سۋرەت: kaz.zakon.kz
كولىك ءمينيسترى مارات قاراباەۆ قوستاناي وبلىسىندا «ورتالىق – باتىس» اۆتوجولىنىڭ جوبالاۋ جۇمىستارىنىڭ بارىسىن تەكسەردى. بۇگىندە جوبالىق قۇجاتتاما ازىرلەنىپ, قۇرىلىستى باستاۋعا دايىندىق جۇرگىزىلىپ جاتىر. جاڭا باعىت اقمولا, قوستاناي جانە اقتوبە وبلىستارىنىڭ شالعاي اۋداندارىن استانا جانە ترانسكاسپي حالىقارالىق كولىك دالىزىمەن بايلانىستىرادى. بۇل اۆتوجول بىرنەشە ماڭىزدى ماسەلەلەردى شەشەدى. قازىرگى «استانا – اتباسار – ەسىل – قوستاناي – قارابۇتاق – ىرعىز» باعىتى 1 438 شاقىرىمدى قۇرايدى. ال جاڭا جول ىسكە قوسىلعان سوڭ قاشىقتىق 865 شاقىرىمعا دەيىن قىسقارادى.
وڭىرلەردىڭ ەكونوميكالىق دامۋىنا سەرپىن بەرىپ, جول بويىنداعى ەلدى مەكەندەرمەن تاۋار تاسىمالى ارتادى, بيزنەس پەن تۋريزم سالالارى داميدى. سونداي-اق قوستاناي وبلىسىنىڭ ارقالىق قالاسى, امانگەلدى جانە جانگەلدين اۋداندارى, اقمولا وبلىسىنىڭ ەگىندىكول جانە جارقايىڭ اۋداندارى, اقتوبە وبلىسىنىڭ ىرعىز اۋدانى استاناعا جاقىنداي تۇسەدى. بۇل جەرگىلىكتى تۇرعىنداردىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. سونىمەن قاتار اۆتوجول ەلىمىزدىڭ ورتالىق ايماقتارىنان ترانسكاسپي حالىقارالىق كولىك باعىتىنا تىكەلەي شىعۋدى قامتاماسىز ەتىپ, ەلىمىزدىڭ لوگيستيكالىق الەۋەتىن ارتتىرادى. جول ەكى جولاقتى, ەنى 8 مەتر بولادى. تاۋلىگىنە 3 مىڭعا جۋىق كولىك ءجۇرىپ وتەدى دەپ جوسپارلانىپ وتىر. كولىك جەلىسى 70 مىڭ تۇرعىنى بار 13 ەلدى مەكەندى قامتيدى.
اۆتوجولدان بولەك, ارقالىق قالاسىندا ماڭىزدى ينفراقۇرىلىمدىق نىسان – اۋەجاي قالپىنا كەلتىرىلەدى. قازىرگى ۋاقىتتا جوبالاۋ-سمەتالىق قۇجاتتاما ازىرلەنىپ, قۇرىلىس جۇمىستارىنا دايىندىق باستالدى. جوبانىڭ نەگىزگى پارامەترلەرىندە جالپى اۋدانى 3 200 شارشى مەتر بولاتىن ەكى قاباتتى جاڭا تەرمينال سالىنادى. ول ساعاتىنا 70 جولاۋشىعا قىزمەت كورسەتە الادى. ۇزىندىعى 2 500 مەترلىك ۇشۋ-قونۋ جولاعى, تاكسي جولى مەن پەررون جاڭعىرتىلادى. اەروناۆيگاتسيالىق جانە مەتەورولوگيالىق جابدىقتار جاڭارتىلىپ, زاماناۋي ستاندارتتارعا سايكەستەندىرىلەدى. قوستاناي, استانا جانە الماتىعا قولجەتىمدى باعامەن سۋبسيديالاناتىن رەيستەر ىسكە قوسىلادى. بۇل جوبا ارقالىق قالاسىن وڭىرلىك كولىك حابى رەتىندە دامىتۋعا مۇمكىندىك بەرەدى. اۋەجايدىڭ قايتا ىسكە قوسىلۋى ايماق تۇرعىندارىنىڭ ساپالى اۋە قاتىناسىنا قول جەتكىزۋىنە ىقپال ەتەدى.
«ورتالىق – باتىس» اۆتوجولى مەن ارقالىق اۋەجايىن قايتا جاڭعىرتۋ – مەملەكەت باسشىسىنىڭ كولىك-ترانزيتتىك الەۋەتتى كۇشەيتۋ جونىندەگى تاپسىرماسىن جۇزەگە اسىرۋداعى ماڭىزدى قادام. بۇل جوبالار ەلىمىزدىڭ كولىك ينفراقۇرىلىمىن دامىتۋعا, وڭىرلەردىڭ الەۋمەتتىك-ەكونوميكالىق ورلەۋىنە جانە حالىقتىڭ ءومىر ءسۇرۋ ساپاسىن جاقسارتۋعا باعىتتالعان. الداعى ۋاقىتتا وسى باستامالاردىڭ ويداعىداي ىسكە اسۋى قازاقستاننىڭ ىشكى جانە حالىقارالىق كولىك بايلانىستارىن ودان ءارى نىعايتۋعا نەگىز بولادى.
