ول بالا كەزىنەن تەحنيكاعا قۇمار بولىپ ءوستى. 1981 جىلى قازىرگى تاراز (بۇرىنعى جامبىل) قالاسىنداعى №56 كاسىپتىك-تەحنيكالىق ۋچيليششەگە وقۋعا ءتۇستى. سول كەزدە بار بولعانى 14 جاستا ەدى.
«ۋچيليششەنى 1984 جىلى كران ءماشينيسى ماماندىعىمەن ءبىتىردىم. وقۋ ورنىنان جولدامامەن تاراز قالاسىنداعى سيليكات زاۋىتىنا جۇمىسقا جىبەردى. اتىراۋلىق مارات دەگەن جىگىت سول جىلى كۇزدە تارازداعى اسكەري بولىمگە بورىشىن وتەۋگە شاقىرىلعان ەكەن. قۇرىلىس سالاسىنداعى اسكەري ءبولىم بولعاندىقتان, سولداتتار ءبىزدىڭ زاۋىتتا جۇمىس ىستەدى. ءبىز سول كەزدە تانىستىق», دەيدى ب.سانقىباەۆا.
تارازداعى اسكەري ءبولىمدى 1986 جىلعى كوكتەمدە اتىراۋعا كوشىرىپتى. سول كەزدە مارات قىزىلوردالىق بويجەتكەنگە وتباسىن قۇرۋعا ۇسىنىس بىلدىرگەن. بىراق ءوزى اسكەري بورىشىن وتەپ جۇرگەندىكتەن, بولاشاق كەلىنىن اناسى الىپ كەتكەن.
«مارات اتىراۋعا اسكەري بولىممەن بىرگە كەلدى. ۇيگە اسىعىپ تۇراتىن ەدى. وفيتسەرلەر «ۇيىڭە ءجيى باراسىڭ» دەپ, ونى اقتوبە وبلىسىنىڭ حرومتاۋ قالاسىنا اۋىستىرىپ جىبەردى. سودان ۇيگە قاراشا ايىندا كەلدى. مارات ەكەۋمىز 2 ۇل, 1 قىز تاربيەلەپ وسىردىك. وكىنىشكە قاراي, كۇيەۋىم ومىردەن ءوتىپ كەتتى», دەيدى ول.
وعان العاشىندا مۇنايلى شاھارداعى بالشىق باتپاق پەن ماساعا ۇيرەنۋ وڭاي بولماپتى. سول كەزدە كۇيەۋىنىڭ: «قينالىپ جۇرگەنىڭدى بىلەمىن. ءسال شىداساڭ, ۇيرەنىپ كەتەسىڭ. بالالارىمىزدىڭ قىزىعىن بىرگە كورەمىز», دەگەن ءسوزى جىگەر بەرىپتى.
«قازىر كۇيەۋىمنىڭ ومىردە جوقتىعى وزەگىمدى ورتەيدى. دەگەنمەن ۇلدار ەرجەتتى, قىز بويجەتتى. ۇلكەن ۇلىم كولىك جۇرگىزۋشىسى, قىزىم لوكوموتيۆ دەپوسىندا باس ەسەپشى بولىپ جۇمىس ىستەيدى. كىشى ۇلىم تەپلوۆوز ءماشينيسىنىڭ كومەكشىسى, جاقىندا ءبىلىمىن جەتىلدىرۋگە اتتاندى», دەيدى باحىتگۇل قۋانىشبايقىزى.
ونىڭ ايتۋىنشا, كران ءماشينيسى ماماندىعىممەن جۇمىس ىستەگەنىنە 41 جىل بولىپتى. بۇل – از ۋاقىت ەمەس. جۇمىس بابىنا وراي بىرنەشە مەكەمەگە اۋىسقان. بىراق ماماندىعىنا ادالدىقتان تايماي, وزگە كاسىپتى تاڭداماعان. اتىراۋعا كەلگەن سوڭ, 1996 جىلعا دەيىن «تاستەمىر» اق-دا 10 جىل جۇمىس ىستەدى. ودان كەيىنگى ءتورت جىلىن اتىراۋ تەمىرجول ستانساسىنداعى ۆاگون دەپوسىنا ارنادى. 2003–2010 جىلدارى «قازكومسەرۆيس» جشس-دا دە كران ءماشينيسى رەتىندە جۇمىسىن ودان ءارى جالعاستىردى. كەيىنگى 15 جىلدان بەرى «اقجايىق-7» جشس-دا جۇمىس ىستەپ كەلەدى.
ء«ار ماماندىقتىڭ وزىندىك ەرەكشەلىگى بار. كران ماشينيسىنە قىراعىلىق پەن دالدىك قاجەت. ويتكەنى بيىككە كوتەرگەن جۇكتى ەشتەڭەگە ۇرىندىرماي, كوزدەلگەن جەرگە ءدال قويۋ كەرەك. جالپى, تاجىريبە جيناعان مامانعا جۇمىس ىستەۋدىڭ تۇك قيىندىعى جوق. بيىل جۇمىسشى ماماندىعىنا ەرەكشە كوڭىل ءبولىنىپ جاتىر. پرەزيدەنتتىڭ قولىنان ماراپات الۋدىڭ, اقورداعا كىرۋدىڭ اسەرى بولەك ەكەن. بۇل توسىنسىي بولدى. مەملەكەتتىڭ قاراپايىم جۇمىسشىلارعا قولداۋ كورسەتەتىنىن سەزىندىم», دەدى ول.
اتىراۋ وبلىسى
