فوتو: ۇلتتىق ۇلانىنىڭ ءباسپاسوز قىزمەتى
ۇلاندىقتار بروندى كولىكتەردى تەحنيكالىق تۇرعىدا تەكسەرىپ, اسكەري تەحنيكانىڭ كورپۋستارىن جاڭالاپ جاتىر. ودان بولەك دوڭگەلەكتەرىن قارالاپ, ءمىنسىز كورىنۋىنە ءمان بەرۋدە.
شەرۋگە ۇلتتىق ۇلاننىڭ زاماناۋي 17 بروندى تەحنيكاسى, ونىڭ ىشىندە «بارىس» 6 × 6, «الان-2», سونداي-اق «Cobra II» قاتىسادى. بۇدان بولەك قاۋىپتىلىگى جوعارى ايماقتاردا 17 ادامعا دەيىنگى جەكە قۇرامدى تاسىمالداۋعا قاۋقارى بار «ۋرال ۆۆ» ماشيناسى ۇسىنىلادى.
«وق وتكىزبەيتىن دوڭگەلەكتى بروندى كولىكتەر جەكە قۇرام مەن جۇكتەردى تاسىمالداۋعا, سونداي-اق قىزمەتتىك-جاۋىنگەرلىك مىندەتتەردى ورىنداۋعا ارنالعان», دەدى بروندى تانك قىزمەتىنىڭ باستىعى ارسەن شايماردانوۆ.
شەرۋ كەزىندە تەحنيكانىڭ ۇزدىكسىز جۇمىس ىستەۋىن قامتاماسىز ەتۋ ءۇشىن جاۋىنگەرلىك ماشينالاردىڭ ەكيپاجدارى, جۇرگىزۋشىلەرى, تەحنيكالىق ماماندارى جانە مەديتسينالىق قامتاماسىز ەتۋ توپتارى جۇمىلدىرىلعان.
ايتا كەتەيىك, ۇلتتىق ۇلاننىڭ قۇرامىندا مەحانيكالاندىرىلعان كولوننادان باسقا شەرۋگە 400-دەن استام اسكەر قاتىسادى. ونىڭ ىشىندە پاترۋلدىك-بەكەتتىك قىزمەتتىڭ اسكەري قىزمەتشىلەرى مەن «بۇركىت» ارنايى ماقساتتاعى بولىمشەسىنىڭ جاۋىنگەرلەرىنەن تۇراتىن ەكى كولوننانىڭ ساپ تۇزەپ ءوتۋى جوسپارلانعان. سونداي-اق, قازاقستاننىڭ كۇش قۇرىلىمدارىنىڭ قۇراما وركەسترىنىڭ ساپىنداعى قۇقىقتىق ءتارتىپ اسكەرلەرىنىڭ 30 اسكەري قىزمەتشىسى جەڭىس شەرۋىن مۋزىكامەن سۇيەمەلدەيدى.
بيىل جەڭىس شەرۋىنە قر قارۋلى كۇشتەرىنىڭ, باسقا دا اسكەرلەرى مەن اسكەري قۇرالىمدارىنىڭ 4,5 مىڭ اسكەري قىزمەتشىسى قاتىسادى. العاش رەت قازاقستان اۋماعىندا قۇرىلعان اسكەري بولىمدەر جاۋىنگەرلىك تۋلارىن سالتاناتتى الىپ وتەدى. ساپ تۇزەگەن كولوننالار اسكەري جىلدارداعى كيىم ۇلگىسىندە بولادى.
