«Deeptech بايگە» بايقاۋى – ينكۋباتسيا, اكسەلەراتسيا, Jas Venture, Go Abroad جانە باسقالارى سياقتى NU ستارتاپتارىن قولداۋ باعدارلامالارى تۇلەكتەرىنىڭ جوبالارىن بىرىكتىرەتىن العاشقى ءىرى, جەرگىلىكتى ءىس-شارا. بايقاۋعا قاتىسۋعا وتىنىمدەردى جيناۋ قاڭتار ايىنىڭ سوڭىندا باستالدى. 100-گە جۋىق ءوتىنىش ءتۇسىپ, جەتەكشى بيزنەسمەندەر مەن ۆەنچۋرلىق ينۆەستورلاردان تۇراتىن قازىلار القاسىنىڭ شەشىمىمەن فينالعا 10 جوبا ءوتتى. عىلىمي ازىرلەمەلەر مەن يننوۆاتسيالاردى ىلگەرىلەتۋگە, سونداي-اق حالىقارالىق دەڭگەيدە باسەكەگە قابىلەتتى deeptech-ستارتاپتاردىڭ ەكوجۇيەسىن قالىپتاستىرۋعا باعىتتالعان باستامانى NU-عا قاراستى «الەۋمەتتىك دامۋ قورى» قولدادى.
فينالدا 10 ستارتاپ جوبا تانىستىرىلدى, قاتىسۋشىلار مەديتسيناداعى جاساندى ينتەللەكتىدەن باستاپ, اۋىل شارۋاشىلىعىنداعى وزىق مونيتورينگ جۇيەلەرىنە دەيىن ءارتۇرلى سالادا يننوۆاتسيالىق شەشىمدەر ۇسىندى. ءار جوبا ءۇش مينۋتتىق بايانداۋدان (پيتچينگتەن) ءوتىپ, سودان سوڭ ستارتاپتىڭ نەگىزىن قالاۋشىلار قازىلار القاسىنىڭ سۇراقتارىنا جاۋاپ بەردى. ساراپشىلاردى جوبالاردىڭ ەرەكشەلىگى, نارىقتىق الەۋەتى, ءارى قارايعى جوسپارلارى جانە تانىستىرىلعان تەحنولوگيالاردى تاجىريبەلىك تۇرعىدا قولدانۋ ماسەلەلەرى قىزىقتىردى.
ۇيىمداستىرۋشىلاردىڭ ايتۋىنشا, قازىلار القاسىنىڭ قۇرامى توراعاسى پرەمەر-ءمينيستردىڭ ورىنباسارى ە.كوشەرباەۆ پەن عىلىم, ءبىلىم, بيزنەس سالالارىنىڭ جەتەكشى وكىلدەرىنەن قۇرالعان. قازىلار شەشىمىمەن سىياقىسى 12 ملن تەڭگە تۇراتىن ءبىرىنشى ورىندى جاۋىنگەرلىك درونداردى جاساۋعا ارنالعان يننوۆاتسيالىق پلاتفورما – «Game of drones» ستارتاپى جەڭدى. بۇل جوبا سيمۋلياتسيالار ارقىلى وقىتۋدىڭ نەعۇرلىم قولجەتىمدى, ءتيىمدى ادىستەرىن پايدالانادى. قازىرگى ۋاقىتتا ستارتاپتىڭ 23 ەلدەن 10 مىڭنان اسا پايدالانۋشىسى بار ەكەن. جوبانىڭ نەگىزىن قالاۋشى ابىلايحان جاقانوۆ: «پلاتفورما – كيبەرسپورتتىڭ جاڭا فورماتى, مۇندا ويىنشىلار قوزعالىس جاساۋ ارقىلى شىنايى تەحنيكانى باسقارا الادى. الايدا بۇل تەحنولوگيانىڭ الەۋەتى ودان دا جوعارى: ستارتاپتىڭ شەشىمدەرىن اگرارلىق سەكتوردا, قورعانىس جانە ءوندىرىس سالالارىندا قولدانۋعا بولادى. وسى پلاتفورما نەگىزىندە كوماندا ۇشقىشتاردى دايارلاۋ قۇنىن ايتارلىقتاي تومەندەتۋدى ۇسىنىپ وتىر. ماسەلەن, اسكەري قىزمەتكەرلەردى دايارلاۋ شىعىنىن 100 ەسە ازايتۋعا مۇمكىندىك مول», دەيدى.
سىياقىسى 10 ملن تەڭگە تۇراتىن ەكىنشى ورىن يەگەرى – گەيميفيكاتسيا مەن AI ادىستەرىن قولدانۋ ارقىلى ءينسۋلتتى قالپىنا كەلتىرۋگە كومەكتەسەتىن تسيفرلىق تەراپيا جۇيەسى «Flection.AI» ستارتاپى. پلاتفورمانىڭ نەگىزىن قالاۋشى, NU پروفەسسورى الەكساندر پاكتىڭ ايتۋىنشا, پلاتفورما استاناداعى كلينيكالارمەن بىرلەستىكتە 200 پاتسيەنتكە سىنالىپ, وڭ ناتيجە بەرگەن. كوماندا ءۇي جاعدايىندا وڭالتۋ بويىنشا امەريكالىق نارىققا شىعۋدى كوزدەپ وتىر.
3-ورىن مەن 8 ملن تەڭگەنى «Granulo system» جوباسى جەڭدى. بۇل – تاۋ-كەن ونەركاسىبىندەگى وندىرىستىك ۇدەرىستەردى جاقسارتۋعا ارنالعان كەن فراكتسياسىن تالداۋ جۇيەسى. ستارتاپ كونۆەيەردەگى كەن مولشەرىنىڭ ورنالاسۋىن باقىلاۋعا كومەكتەسەدى, بۇل شار ديىرمەنىنىڭ, بۇرعىلاۋ-جارۋ جۇمىستارىن باقىلاۋدى جاقسارتادى.
5 ملن تەڭگەلىك كورەرمەن كوزايىمى سىيلىعىن «Hemo lab» مەدتەح-ستارتاپى ولجالادى. بۇل – ءدال دياگنوز قويۋ ۋاقىتىن 10 ەسە قىسقارتىپ, 95% دالدىكپەن اۋرۋلاردى ەرتە دياگنوستيكالاۋعا ارنالعان SaaS-پلاتفورماسى.
سونىمەن قاتار بارلىق ستارتاپ يەلەرى تالىمگەرلىك باعدارلامالارىنا قاتىسۋ جانە يندۋستريالىق سەرىكتەستەرمەن ىنتىماقتاستىق ورناتۋ مۇمكىندىكتەرىنە دە يە بولدى. بۇل ولارعا ءوز جوبالارىن كەڭەيتىپ, جاڭا نارىقتارعا شىعۋعا كومەكتەسەدى. ۇيىمداستىرۋشىلاردىڭ اقپاراتىنا سۇيەنسەك, NU الداعى ۋاقىتتا ەلىمىزدىڭ باسقا ۋنيۆەرسيتەتتەرىن دە قوسىپ, بايقاۋدى كەڭەيتپەك. ۇزاقمەرزىمدى جوسپارلاردىڭ ىشىندە ستارتاپتاردى قولداۋ قورىن قۇرۋ ماقساتى بار, ول تۇراقتى نەگىزدە «Deeptech بايگە» وتكىزىپ وتىرۋعا مۇمكىندىك بەرەدى.
