قازاقستاندىق گرەك-ريم كۇرەسىنىڭ بالۋانى ومار ساتاەۆ يوردانيانىڭ اممان قالاسىندا وتكەن ازيا چەمپيوناتىنىڭ كۇمىس جۇلدەگەرى اتاندى. 82 كەلىگە دەيىنگى سالماق دارەجەسىندە سىنعا تۇسكەن ساتاەۆ فينالعا دەيىن سەنىمدى جەتىپ, شەشۋشى بەلدەسۋدە يراندىق سپورتشى موحامماد ناگۋسيمەن كەزدەستى. تارتىستى وتكەن جەكپە-جەكتە قازاقستاندىق بالۋان 1:3 ەسەبىمەن ۇتىلىپ, كۇمىس مەدالدى يەلەندى.
فينالعا جەتۋ جولىندا ساتاەۆ جوعارى شەبەرلىگىن كورسەتىپ, جارتىلاي فينالدا جاپونيالىق بالۋان تايزو يوشيدونى مەرزىمىنەن بۇرىن جەڭدى.
ومار ساتاەۆتىڭ بۇل جەتىستىگى قازاقستان قۇراماسىنىڭ ازيا چەمپيوناتىنداعى تابىسىن تولىقتىرا ءتۇستى. بۇعان دەيىن ءالىمحان سىزدىقوۆ (130 كگ دەيىن) كۇمىس مەدال جەڭىپ السا, يبراگيم ماگومادوۆ (77 كگ دەيىن) پەن شاميل وجاەۆ (87 كگ دەيىن) قولا جۇلدەگەر اتانعان ەدى.
امماندا ءوتىپ جاتقان ازيا چەمپيوناتى قۇرلىقتىڭ ەڭ مىقتى بالۋاندارىن, سونىڭ ىشىندە وليمپيادا چەمپيوندارىنىڭ دا باسىن قوستى. ومار ساتاەۆ پەن ونىڭ كوماندالاستارىنىڭ ونەر كورسەتۋى قازاقستاندىق سپورتشىلاردىڭ جوعارى دەڭگەيدەگى دايىندىعىن جانە حالىقارالىق ارەنادا باسەكەگە قابىلەتتى ەكەنىن دالەلدەدى.
