الماتى اكىمى ەربولات دوساەۆ سالتاناتتى ءىس-شارادا جاڭارۋ, تاتۋلىق پەن بەرەكەنىڭ باستاۋى – ناۋرىز مەيرامىنىڭ ماڭىزىن اتاپ ءوتتى. حالقىمىزدىڭ ءداستۇرلى قازىناسى – سالت-ءداستۇرىنىڭ سان عاسىرلار بويى جاساسىپ, ۇرپاقتان ۇرپاققا جالعاسىپ كەلە جاتقانىن اتاپ ءوتتى. سالتاناتتى ءىس-شاراعا قازاقستاننىڭ ەڭبەك ەرى, حالىق ءارتىسى ءاسانالى ءاشىموۆ, حالىق قاھارمانى ءسات توقپاقباەۆ, قازاقستاننىڭ ەڭبەك ەرى اياگۇل ميرازوۆا, جازۋشىلار وداعىنىڭ توراعاسى مەرەكە قۇلكەنوۆ, باسقا دا زيالى قاۋىم وكىلدەرى قاتىسىپ, كوكتەم مەرەكەسىنە وراي قۇتتىقتاۋلارىن ارنادى.
«الماتى – ناۋرىز قۇشاعىندا» كونتسەرتى مەرەكەلىك ءىس-شارانىڭ ءسانىن اشا ءتۇستى. «دوس-مۇقاسان» ءانسامبلى, «سازگەن سازى» فولكلورلىق-ەتنوگرافيالىق ءانسامبلى, مايرا مۇحامەدقىزى, جانار ايجانوۆا, ومىرقۇل اينيازوۆ, تاعى دا باسقا تانىمال انشىلەر ونەر كورسەتتى.
رەسپۋبليكا سارايىنىڭ الدىندا ەرەكشە بەزەندىرىلگەن كيىز ۇيلەر تىگىلدى. «رۋحاني مۇرا» كيىز ۇيىندە اباي, جامبىل جانە دينا ويناعان مۋزىكالىق اسپاپتاردىڭ كوشىرمەسى قويىلىپ, كونتسەرت ءوتتى. «الماتىعا ساياحات» كيىز ۇيىندە قوناقتار قالانىڭ كورىكتى جەرلەرىن ۆيرتۋالدى فورماتتا تاماشالاي الدى. سونداي-اق شەبەر مارات بەكسۇلتانوۆتىڭ قولىنان شىققان نەبارى 20 مينۋت ىشىندە قۇراستىرۋعا بولاتىن «يننوۆاتسيالىق كيىز ءۇي» ورناتىلدى.
اباي الاڭىندا التىباقان ورناتىلىپ, ۇلتتىق ويىندار مەن ءتۇرلى جارىستار قىزدى. سونداي-اق اباي قۇنانباي ۇلىنىڭ 180 جىلدىعىنا ارنالعان ارت-نىساندار دا بوي كوتەردى. 21-22 ناۋرىز كۇندەرى كەشكى ۋاقىتتا الاڭدا بەلگىلى انشىلەر كونتسەرت قويدى.
فەستيۆال اياسىندا بىرنەشە كۇن بويى اۋقىمدى قولونەر جارمەڭكەسى جۇمىس ىستەيدى. قوناقتار اعاش ويۋ, زەرگەرلىك بۇيىم جاساۋ, بىلعارى وڭدەۋ جانە كيىز باسۋ ونەرىن تاماشالاي الادى. كيىز ۇيلەردە شەبەرلىك دارىستەرى ۇيىمداستىرىلىپ, قوناقتار توقىما توقۋ, ۇلتتىق ويۋ-ورنەكپەن اشەكەي بۇيىم دايىنداۋ جانە قازاقتىڭ ءداستۇرلى مۋزىكالىق اسپاپتارىن جاساۋ ونەرىن ۇيرەنە الادى.
وڭتۇستىك استانا بۇل كۇندەرى مەرەكە قۇشاعىندا. قالا قوناقتارى اۋەجايدان مەرەكەنىڭ سالتاناتىن سەزىنىپ, قۇرمەتكە بولەنىپ جاتسا, مادەني ورتالىقتار, جولاۋشى تاسىمالى بەكەتتەرىندە ءتۇرلى كورمەلەر ءوتىپ, ساۋدا ورىندارىندا قىزىلدى-جاسىلدى جارمەڭكە قىزىپ جاتىر.
قالادا مەرەكەلىك ءىس-شارالار 23 ناۋرىزعا دەيىن جالعاسادى. كۇن سايىن قوناقتار مەن تۇرعىندارى «Juldyzdy Almaty» فەستيۆالى اياسىندا كونتسەرتتەردى, تەاتر قويىلىمدارىن, ۇلتتىق ويىنداردى, ءتۇرلى پەرفورمانستار مەن قولونەر جارمەڭكەلەرىن تاماشالاي الادى.
الماتى
