دەپۋتات بۇگىنگى كۇندەگى يگىلىكتەر بىرنەشە جىل بۇرىنعى ەل ازاماتتارىنا ورىندالمايتىن ارمان بولعانىن جەتكىزدى. زامان وزگەرىپ بۇل باستامالار قالىپتى جاعدايعا اينالعانىن ايتتى.
ەڭ اۋەلى ا. ايماعامبەتوۆ مۇعالىمدەردىڭ مارتەبەسى تۋرالى باياندادى.
«مۇعالىمدەر – ەلىمىزدەگى ەڭ ءىرى كاسىبي قاۋىم. 500 مىڭنان استام پەداگوگ – قازاقستاننىڭ بولاشاعىن قالىپتاستىراتىن جاندار. ءبىلىم - بۇل جارىق. ەگەر مۇعالىمنىڭ شامى ءسونىپ قالسا, بارلىق قوعام قاراڭعىدا قالادى. سوندىقتان دا, مەملەكەت باسشىسى رەفورمالارىن ءدال وسى ۇستازداردان باستادى. مۇعالىمدەردىڭ ورتاشا جالاقىسى نەبارى 109 مىڭ تەڭگە بولسا, بۇگىندە ول ەكى ەسەدەن استام ءوستى. «پەداگوگ مارتەبەسى تۋرالى» زاڭ قابىلداندى», دەدى ول.
سونداي-اق مۇعالىمدەردىڭ ىقتيارىنسىز گازەت-جۋرنالدارعا جازىلۋ, كوشە سىپىرۋ, شەكسىز ەسەپ بەرۋ مىندەتتەرى زاڭمەن توقتاتىلعانىن باسىپ ايتتى.
دەپۋتات ودان ءارى پرەزيدەنتتىڭ «جايلى مەكتەپ» جوباسىنا توقتالدى.
«ەندى, مەكتەپتىڭ قاي جەردە ورنالاسقانى ماڭىزدى ەمەس – اۋىلدا ما, قالادا ما – بارلىق جەردە بىردەي, جوعارى ستاندارتتار: زاماناۋي جابدىقتار, قاۋىپسىز ورتا, ەرەكشە بالالارعا قولجەتىمدىلىك. بۇل بۇرىنعىداي تەك وبلىس ورتالىقتارىندا اشىلاتىن 20-30 ەليتالىق مەكتەپ ەمەس. بۇل – بۇكىل ەل بويىنشا, ونىڭ ىشىندە شالعاي اۋىلداردا سالىنعان 217 جاڭا ءارى جايلى مەكتەپ. يميدجدىك وبەكتىلەر ەمەس, شىن مانىندە ەلگە قاجەت مەكتەپتەر مەن اۋرۋحانالار سالىنىپ جاتىر. ويتكەنى ءار جاڭا مەكتەپ – جاي عانا عيمارات ەمەس. ءار مەكتەپ ول ناعىز بولاشاقتىڭ فابريكاسى», دەدى ا. ايماعامبەتوۆ.
سونىمەن قاتار پرەزيدەنتتىڭ «ۇلتتىق قور – بالالارعا» جوباسى دا تىلگە تيەك ەتىلدى. ءار بالانىڭ ءوز ءومىرىن دەربەس قۇرۋىنا ارنالعان باستاپقى كاپيتالدىڭ ماڭىزدىلىعى ايتىلدى. بۇعان قوسا ءبىلىم بايگەلەرىنەن جەڭىسپەن ورالعان بالالار دا وليمپيادا چەمپيوندارى سەكىلدى لايىقتى قولداۋ-قوشەمەتكە يە بولىپ كەلە جاتقانى باياندالدى.
ا. ايماعامبەتوۆا بۇدان كەيىن دەنساۋلىق ساقتاۋ ماسەلەسىندەگى ناتيجەگە توقتالدى.
«بۇگىنگى كۇنى راك اۋرۋىنا شالدىققان ون مىڭداعان ناۋقاس قىمبات تارگەتتىك دارىلەردىڭ كەڭەيتىلگەن تىزىمىنە قول جەتكىزدى. ءتىزىم ەكى ەسە, قامتۋ ءۇش ەسە ارتتى. باسقاشا ايتقاندا, ولار وتباسىلارىمەن جانە جاقىندارىمەن بىرگە بولۋ ۋاقىتىن ۇزارتىپ, باعالى مۇمكىندىك الدى», دەدى دەپۋتات.
ا. ايماعامبەتوۆ ءسوزىنىڭ سوڭىندا اتقارىلۋى ءتيىس اۋقىمدى جۇمىستاردىڭ ءالى دە بار ەكەنىن ايتتى.
«بۇلار مامسپەن قامتىلمىعان ازاماتتار, ساپالى مەديتسينالىق كومەككە قولجەتىمدىلىك, رەتتەلمەگەن تاريفتەر پروبلەمالارى. بۇل ماسەلەلەرگە مەملەكەت باسشىسى ارنايى توقتالىپ, ءتيىستى تاپسىرمالاردى بەردى.
تاعى ءبىر ۇلكەن سۇراق – جۇزدەگەن مىڭ ازاماتتىق قىزمەتكەرلەردىڭ جالاقىسىنىڭ تومەندىگى مەن 500 مىڭ مۇگەدەكتىگى بار جانداردىڭ, بۇگىنگى نارىق پەن باعالارعا ساي كەلمەيتىن جاردەماقى ماسەلەسىن دە بولاشاقتا شەشۋىمىز قاجەت», دەپ قورىتىندىلادى ءسوزىن دەپۋتات.
