعى ادىلەتسىزدىكتەر مەن قايشىلىقتار ساراپتالىپ, قاراپايىم تىلمەن وقۋشى نازارىنا ۇسىنىلادى.
قۋانىش سۇلتانوۆ پەن جۋرناليست گۇلسىم ەڭسەپوۆانىڭ «وتىز جىلدىڭ وي-تولعاۋى» اتتى سۇحباتتارىنا باستى قۇندىلىق – تاۋەلسىزدىك جايى, ونى قاستەرلەۋ, ۇلتتىق قاۋىپسىزدىگىمىزدى كۇشەيتۋ, ەلىمىزدىڭ دۇنيەجۇزىلىك قوعامداستىقتاعى, حالىقارالىق بەدەلىنىڭ ءوسۋى, ەل تۇرمىسىنىڭ ساپاسىن كوتەرۋ سىندى ماڭىزدى ماسەلەلەردى ارقاۋ ەتكەن. سۇحبات ناقتى دەرەكتەرگە سۇيەنە وتىرىپ, جەڭىل اڭگىمە تۇرىندە باياندالادى.
القالى جيىننىڭ تىزگىنىن ۇستاعان مەملەكەت جانە قوعام قايراتكەرى دارحان مىڭباي تولىمدى ەڭبەكتىڭ تاريحي ماڭىزدى تۇستارىنا توقتالدى. سول ءداۋىردىڭ بەينەسىن زەردەلەيتىن دەرەكتەر ەستەلىكتەرمەن ورىلە سۋرەتتەلەتىنىن ايتتى.
ادەبي ءىس-شارادا ءسوز العان مەملەكەت جانە قوعام قايراتكەرى مىرزاتاي جولداسبەكوۆ قۋانىش سۇلتان ۇلىنىڭ ەل وركەندەۋى مەن يگىلىگى جولىندا اتقارعان كەلەلى ىستەرىن اتاپ ءوتىپ, جينالعاندارعا اق باتاسىن بەردى.
سونداي-اق پرەزيدەنت كەڭەسشىسى, اكادەميك باۋىرجان وماروۆ قوس جيناقتىڭ ۇلتتىق مۇددە, ەلدىك ماقسات جولىندا قانداي ماڭىزعا يە ەكەنىن تىلگە تيەك ەتتى.
ال مەملەكەت جانە قوعام قايراتكەرلەرى ءادىل احمەتوۆ تاريح پاراقتارىنان سىر شەرتكەن مۇنداي تۋىندىلاردىڭ جارىققا شىعۋى, ەڭ الدىمەن ەگەمەندىكتىڭ ارقاسى ەكەنىن اتاپ ءوتتى.
«قوس جيناقتى پاراقتاپ وتىرىپ مىناداي وي ءتۇيدىم. «كەز كەلگەن ىرگەلى مەملەكەتتىك تۇلعا – سول ءوزى ءومىر سۇرگەن ءداۋىردىڭ ايناسى». وسى ءسوزدى قۋانىش سۇلتان ۇلىنا دا ايتار ەدىك. سول زاماننىڭ بەينەسى كىتاپ بولىپ شىققان وسى ەستەلىكتەردە تۇر. ەڭ باستىسى, سىندارلى كەزەڭنىڭ سىرىن اقتارعان وسىنداي ەڭبەكتىڭ جازىلۋى – ەل ەگەمەندىگىنىڭ ارقاسى. تاۋەلسىزدىگىمىز بولماسا, مۇنداي ازات ويلى پىكىرلەر اشىق جاريالانباس ەدى», دەدى ءادىل احمەتوۆ.
بۇدان بولەك قىرىمبەك كوشەرباەۆ, اباي تاسبولاتوۆ, ماحمۇد قاسىمبەكوۆ, سايلاۋ باتىرشا ۇلى, ميربولات جاقىپوۆ, ەرالى توعجانوۆ سىندى بەلگىلى تۇلعالار دا جاڭا تۋىندى حاقىنداعى تولىمدى ويلارىمەن ءبولىسىپ, ەستەلىكتەرىن
ايتتى.
رۋحاني ءىس-شاراعا زيالى قاۋىم وكىلدەرى, مەملەكەت جانە قوعام قايراتكەرلەرى مەن دەپۋتاتتار قاتىستى.
