بۇل كورسەتكىشتەر قارعىن سۋدىڭ ارتۋى, كوكتەمگى تاسقىنعا سايكەس قاۋىپسىز سانالادى. ازىرگە تەك ەسىل اۋدانىنداعى ۇلكەن توراڭعۇل كولىنىڭ سۋى قاۋىپتى دەڭگەيگە جەتىپ تۇر. 31 ناۋرىزداعى مالىمەتكە قاراعاندا, پەتروپاۆل قالاسىنداعى جاعاجاي اۋماعىندا «ۋچيتەل-1», «ۋچيتەل-2» ساياجايلارىنا باراتىن جولدى 20-30 سم تەرەڭدىكپەن جالپى ۇزىندىعى 40 مەتردەي اۋماقتا قارعىن سۋ باسىپ قالدى. دەگەنمەن مۇنداعى تۇرعىن ۇيلەردى سۋ باسۋ قاۋپى ازىرگە جوق. پد قىزمەتكەرلەرى وسىندا تۇرىپ جاتقان 19 وتباسىن سۋ باسۋ قاۋپى جوق ايماقتارعا كوشىرۋ جۇمىستارىن جۇرگىزىپ جاتىر.
«قازسۋشار» رمك وبلىستىق فيليالىنىڭ ديرەكتورى شۇعايىپ ءيباتۋلليننىڭ ايتۋىنشا, بيىل بىلتىرعىداي قاۋىپ جوق. ەسىل وزەنى اعىنىنىڭ نەگىزگى رەتتەۋشىسى – سەرگەەۆ سۋ تورابى. بيىل وزەننىڭ وسى توراپتاعى دەڭگەيى 92 سم-گە جەتىپ, قازىر 3 سم تومەندەگەن. «بۇل بىلتىرعى دەڭگەيگە قاراعاندا ءۇش ەسە تومەن. سوندىقتان سۋ تاسقىنى بولار دەگەن قاۋىپ جوق», دەدى ول.
وتكەن جىلعى الاپات تاسقىننان كەيىن سەرگەەۆ, پەتروپاۆل سۋ توراپتارىندا اعىمداعى جوندەۋ جۇمىستارى, سۋ تاسقىنىنا قارسى ءىس-شارالار جۇرگىزىلدى. «جۇمىستىڭ نەگىزگى تۇرلەرى سەرگەەۆ, پەتروپاۆل سۋ توراپتارىنىڭ جاعالاۋىن نىعايتۋ, بەتكەيلەرىن كوتەرۋگە باعىتتالدى. قاڭتار ايىندا سەرگەەۆ گيدروقۇرىلىسى بوگەتىنىڭ ماڭىنداعى تومەنگى بەفتە ءتۇبىن تەرەڭدەتۋ جونىندە جۇمىستار ورىندالىپ, 940 تەكشە مەتر توپىراق قوسپاسى الىنىپ تاستالدى. ەسىل وزەنىنىڭ تابيعي ارناسىن قالپىنا كەلتىرۋ ماقساتىندا وزەننىڭ تىرەك قۇرىلىسىنىڭ تومەنگى ۋچاسكەسىن تاسپەن تولتىرۋ جۇرگىزىلدى», دەدى ش.يباتۋللين.
ناۋرىزدان باستاپ فيليال بازاسىندا, سەرگەەۆ, پەتروپاۆل سۋ توراپتارىندا تاۋلىك بويى جۇمىسشىلار كەزەكشىلىگى ۇيىمداستىرىلدى. كەزەكشىلەر مۇددەلى ورگانداردى سۋ قويمالارىنىڭ سۋىن تولتىرۋ, اعىزۋ جونىندەگى اقپاراتتارمەن حاباردار ەتىپ وتىرادى. قازىر سەرگەەۆ, پەتروپاۆل سۋ توراپتارى شتاتتىق رەجىمدە جۇمىس ىستەپ تۇر.
تجد ءباسپاسوز قىزمەتىنىڭ باسشىسى ەۆگەني جۋراۆلەۆ مالىمدەگەندەي, سەرگەەۆ سۋ قويماسىنىڭ سۋى قالىپتاعى جىلداردىڭ سايكەس مەرزىمىنە قاراعاندا 16%-عا ارتقان. Cۋ دەڭگەيى – 802 ملن تەكشە مەتر, بارلىق سىيىمدىلىق – 890 شارشى مەتر.
وبلىستا ازىرگە اۆتوموبيل جولدارىنا 24 رەت سۋ شىققان فاكتىلەر تىركەلگەن. كەنتىشىلىك 2 469 سۋاعار قۇبىرلار تازالانعان, 238 مىڭ مەتر ارىقتار اشىلعان. بيىل ەلدى مەكەندەرگە تۇسكەن قار كولەمى بىلتىرعىعا قاراعاندا شاعىنداۋ بولسا دا, 1 ملن 428 مىڭ تەكشە مەتر قار سىرتقا شىعارىلعان. قالا, اۋىل-اۋدانداردا قارعىن سۋدان پايدا بولعان 113 مىڭ تەكشە مەتر سۋ موتوپومپا, سورعىشتارمەن سىرتقا ايدالعان. وزەننىڭ تاسقىن سۋلارىن بوگەۋگە ارنالعان دامبالاردى كوتەرۋ, نىعايتۋ ماقساتىندا 170 مىڭ دانا قاپشىقتارعا سالىنعان ينەرتتى ماتەريالدار ۇيىلگەن.
سەڭ كەپتەلىسىن بولدىرماس ماقساتىندا ەسىل وزەنىنىڭ بويىنداعى 50 ۋچاسكەدە جارىلىس جاسالدى. ونىڭ 43-ءى پەتروپاۆل قالاسىنىڭ ماڭىندا, ال جەتەۋى قىزىلجار, ەسىل, شال اقىن, ع.مۇسىرەپوۆ, ايىرتاۋ, اقجار, ءۋاليحانوۆ اۋداندارىندا جۇرگىزىلدى. جارىلىس 23133 شارشى مەتر اۋماقتى قامتىدى.
گيدرومەتتىڭ مالىمەتىنە قاراعاندا, وبلىستاعى شاعىن وزەندەر سۋىنىڭ كوتەرىلۋى ءبىرشاما جوعارى. ماسەلەن, گۋساكوۆكا اۋىلىنىڭ ماڭىنداعى بابىقبۇرلىقتا – 46 سم, اققانبۇرلىقتا – 62 سم.
قىزىلجار اۋدانىنا تجم 28 237 اسكەري بولىمشەسىنەن 45 جاۋىنگەر مەن 5 ارناۋلى تەحنيكا كومەككە كەلدى. بۇگىندە سۋ تاسقىنىنىڭ جاعدايى قالىپتى.
سولتۇستىك قازاقستان وبلىسى
